¹ Umet Paulus, se kelunan pegawa denge, empei ufan so'on puyan kelunan un, aken na met Yesus Kristus ya' lepek nai beti' met a'ang kelunan ira' matai ngan met Amai ja'au. ² Ngan mung senganak ira' un tungung sedingan aki', ku' pala' mpun jemaat ku' Galatia: ³ Pengelesau tiga tawai pumung ngan ikam ngan se'e urip umet Tuhan Allah, Amai Ja'au lu, ngan met Tuhan Yesus Kristus, ⁴ Iya' lepek mencai use-A ufan koon tuman ketu' penyala' lu, kepetakau ileu umet usun tana' iya' jaat na' kini, kebaan pengufa' Tuhan Allah ngan Tu'a Ja'au lu. ⁵ Kume iye na peniga ngan se'e kline' pafi kenyain ti! Amin. ⁶ Malap ale' nee, nemg ufan nem palet ale' tai kelupi' kimet nem neng Iye, iya' ko'on pengelesau Yesus Kristus lepek bai ikam, beleka' lu' na'am ngebaya' se denge Injil ira' se-naan, ⁷ Iya' atek lanna di' mpei un se-denge iya' tiga un. Ufan un dulu bang ufa' ke nekasing ikam ngan un sedep ra ufa' ke menyaliu Denge Tiga Tuhan Yesus lu'. ⁸ Aken pa, na' pa se malaikat nai met surga ti kenai bara' se denge Injil ira' selipa' neng iya' ami' lepek bara' kume ikam, kesiu' tuyen tu'a nia, ⁹ Ku' keba'an iya' lepek ami bara' aringda, iye lu' pa iya ami' bara' le'e; buk un kelunan iya' nai bara' pala' ikam se denge, aken selipa' ngan Denge Tiga iya' lepek ami' bara' kume ikam inye da, ke siu' pinca' a o. ¹⁰ Mekempei na' kini Kupa: un dite aki' irap bangen met kelunan binyemu? Mekempei bangen umet Tuhan Allah? Un ne' mesek koon kelunan kepancau Aki mu? Buk un sedep e' ngiti ufa' kelunan kepancau aki' mpei ye' se ula' Tuhan Yesus le'e un. ¹¹ Atek lan na senganak-senganake', Denge Tiga iya' aki' lepek bara' kume ikem inye da mpei se denge tiga met kelunan un. ¹² ufan-a mpei ye ala'a umet kelunan un, mpei ufan se kelunan iya' pekalaia kume aki' puun, aken aki' ala'a ufan Tuhan Yesus tengen iya' lepek petula'a ngan nai Denge Tiga inye maki'. ¹³ Ufan lepek naam sekening daau pemuyan uripe' aringda dalem pengelan Yahudi: mpei un se-se mpeng-e' mpun jemaat Allah ngan metek kimet ufa' kepesalai ire. ¹⁴ Neng dalem pengela Yahudi, aki' na atek-atek tisen neng ketu' tuyang e' ira' kua' urip ngan aki' neng lebu' jaau me', aki' pa tangen petubo adet sepun me' umet mena'a da. ¹⁵ Aken o daleu-A, iye iya' lepek menyile' aki' umet daleu sinakda menale' aki' ngan mengiri pa neng o kenai iye musang da iya' bai aki' ufan koon pengelesau -A. ¹⁶ Siu' na pengufa'A kebara' anak-A neng dalem aki', apan ne' kepedeng Iye nengaang lebu'-lebu' ira' base awang Yahudi, seng kejep pe-e nce un nyat pebetepme kelunan; ¹⁷ Ple'e pa aki' nce un tai ku' Yerusalem petegu' ngan ire ira' aring ufan lepek nuyan lawa Denge Tiga kena aki' da, aken di' aki' tengen ketai leka' ku' tana' Arab ngan umet ati kenai e' peluwet ku' Damsyik o. ¹⁸ Teleu uman o inye, sulo ketai e' ku' lebu' Yerusalem menu' Kefas da, ngan leme sui' pulu' dau e' nyakai iye neng lamin ati. ¹⁹ Daleuinye da, mpei e' petegu' ngan pegawa Denge Tiga ira' se un, bang Akub senganak Tuhan Yesus da lu' aki' tegu. ²⁰ Neng ata jume Tuhan Allah Aki' ngluung daau isiu e': ineu iya' aki' lepek nyurat kume ikam ini, se ineu iya' atek lan lu', mpei e' baka' un. ²¹ O inye tai e' masat ku' tana' lebu'-lebu' Siria ngan Kilikia ti poo. ²² Seng kasan e' ku' mpun kelunan ira' ngelan Tuhan Yesus ku' Yudea ti, tu' mpeiufan ra tisen aki' (ngedana' silung e') lu' pu-un. ²³ Bang ufan sekening denge lu' ra, aki' iya' petuyan kelunan ira' ngelan Tuhan Yesus irai aring da, ineu iye pia' na' kini nai bara' neng jo pengelanlu ni poo, pengelan iye ufa' kepesalai irai. ²⁴ Ngan neng o ketai ra tisen aki' noo, ire maak pempau ngaran Tuhan Allah.