1 ಪೆಂತಕೋಸ್ತನೊ ದನ್ನಿ ಪೋಸ್ಝಾ ಆವ್ತಾಲಿ ಇವ್ಣೇಖ್ಹರಾ ಏಕ್‍ಮನ್‍ಥಿ ಏಕ್ಕಾಸ್ ಸ್ಝಗೊ ಮಳಿರಾಃಥಾ. 2 ತೆದೆ ವಾಯ್ಯಿರೊ ವಾಗಾ ಇಮ್ ಆಬ್ಮಾಥೊ ಏಕ್ ಅವಾಸ್ಝ್ ಹುಯ್ಯಿನ್ ಇವ್ಣೇಖ್ಹರೂ ಬೆಠಾತೆ ಘರ್ಮಾಖ್ಹರೂ ಭರಾಯ್ಯಿಗಯೂ. 3 ಯೊ ಕಾಹೇತೆ ಆಗ್ನೀ ಸ್ಝಲ್ಪಾಟ್ನೀತರ ರಹೈತೆ ಜೀಬ್‍ಖ್ಹರಿ ಅಲಾದಿ ಅಲಾದಿ ಹುವಾ ಇಮ್ ಇವ್ಣಾ ನಸ್ಝ್ರಾಯ್ಯಿನ್ ಇವ್ಣಾಮ ಎಕೇಕ್ನಾ ಉಪ್ಪಾರ್ ಏಕೇಕ್ ಹುಯ್ಯಿನ್ 4 ಬೇಷಿಗಿ. ತೆದೆ ಇವ್ಣೇಖ್ಹರಾ ಪವಿತ್ರಾತ್ಮಥಿ ಭರಾಯ್ಯಿಜೀನ್ ಯೊ ಆತ್ಮ ಇವ್ಣಾ ಇವ್ಣಾ ಬೋಲಾನಿ ತಾಖತ್ನಾ ದಿದೂತೆ ಲಪಟ್ಮಾ ಅಲಾದಿ ಅಲಾದಿ ವಾತೇಥಿ ವಾತೆ ಬೋಲಾನ ಲೀಪೋಚು. 5 ಅಬ್ನಾ ಹೇಟ್ ರಹೈತೆ ಅಖ್ಖಾ ದೇಖ್ಹ್‍ಮಾಥೂ ಆಯೂತೆ ಭಕ್ತಿದಾರ್ ಹುಯ್ಯಿರಾತೆ ಯೆಹೂದ್ಯರರಖ್ಹರಾ ಯೆರೂಸಲೇಮ್ಮಾ ಜಿವಂಕರ್ತಾಥಾ. 6 ಇಮ್ ಅವಾಸ್ಝ್ ಹೋತಾಲಿ ಅದ್ಮಿಖ್ಹರೂ ಸ್ಝೂಂಡ್ ಸ್ಝೂಂಡ್‍ಥಿ ಮಳಿ ಆಯ್ಯಿನ್. 7 ಅಖ್ಖಾಸ್ಝಣಾ ಇವ್ಣಿ ಇವ್ಣಿ ಬೋಲೀಮಾ ಅವ್ಣೆಖ್ಹರೂ ವಾತೆಬೋಲು ಕರಾತೆ ಖ್ಹಂಜೀನ್ ಘಬ್ರಾಯ್ಯಿಗಯಾ. 8 ಅಖ್ಖೂಸಣೂ ಮಸ್ತಾಪ್ ಹುಯ್ಯಿನ್ - ಹಂದೇಖೊ, ವಾತೆಬೋಲುಕರಾತೆ ಅವ್ಣೆಖ್ಹರಾ ಗಲಿಲಾಯವಳ ಕಾಹೇನ. 9 ಹಮೆ ಅಖ್ಕಾಸ್ಝಣಾ ಅಪ್ಣಿ ಅಪ್ಣಿ ಪೈಧಾಖ್ಹ್‍ನಿ ಬೋಲಿಮಾ ಅವ್ಣೆ ವಾತೆ ಬೋಲುಕರಾತೆ ಖ್ಹಂಜಿಯೆಸ್ನಿ, ಆ ಕಿಮ್ ಪಾರ್ಥಬಿ ಮೇದ್ಯ ಏಲಾಮ್ಯ ಮೆಸೊಪೊತಾಮ್ಯ, ಯೂದಾಯ, ಕಪ್ಪದೋಕ್ಯ, ಪೊಂತ. 10 ಆಸ್ಯ, ಫುಗ್ಯ, ಪಂಪುಲ್ಯ ಐಗುಪ್ರ, ಕುರೇನೆನಿ ಪಾಕ್ತಿಮಾ ಸ್ಛಾತೆ ಲಿಬ್ಯ, ಆ ದೇಖ್ಹ್‍ಮಾ ಜಿವಂಕರಾತೆಖ್ಹರಾ ರೋಮಪುರಾಥ ಆಯ್ಯಿರಃಯಾಸ್ತೇ ಯೋದ್ಯಖ್ಹರಾ ಯಹೂದ್ಯ ಸ್ಝಾತ್ಮಾರಃವಾಳ. 11 ಕ್ರೇತ್ಯರ್ ಅರಬೀದೇಖ್ಹ್‍ವಾಳ ಹುಯ್ಯಿರಾ ಅಪ್ಣೆ ಅಪ್ಣಿ ಅಪ್ಣಿ ಅಪ್ಣಿ ಬೋಲಿಮ ಅವ್ಣೇಖ್ಹರಾ ಪರ್ಮೇಶ್ವರ್ನೂ ಮೋಟೊ ಮೋಟು ಕಾಮ್ನಾ ಬೋಲುಕರಾತೆ ಖ್ಹಂಸ್ಝೂಕರಿಂಯೇಸ್. 12 ಅಖ್ಖೂ ಸ್ಝಣೂ ಘಬ್ರಾಯ್ಯಿನ್ ಷಾತಸ್ ಮಾಲುಂಪಡ್ಯೂಕೊಯ್ಯಿನೀತೆ – ಆಶಾತ್ ಹುಷೇಕರಿ ಏಕ್ನಾಏಕ್ ಪೂಸ್ಛಾಂವ್ಕರ್ತಾಥಾ. 13 ಥೋಡ ಸ್ಝೋಣ – ಅವ್ಣೇ ದಾರುಪೀನ್ ನಿಶಾಸ್ಛಡಾಯ್ಯಿ ರಾಖ್ಯಾಸ್‍ಕರಿ ಮಷ್ಕೇರಿ ಕರ್ಯಾ. 14 ತೆದೆ ಪೇತ್ರನೆ ಗ್ಯಾರಸ್ಝಣ ಅಪೋಸ್ತಲರ್ನಿ ಸ್ಝೋಡ್ಮಾ ಉಠಿ ಉಭಿರಿಃನ್ ಘಟ್ ಅವಾಸ್ಝ್‍ಥಿ ಇವ್ಣಾ ಅಮ್ ಬೋಲಾನ ಲೀಪೋಚ್ಯೊ ಯೆಹೂದ್ಯವಾಳ, ಯೆರೂಸಲೇಮ್ಮಾ ಜಿಂವ್‍ಕರಾತೆ ಅಖ್ಖಾ ಅದ್ಮೀಕ್ಹರಾ, ಆ ಖಬರ್ ಷಾತ್ಕತೊ ತುಮ್ನಾ ಮಾಲೂಂ ಹುವಾನಿತರ ಮಾರಿ ವಾತ್ನಾ ಕಾನ್‍ಲಗಾಡಿ ಖ್ಹಂಸ್ಜೋ; 15 ತುಮೆ ಖ್ಹಯಾಲ್‍ಕರಾ ಇಮ್ ಅವ್ಣೆ ನಿಷಾ ಕೋ ಸ್ಛಡಾಯ್ಯಿರಾಖ್ಯಾನಿ ಹಂಕೆಸ್ ನೌ ಬಜೆ ಹುಯ್ಯಿರೂಃಸ್ ಎತ್ರೇಸ್. 16 ಕತೊ ಅಮ್ ಪ್ರವಾದಿ ಹುಯ್ಯಿರೋಃತೆ ಯೇವೇಲನ ಮ್ಹೊಡೆ ಬೋಲಾಯ್ಯಿತೆ ವಾತ್, ಷಾತ್ಕಾತೊ. 17 ಆಖ್ರೀ ದನ್ಮಾ ಮೆ ಆಖಾ ಮನ್‍ಖ್ಯಾವ್ನಾಪರ್ ಮಾರು ಆತ್ಮನ ರೇಡಿಷ್; ತುಮಾರಮ ಸ್ಛಾತೆ ಪರ್ಖಾ ತ್ರಿಯಾಖ್ಹರಿ ಪ್ರವಚನ್ ಬೋಲ್ಷೇ; ತುಮಾ ಕಂರಾವ್ನಾ ಧರ್ಶನ್ ಹುಷೇಖ್ಹರೂ; ತುಮಾರ ಷಾಣಾವ್ನಾ ಖ್ಹೊಣ್ಯಾ ಆವ್ಷೇ. 18 ಯೊ ಕಾಹೇತೆ ಯೊ ದನ್ಮಾ ಮಾರ ದಾಸ ದಾಸಿನಪರ್ ಮಾರ ಆತ್ಮನ ರೇಡಿಷ್; ಇವ್ಣೆಖ್ಹರೂ ಪ್ರವಚನ್ ಕರ್ಷೇ. 19 ಪಮೇಶ್ವರ್ ಆವಾನೊ ಮೋಟೊ ದನ್ ಆವಾನ ಅಗಾಡಿ ಆಬ್ನಾ ಉಪ್ಪರ್‍ಬಿ ಅಧ್ಬುತ್‍ಕಾಮ್ ಹೇಟ್ ಸ್ಝಮೀನ್‍ಪರ್ ಖ್ಹಣಾದ್ನೂಕಾಂ ಖ್ಹರೂ ಬಣಾಯ್ಯಿಷ್. 20 ಲೊಹ್ಹಿ ಆಗ್ ಬಫಾರನಿತರ ಸ್ಛಾಢಾತೆ ದುಂವೊ ಅಮ್‍ಖ್ಹರೂ ಹುಷೇಖ್ಹರೂ ಸೂರ್ಯ ಹುಷೆ ಸ್ಛಾಂಡ್‍ಲೊಹ್ಹಿನಿತರ ಹುಷೆ; 21 ತ್ಯೋನ್ಬಿ ಪಮೇಶ್ವರ್ನೊ ನಾಂನಾ ಬೋಲಿಲೆವಾಳನ ರಕ್ಷಣೆ ಹುಷೆಕರಿ ದೇವ್ ಬೋಲುಕರಸ್ ಕರಿ. 22 ಇಸ್ರಾಯೇಲ್ ಅದ್ಮಿಯೊ, ಮಾರಿ ವಾತೆ ಖಂಸ್ಝೋ - ನಜರೇತಿನೊ ಯೇಸು ಸ್ಛಾನಿ ದೇವ್ ತುಮ್ನಾಬಿ ಮಾಲುಂಸ್ಛಾ ಇಮ್ ಇನಾ ಹಾತ್ಮಾಥೂ ಮೋಟುಕಾಂಖ್ಹರೂ ಅಧ್ಬುತಕಾಮ್‍ಖ್ಹರೂ ತುಮಾರಮ ಸ್ಛಲಾಯ್ಯಿ ಯೊ ಮನಾ ಲಾಡ್‍ವಾಳೊಹಿಯ್ಯಿರೋಸ್ಕರಿ ತುಮ್ನಾ ವೊತಾಳ್ಯೊ. 23 ಯೊ ಯೇಸು ದೇವ್ನೀ ನಿಯಂಕರಿರಾಖ್ಯೋತೆ ಭವಿಷ್ಯನಿ ಅಕ್ಕಾಲ್ನಾಬಿ ಇನಿನಿ ಘೋಣಿ ದೇತಾಲಿ ತುಮೆ ಅನ್ನಾಢಿ ಅದ್ಮಿವ್ನಾ ಹಾತೇಥಿ ಇನಾ ಶಿಲುಭೆನಪರ್ ಮಾರಿನಾಖ್ಯಾ. 24 ಇನಾ ದೇವ್ಣೇ ಮರಣ್ಣೀಲತಾಡಮಥೊ ಸ್ಛೋಡಾಯ್ಯಿನ್ ಉಠಾಡ್ಯೋ; ಷೇಕತೊ ಮರಣ್ ಇನಾ ಧರಿರಾಖಾನ ಕೊಹುಯೂನಿ . 25 ಇನಿ ಖಬರ್ಮಾ ದಾವೀದನೆ - ಪಮೇಶ್ವರ್ ಕದೇಬಿ ಮಾರಾಖ್ಹಾಮ್ಣೆ ರಹೈತೆ ದೇಖುಕತೋಥೊ, ಮೆ ಹಲ್ನೂನಾತೆ ಯೊ ಮಾರ ಖವಾ ಪಾಕ್ತೀಮಾ ಸ್ಛಾ. 26 ಇನಾವಾಖ್ಹ್ತೆ ಮಾರೊ ದಿಲ್ ಖ್ಹುಚಿ ಹುಯೂ; ಮಾರಿ ಜೀಬ್ ಆನಂದ್‍ಥಿ ಗೀದ್ ಬೋಲಿ. 27 ಮಾರು ತನ್‍ಬದಾನ್ ಭರಾಖ್ಹೋಥಿ ರಃಸ್; ಷೇಕತೊ ತೂ ಮಾರೊ ಜಿವ್‍ಡ್ಯಾನಾ ಪಾತಾಳ್ಮಾ ಕೊ ಮ್ಹೆಲಾನಿ, ತೂ ಪ್ರೇಮ್‍ಕರಾವಳನಾ ಖಹಡಾನಿ ಹಾಲ್ ಕೊದೇಖಾದೀಷ್ನೀ. 28 ಜಾನ್ನೊ ಮಾರಗ್ನಾ ಮನಾ ಮಾಲುಂ ಕರಾಯ್ಯಿ ರಾಖ್ಯೋಸ್; ತಾರ ಖ್ಹಾಮ್ಣೇ ಮನಾ ಖ್ಹುಚಿನಿಘೋಣಿ ಕರೀಷ್ ಕರಿ ಬೋಲಿರಾಖ್ಹಾಮ್ಣೆ ಮನಾ ಖ್ಹುಚಿನಿಘೋಣಿ ಕರೀಷ್ ಕರಿ ಬೋಲಿರಾಖ್ಯೋಸ್. 29 ಭಯ್ಯಿ ಬಂಧೊ, ಪೈಲ್ಹೊ ಪಿತಾಹುಯ್ಯಿರೋತೆ ದಾವಿದ್‍ನಿ ಖಬರ್ಮಾ ಮೆ ಹಿಮ್ಮಾತ್‍ಥಿ ತುಮಾರ್ ಸ್ಝೋಡೆ ವಾತೆ ಕರಾಸ್ಝಾಯ್ಯಿ ಷಾತ್ಕಾತೊ – ಯೊ ಮರೀನ್ ಗಡಾವಿಗಯೊ; ಇನೊ ಘೊರಾಡ್ಯೂ ಹಂಕೆಲಗೂ ಅಪ್ಣಾಮಾ ಸ್ಛಾ. 30 ಯೊ ಪ್ರವಾದಿಹುಯ್ಯಿರೋಥೊ - ತಾರಿ ಖಾನ್ದಾನ್‍ಮಾ ಏಖ್‍ಸ್ಝಣಾನ ಮೆ ತಾರಿ ಸಿಂಹಾಸನ್‍ಪರ್ ಬೆಖ್ಹಾಡೀಷ್‍ಕರಿ ಇನಾ ದೇವ್ಣೆ ಖ್ಹೊಂಗತ್ಲೀನ್ ಬೋಲ್ಯೋತೆ ಇನಾ ಮಾಲುಂಕರ್ಲಿನ್. 31 ಅಗಾಡಿ ಹುಷೇತೆ ದೇಖಿನ್ ಕ್ರಿಸ್ತುನಿ ಜಿವಣ್ಣೇ ಬಾರೇಮ – ಯೊ ಪಾತಾಳ್ಮಾ ಕೊ ಮ್ಹೆಲಾಯೊನಿಕರಿ ಬೊಲ್ಯೊ. 32 ಆ ಯೇಸುನಾಸ್ ದೇವ್ ಉಠಾಡ್ಯೋ; ಅನಾ ಹಮೇಖ್ಹರಾ ಸಾಬೂತ್ ಹುಯ್ಯಿರಾಃಸ್. 33 ಯೊ ದೇವ್ನೊ ಖವಾಹಾತೇಥಿ ಉಚಿಸ್ಝಗೊ ಸ್ಛಡಿಗಯೊ ವಾಗ್ದಾನ್ ಹುಯ್ಯಿರೀತೆ ಪವಿತ್ರಾತ್ಮನಿ ವರನ ಬಾಕಂಥಿ ಲೀನ್ ತುಮೆ ದೇಖಿನ್ ಖ್ಹಂಸ್ಝಾನು ರೇಡಿರಾಖ್ಯೋಸ್. 34 ದಾವೀದ ಆಬ್ನಾ ಸಛಡಿಕೋಗಯೋನೀನಿ. ಯೊ ಬೋಲ್ಯೋತೆ ವಾತೆ ಷಾತ್ಕತೊ . 35 ಮೆ ತಾರ ವಿರೋಧೀವ್ನಾ ತಾರ ಪಗ್ನೀ ಪೀಠಾ ಕರ್ವಾಲಗೂ ಮಾರ ಖವಾಹಾತ್ಭಣಿ ಬೆಠೋರಃ ಕರಿ ಖ್ಹೊದಾ ಮಾರ ಮಾಲಿಕ್ನಾ ಬೋಲ್ಯೊ ಕರೀನ್. 36 ಇನಾ ವಾಖ್ಹ್‍ತೆ ತುಮೆ ಶುಲುಬೆನ ಮರಾಯತೆ ಯೊ ಯೇಸುನಸ್ ದೇವ್ ಮಾಲಿಕ್‍ಬಿ ಕ್ರಿಸ್ತುಕರಿಬಿ ಕರಿರಾಖ್ಯೋಸ್‍ಕರಿ ಇಸ್ರಾಯೇಲ್ ಖಾನ್ದಾನ್‍ವಾಳನಖ್ಹರೂ ಗುಮಾನ್‍ಕೊಯ್ಯಿನೀತೆ ಮಾಲುಂಹುಯ್ಯಿರಃವಾದೆಕರಿ ಬೋಲ್ಯೊ. 37 ಆ ವಾತೇನ ಖ್ಹಂಜೀನ್ ಇವ್ಣೇಖ್ಹರಾ ದಿಲ್‍ನಾ ಭಾಲೊ ಗಡಾನಿತ ಹುಯ್ಯಿ ಪೇತ್ರನಬಿ ಬಚ್ಯಾತೆ ಅಪೋಸ್ತಲರ್ನಾ. 38 ಭಯ್ಯಿಬಂಧೊ, ಹಮೆ ಷಾತ್‍ಕರ್ನೂಕರಿ ಪೂಸ್ಛಾಮ ಪೇತ್ರುನೆ ಇವ್ಣಾ – ತುಂಆರ ಪಾಪ್ ಪಿಠಾನವಾಖ್ಹ್‍ತೆ ತುಮಾರಮ ಹರ್‍ಯೇಕ್‍ಸ್ಝಣು ದೇವ್‍ಭಣಿ ಫರಿಜೀನ್ ಯೇಸು ಕ್ರಿಸ್ತುನ ನಾಂಪರ್ ಬಾಪ್ತಿಸಂಲೆವೊ, 39 ತೆದೆ ತುಮೆ ಪವಿತ್ರಾತ್ಮನಿ ದಾಣ್‍ನಾ ಲೀಲಿಷೂ; ಯೊ ವಾಗ್ದಾನ್ ತುಮ್ನಾ ತುಮಾರ ಲಡ್ಕಾನಬಿ ದೂರ್‍ಹುತಯಾತೆ ಅಕ್ಖಾವ್ನಾ ಕತೋಬಿ ಅಪ್ಣೋ ದೇವ್‍ಹುಯ್ಯಿರೋತೆ ಪಮೇಶ್ವರ್ ಇನಾಭಣಿ ಚಿಕ್ರಾವಳಾ ಅಖ್ಖಾವ್ನಾ ಬಣಾಯಿರಾಖ್ಯೋಸ್ ಕರಿ ಬೋಲ್ಯೊ. 40 ಅಲಾದಿ ಕೆತ್ರಿಕಿ ವಾತೇಂವ್ಥಿ ಇನೆ ಸಾಖ್ಷಿಬೋಲಿನ್ ಆಡಿ ಅಕ್ಕಾಳ್‍ವಾಳ ಆ ಖಾನ್ದಾನ್‍ಥಿ ಸ್ಛೂಕಾಯ್ಯಿಲೆವೊಕರಿ ಇವ್ಣಾ ಹೊಷಾರ್ ಕರ್ಯೊ. 41 ಇನಿ ವಾತೇಣ ಮಾನಿಲೆವಾಳು ಬಾಪ್ತಿಸಂ ಲಿಧೂಖ್ಹರೂ. ಯೊದನ್ನೆ ಕಮ್ಷೆಕಮ್ ತೀನ್ ಹೊಸ್ಝಾರ್ ಅದ್ಮಿ ಇವ್ಣಾಮ ಮಳ್ಯಾ. 42 ಇವ್ಣೆ ಅಪೋಸ್ತಲರ್ನಿ ವಾತೇವ್ನಾ ಖ್ಹಂಸ್ಝಾಮಾಬಿ ಭಯ್ಯಿಬಂದ್‍ಖ್ಹರಾ ಮಳಿರಃವಾಮಬಿ ರೋಟೊ ತೋಡಮಬಿ ಪ್ರಾರ್ಥನೆಮಬಿ ಎಕ್ಟಾರಃಮಾ. 43 ಅಖ್ಖಾಸ್ಝಣಾನ ಡರ್ ಹುಯೊ, ಯೊ ಕಾಹೇಡೆ ಕೆತ್ರೂಕಿ ಅದ್ಭತಕಾಮ್‍ಖ್ಹರೂ ಖ್ಹಣಾದ್ನೂಕಾಂಖ್ಹರೂ ಅಪೋಸ್ತಲರ್ನಾ ಹಾತೆ ಸ್ಛಾಲ್ಯೂ. 44 ಮಾನವಾಳುಖ್ಹರೂ ಎಕ್ಟಾರಹೈನ್ ಇವ್ಣಾಕನ ರಹೈನ್ ಇವ್ಣಾಕನ ರಹೈತೆಖ್ಹರೂ ಮಳೀನ್ ಖ್ಹಾತಾಹುಯಿನ್. 45 ಇವ್ಣೀ ಇವ್ಣೀ ಜಿನ್ಗಾನಿ ರಾಸ್ಛೂ ವೇಚೀನ್ ಆವತೆ ಪೈಶಾನ ಅಖ್ಕಾವ್ನಾ ಇವ್ಣಾ ಇವ್ಣಾ ಸ್ಝರೂರತ್ ಸ್ಛಾ ಇಮ್ ಭಾಗ್ ಪಾಡೀನ್ ದೆವಂಕರ್ತಾಥಾ . 46 ಇವ್ಣೆ ಹರೋಸ್ಝ್‍ಬಿ ಏಕ್‍ಮನ್‍ಥಿ ದೇವಳ್ಮಾ ಭರಾವ್ತಾಹುಯಿಯಿನ್ ಷರ್ ಘರ್‍ಮಾ ರೋಟೊ ತೋಡೀನ್ ಖುಚೀಥಿಬಿ ಅಸ್ಛಾದಿಲ್‍ಥಿಬಿ ಖಾಣೂ ಖಂವಕರ್ತಾಥಾ; 47 ದೇವ್ನಾ ಜೈಕಾರ್‍ಕರಾವಳ ಹುಯ್ಯಿನ್ ಅದ್ಮೀವ್ನೀ ದಯಾನ ಲೆವಂಕರ್ತಾ ಥಾ, ಪಮೇಶ್ವರ್ ರಕ್ಷಣೆನೊ ಮಾರಗ್ಮಾರಃವಾಳವ್ನಾ ಹರ್‍ದನ್ ಇವ್ಣಿ ಮಂಡಲಿಮಾ ಮಾಳಾಂವಂಕರ್ತೋ ಥೊ.