¹ O lepek lalau pat sui' pulu' uman noo, tai e' plee ku' Yerusalem ngan Barnabas, aki' ngkin pa Titus ngan me'e. ² Aki' tai ku' Yerusalem ti di' ufan Tuhan Allah tengen iya' soon aki' tai. Mengiri pee pigai Denge Tiga pala' ire ku' kebaan e' penco Denge Tiga kume lebu'-lebu' ira' base awang Yahudi - dalem penira' e' tengen ngan kelunan un se'e ira' aki' nyelima' - apan un bang lu tai nyaru. ³ Kenuwe pa senganak e' Titus iya' sedingan aki' kua' se lebu' Yunani, mpei dulu nengayet ko'on iye' ka nyimat un. ⁴ Atek lana, un lanpa senganak lu ira' ngedapet nai ke dalem, nai nyelifo nengaang ileu nengayet kemafang ngan mempeng ileu pasat urip see' dalem Yesus Kristus, apana ngan janan iti ra sinteng kepetuyen ileu ngan uyai ileu ula' ra. ⁵ Aken keduut pa, mpei me' kepekedot ngan ufa' tunuk pala' ire un. Apan na Denge tiga lemuto pumung ngan ikam. ⁶ Ngan plee poo, kelunan-kelunan ira' aring tisen, kebaan kelunan ja'au iya' un lanan mpau aring-aring da, mpei inye aki' menaat un, ufan a' mpei Tuhan Allah ti menaat silung un na' pa kenuwen na, mpei kelunan ira' aki' na' un see sinteng kenengayet soon se ineu iya' se naan kemaki' un. ⁷ Aken neng o ra lepek tisen, ngan ire menaat ufan Tuhan Allah lepek tulat gayeng ini kume aki' apan ne' tai pedenge Denge Tira' iya' tiga kume lebu' dulu ira' nce nyimat, ku' kebaan Petrus tai bara' Denge Tiga pala ira' lepek nyunat. ⁸ Ufan A lepek mencai ayeng kimet kume Petrus ke nuyan pegawa Injil pala' kelunan-kelunan ira' lepek nyimat, Iye lu' ta iya' lepek mencai ayeng kimet kemaki' tai pendenge Denge Tiga pala' kelunan-kelunan ira' nce menyimat. ⁹ Ngan o e' lepek dite pengelesau iya' iye mencai kume aki', ngan Akub ngan Kefas, ngan Yohanes iya' seleket pengeja'au mpun kelunan, kepebengkem usu' ngan aki' mengiri lan pa ngan Barnabas kebaan se kedana' pebeke' tawai, apan me' tai pala' kelunan-kelunan ira nce un nyimat ngan ketu' kelunan ira' lepek nyimat. ¹⁰ Bang pengufa' tengen me' lemuto kengetawai kelunan kasip atek lana inye ta se iya' aki' kenengayet keuyai. ¹¹ Daleu kenai Kafas (Petrus) afi' ku' lebu' Antiokhia, penco sebeleng daau e' nyekang iye, ufan na sala'. ¹² Ken dulu ira' base Akub ti nai, iye lepek ufan tai pumung uman se barang ngan kelunan ira' base awang kelunan Yahudi, un poo neng o ufan kenai kelunan binye afi'. Sulo ketai Petrus na nyerada ire baan dite kemenyuuk da afe' a tai pumung uman ngan ire noo, ufana takut neng kelunan-kelunan ira' nyimat ti. ¹³ Mekiti pa senganak-senganak lu ira' met lebu' Yahudi tai kelefo kimet ra pumung ngan Petrus, pe ketai Barnabas senabet ngan pemuyan lefo kimet ra na. ¹⁴ Aken pa daleu e' menaat dite pemuyan ra ti iya' nce un siu' ngan katuk Denge Tiga inye, sulo e' pisiu Petrus ti neng jume kelunan kadu' ira' iti, un daau e' kume ire': "iku' na se kelunan Yahudi o', aken dite urip iya' iku' pasat kua' ngan keluanan lebu' dulu ira base awang, mengempei o' sinteng kepetajen soon dulu ira' base awang iti kemurip baya' adet kelunan Yahudi kupa? ¹⁵ Met aring kenai me' musang da, ami' se kelunan Yahudi, mpei me' kelunan un sala' kebaan lebu'-lebu' ira' se ni un. ¹⁶ Tisen taam na, ufan mpei se kelunan usun tana' ni iya' teneng ufanna baya' daau katuk Adet Torat, iya' tenenga buk iye bang un tebelom ngan pengelan dalem Tuhan Yesus Kristus lu'. Iti tuman ufan lepek ngelan pala' Kristus Yesus, apan me' ke un teneng koon ufan pengelan dalem Kristus ngan mpei ufan pemuyan me' baya' daau katuk Adet Torat: "ufan mpei un se kelunan iya' dulu kena' teneng" ufanna pasat adet Torat. ¹⁷ Aken pa kata me' tengen di' dalen me' kenengayet ka na' ami' teneng dalem Kristus, beleka' ufan kelunan un penyala' me' mengempei ye mekiti, un Tuhan Yesus ti petubo penyala' mu? Mpei mekiti un. ¹⁸ Buk aki' ka pedeng uli' se ineu iya' aki' lepek mebak, aki' bara' kume ikam aki' ni se kelunan iya' menyala' adet Torat. ¹⁹ Ufan lepek matai ne-e' ko'on ukum adet Torat dalem ukum Torat, apan e' murip kume Tuhan Allah. Aki' lepek matai neng kayeu belaka' ngan Tuhan Yesus. ²⁰ Aken sa' murip lu' pee, aken mpei aki' iya' murip ini lee un, aken Yesus Kristus iya' murip dalem aki' ni. Ngan urip e' iya' aki' nyenganan pasat na' kini dalem seie' na urip iya Iye lepek lesau aki' ngan mencai use-A kume aki'. ²¹ Mpei e' nyekang pengelesau Tuhan Allah un. Buk ufan un kedoot da peneneng dalem Adet Torat di', mpei un bang patai Kristus lee nu-un.