¹ ಇನಾವಾಖ್ಹ್‍ತೆ ಹಮೆ ಖ್ಹಂಜಾತೆ ಸಂಗತಿನಾಖ್ಹರಿ ಸ್ಛುಕಿಸ್ಝಾಷುಕರಿ ಡರೀನ್ ಇನಾಖ್ಹರು ಸ್ಝಾಖ್ಹತ್ ಖ್ಹಯಾಲ್‍ರಾಕ್ನಾ ಖವಾಳಹುಯಿರಾನು. ² ಷೇ ದೇವ್ನೋ ಮಲಕ್‍ಭಣ್ತೂ ಭೋಲಾಯೂತೆ ವಾಖ್ಯ ಘಟ್ ಉಭಿರೀನ್ ಇನಾ ಡಾಂಗಿನ್ ಕರ್ಯೊತೆ ಹರ್‍ಯೇಕ್ ಗಲಾತ್ನಾಬಿ ವಾತೆ ಕೊಖ್ಹಂಸ್ಝಾನಿತೆ ನ್ಯಾಯಥಿ ಪ್ರತಿಫಲ್ ಹುಯೂತೆ ಅಪ್ಣಾ ಖ್ಹಾಮ್ಣೆ ಮ್ಹೆಲಾಯಿರ್ಹೈತೆ ³ ಕೆತ್ರೇಕಿ ಮೋಟೊ ರಕ್ಷಣೆನಾ ಅಪ್ಣೆ ಇಂಕಾರ್ ಕರ್ಯೋತೊ ಸ್ಛುಕಾಯಿಲೆವಾನು ಕಿಮ್? ಯೋ ಶತ್ಕಿ ಖ್ಹೊದಾಥಿ ಪೈಲ್ಹೆ ಬೋಲಾಯೂ; ಇನೆಥಿ ಖ್ಹಂಸ್ಝಾವಾಳು ಅನಾ ಹಮ್ನಾಘಟ್ ಬಣಾಯ; ⁴ ದೇವ್ ಖ್ಹಣಾದ್ನೂ ಕಾಮ್ನಾ ಕೆತ್ರೂಕಿ ಲಪಟ್ನೂ ಮೊಟಕಾಂನಾಖ್ಹರೂ ಸ್ಛಲಾವಿನ್ ಪವಿತ್ರಾತ್ಮನಿ ವರನಖ್ಹರೂ ಇನಿ ಮರ್ಜಿನಿಲಪಟ್ಮಾ ಇವ್ಣಾ ದೀನ್ ಇವ್ಣಿವಾತೇವ್ನಾ ಸಾಕ್ಷಿಬೋಲುಕರ್ತೊಥೊ ಯೇಸು ಥೋಡಿವಖ್ಹತ್ ದೇವ್ನಾಮಲಕ್‍ಥಿ ಕಮ್‍ಹುಯೋತೆ ಕಾರಣ್ ⁵ ವಾತೆಕರೂಕರಿಯೆಂತೆ ಅಗ್ಲೀ ಜಗತ್ನಾ ಇನೆ ದೇವ್ನಾಮಲಕ್ನಾ ಕಬ್ಜಾಮಾ ಕೊಧಿಧೊನಿ ನಿ ⁶ ಭೋತಿನಿ ಏಕ್ ಭಾಗ್‍ಮಾ- ಮನ್‍ಖ್ಯೂ ಕೆತ್ರೇವಾಳೊ; ಇನಾ ತೂ ಷಾನ ಖ್ಹಯಾಲ್‍ಕರ್ನೂ? ಮನ್‍ಖ್ಯೂ ಕೆವ್ವೋಸ್ಛಾ; ಇನಾ ಷಾನ ದೇಕ್ನೂ? ⁷ ಇ ದೇವ್ನೋ ಮಲಕ್‍ಥಿ ಥೋಡುಸ್ ಕಮ್ ಕರ್ಯೊನಿ; ಮಹಿಮೆಬಿ ಇಸ್ಝಾತ್ನಾ ಇನಾ ಕಿರಾಟಕರೀನ್ ಫಾಲ್ಯೂ ⁸ ಇನಾ ಪಗ್ನಾಹೇಟ್ ನಾಖಿನ್ ಇನಿ ಕಬ್ಜಾಮಾ ಕರ್ಯೊನಿ ಕರಿ ಪರ್‍ಖಾನಿ ಘೋಣಿ ಬೋಲ್ಯೋ. ಇನಾ ಅಖ್ಖೂಸ್ ಮನ್‍ಖ್ಯಾನ ಕಬ್ಜಾಮಕರಿರಾಖ್ಯೋಸ್ಕರಿ ಇನಾ ಏಕ್ತೋಬಿ ಕಬ್ಜಾಮಾ ನಾ ದೇನೂತೆ ಕೊ ಮ್ಹೆಲ್ಯೋನಿಕರಿ ಬೋಲಾನಿಘೋಣಿ ಹುಯೂ ಕತೊ ಅಖ್ಖೂಸ್ ಇನಿ ಕಬ್ಜಾಮಾ ಹುಯಿರೂತೆ ಅಪ್ಣೆ ಅಜ್ಹೂಬಿ ಕೊದೇಬಿಯೇನಿ ⁹ ದೇವ್ನೊ ಮಲಕ್‍ಥಿ ಸ್ಝರ್ರೇ ಕಮ್ ಬಣಾವಿರಹ್ಯೋತೆ ಏಕ್ಜಾಣೊ, ಕತೊ ಯೇಸು ತಾಖತ್ನಾಬಿ ಇಸ್ಝಾತ್ನಾ ಕಿರಾಟನೀಘೋಣಿ ಲೀರಾಖ್ಯೋತೆ ಇನಾ ಅಪ್ಣೆ ದೇಖ್‍ಷೂ. ಮರ್ತಾಲೀನಸ್ ಇಸ್ಝಾತ್‍ಬಿ ತಾಖತ್ನಾ ಲೀಲಿಧೊ. ಯೊ ಖ್ಹರ್ನೆಥಿ ಅಖ್ಕಾನಕಾಜೆ ಮರಣ್ಣಾ ಲೆನೂಸ್ ಪಡ್ನೂಥೂ ¹⁰ ಹರ್‍ಯೇಕ್ ಕಿನಾಕಾಜೆಬಿ ಕಿನೇಥಿ ಉಬ್‍ಜ್ಯೂಕಿ ಯೊ ಘಣಾ ಛಿಯ್ಯಾವ್ನಾ ತಾಖತ್ಮಾ ಮಳಾವನ ಇವ್ಣಿ ಬಸ್ಛಾವಳೊ ಪ್ರಭೂನಾ ಲತಾಡಥಿ ಪೂರ ಬರಾಬರ್ ಕರ್ವಾನ ಇನಾ ಅಸ್ಛೂ ನಸ್ಝ್‍ರಾಯೂ ¹¹ ಪವಿತರ್ ಕರಾವಳನಬಿ ಪವಿತರ್ ಹುವಾತೆ ಅಖ್ಕಾವ್ನಾಬಿ ಏಕ್ಕಾಸ್ ಬಾಸ್ಛಾ ಆ ಕಾರಣ್‍ಥಿ ಪವಿತರ್ ಕರಾವಲೊ ಪವಿತರ್ ಹುವಾಳನಖ್ಹರೂ ಭಂಯೇ ಕರಿ ಬೋಲಾನ ನಾ ಷರ್ಮಾವ್ನೂ ನಾತೆ ¹² ನಾಂನಿ ಮಹಿಮೆನಾ ಮಾರ ಭಂಯೇವ್ನಾ ಮಾಲುಂಕರಾವಿಷ್ ಸಭೆನಾ ಅಧಾಕ್ಮಾ ತುನಾ ಸ್ತುತಿನೂ ಗೀದ್ ಬೋಲಿಷ್ ಕರಿಬಿ ಮೆ ದೇವ್ನಾಪರ್ ಭರಾಖ್ಹೊರಾಖವಾಳೊ ಹುಯಿರಿಷ್ ಕರೀಬಿ ¹³ ಹಂದೇಕ್, ಮೆ ದೇವ್‍ನೆ ಮನಾ ದಿರಾಖ್ಯೋತೆ ಲಡ್ಕಾಬಿ ಛಿಂಯೆಕರಿಬಿ ಬೋಲೂಕರಾಸ್ ¹⁴ ಯೊ ಕಾಹೇತೆ ಛಿಯ್ಯಾ ಲೊಹ್ಹೀಬಿ ಬೊಟಿನಿ ಆಧಾರ್ ಹುಯಿರಾಸ್ ಇನಾವಾಖ್ಹ್‍ತೆ ಯೋಬಿ ಇವ್ಣಿನಿತರಸ್ ಹುಯಿಗಯೊ. ಇನಿ ಮರಣ್‍ಥೀಸ್ ಮರಣ್ಣ್‍ನಿ ಹಕ್‍ವಾಳನ ಕತೊ ಸೈತಾನ್‍ನಾ ಲಪಾಡಿದೆವಾನಬಿ, ¹⁵ ಮರಣ್ಣನೊ ಡರ್‍ನಾ ಕಾಜೆ ಇವ್ಣ ಜವ್ಣಾಮಾ ಪೂರದನ್ ಗುಲಾಂಹುಯಿನ್ ರಹ್ಯಾತೆ ಇವ್ಣಾಖ್ಹರೂ ಸ್ಛೋಡಾವನ ಕಾಜೆ ಇವ್ಣಿನಿಘೋಣಿ ಲೋಹ್ಹೀಬಿ ಚೋಟನಿ ಶರೀರ್ನಿಘೋಣಿ ಹುಯೊ ¹⁶ ಯೊ ದೇವ್ನಾ ಮಲಕ್ನಾಖ್ಹರೂ ಧರಿಹುಯೊ ಕರಿ ಕೊ ಲಿಖ್ಖಾಯಿರ್ಹಯೂನಿ; ಅಬ್ರಹಾಮನಿ ಖಾನ್ದಾನ್ನಾ ಹಾತ್‍ಧರೀರಾಕ್ಯೊಸ್ ಎತ್ರೇಸ್. ¹⁷ ಇನಾವಾಖ್ಹ್‍ತೆ ಇನೆ ಅಖ್ಖಿ ವಿಚಾರ್ಮಾ ಇನಾ ಭಂಯೆವಾ ಬರಾಬರ್ ಹೋಣುಕರಿ ಆಯೂ. ಅಮ್ ಯೊ ಅದ್ಮೀವ್ನೂ ಪಾಪ್ನಾಖ್ಹರೂ ಮಾಟಾವನವಾಖ್ಹ್‍ತೆ ದೇವ್ನಾ ಕಾಮ್‍ಮಾ ಗೋರ್‍ಬಿ ಬರಾಖ್ಹೋಬಿ ರಹೈತೆ ಮೋಟೊ ಯಾಜಕ್ ಹುಯ್ಯಿಗಯೊ ¹⁸ ಯೋಸ್ ಪರಿಚೊಹುಯಿನ್ ಲತಾಡಾವ್ನಾ ಖ್ಹಮಾಳ್ಯೊ ಇನಾವಾಖ್ಹ್‍ತೆ ಪರಿಚೋಹುವಾಳನವಾಖ್ಹ್‍ತೆ ಮದತ್ ಕರ್ವಾನಕಾಜೆ ತಾಖತ್‍ವಾಳೊ ಹುಯಿರೋಸ್