1 ಥೆಯೋಫಿಲ, ಮೆ ಪೈಲ್ಹೆ ಲಿಖ್ಯೋತೆ ಖಬರ್ಮಾ ಯೇಸು ಕಯೋತ್ಯೊಬಿ ಬೋಲ್ಯೊತೇಬಿ ಶುರುಕಯೋತೆ ಅಖ್ಖೂಸ್ ಬೋಲಿನ್ . 2 ಇನೆ ಸ್ಛೋಣಿ ರಾಖ್ಯೋತೆ ಅಪೋಸ್ತಲರ್ನಾ ಪವಿತ್ರಾತ್ಮ ಭಣ್ತೋ ಹುಕುಂದೀನ್ ಉಪ್ಪಾಲ್ಯೋ ಜಗತ್ನಾ ಸ್ಛಡಿಗಯೋತೆ ದನ್‍ಲಗೂ ಬೋಲಿ ರಾಖ್ಯೋಸ್ ಎತ್ರೇಸ್. 3 ಯೊ ಲತಾಡ ಪಡೀನ್ ಮರೀನ್ ಇನಾಕಢ್ತೂ ಮೆ ಜಿವ್ತೊಕರಿ ಕೆತ್ರುಕಿ ಕಾಂಥಿ ಅಪೋಸ್ತಲರ್ನಾ ವೊತಾಳಿಲಿಧೋ ಸ್ಛಾಳೀಖ್ಹ್ ರೋಸ್ಝ್‍ಲಗು ಇವ್ಣಾ ನಸ್ಝ್‍ರಾವ್ತೊ ಹುಯಿಇನ್ ದೇವ್ನೀ ರಾಜ್ಯನಿ ಬಾರೇಮಾ ಸಂಗತಿನಾ ಬೋಲುಕರ್ತೋಥೊ. 4 ಅಮ್ ರಹೈನ್ ಯೊ ಇವ್ಣಿಸ್ಝೋಡೆ ಏಕ್ಟೋಹುಯ್ಯಿನ್ ಬೆಠೋತೆದೆ ಇವ್ಣಾ – ಯೋಹಾನ್ನೇತೋಬಿ ಪಾಣಿಥಿ ಬಾಪ್ತಿಸಂ ಕರಾಯೊ, ತುಮ್ನಾತೋಬಿ ಅಸ್ಝೂ ಥೋಡ ದನ್‍ನಾವಹೈ ಪವಿತ್ರಾತ್ಮಥಿ ನಹ್ಹೊವಾವ್ಷೇ. 5 ಇನಾವಾಖ್ಹತೆ ತುಮೆ ಯೆರೂಸಲೇಮ್ನಾ ಮ್ಹೆಲಿ ನಾ ಸ್ಝಾನುತೆ ಬಾನೆ ಕರ್ಯೋತೆ ತುಮೆ ಮಾರಕನ ಖ್ಹಂಜ್ಯಾತೆ ವಾಗ್ದಾನ್ನಾ ಸಝಪಿನ್‍ರಃವೊ ಕರಿ ಹುಕುಂದಿಧೊ. ಮಳಿನ್ ಆಯಾಹುಯಾ ಇನಾ . 6 ವಾಲಿ ತೂ ಆಸ್ ಹಾಗಮ್ಮಾ ಇಸ್ರಾಯೇಲ್ ಅದ್ಮನಾಖ್ಹರೂ ರಾಜ್ಯನಾ ಫರೀನ್ ಭಾಂದಿ ದಿಷ್ನಾ ಕರಿ ಪೀಸ್ಛಾಮ . 7 ಇನೆ ಇವ್ಣಾ - ಪಿತಾ ಖಾಸ್ ಹಕ್‍ಮಾ ರಾಖಿರಾಖ್ಯೋತೆ ವೊಖ್ಹತ್ನಾಬಿ ವೇಳ್ನಾ ಮಾಲುಂಕರಾನು ತುಮಾರ ಕಾಮ್ ಕಾಹೆ. 8 ಕತೊ ಪವಿತ್ರಾತ್ಮ ತುಮಾರಪರ್ ಆವಾದೀನ್ ತುಮೆ ತಾಖತ್‍ಲೀನ್ ಯರೂಸಲೇಮ್ಮಾಬಿ ಅಖ್ಖಾ ಯೂದಾಯ ಸಮಾರ್ಯ ತಬರ್ಕಾಮಬಿ ಜಗತ್ನಾ ಆಖ್ರೀಲಗೂ ಮನಾ ಸಆಬೂತ್ ಹುಯ್ಯಿರಃನು ಕರಿ ಬೋಲ್ಯೊ. 9 ಆ ವಾತೇವ್ನಾ ಖ್ಹಂಜೀನ್ ಇನಾಕಡ್ತೂ ಇವ್ಣೆಖ್ಹರಾ ದೇಖೂಕರ ತೆದೆಸ್ ಯೊ ಉಡಿಗಯಪ; ವಾಸ್ಝ್‍ಳೂ ಯೇಸುನಾ ಮೂಚಿಲೇತಲಿ ಇವ್ಣಾ ಡೋಳನ ವಾಖ್ಹ್‍ರೆ ಹುಯ್ಯಿಗೊ. 10 ಯೇಸು ವೊಳೊಸ್ಝಾಯ್ಯಿತೆದೆ ಇವ್ಣೆಖ್ಹರಾ ಆಚ್‍ಭಣೀ ಡೋಳಠರ್ಕಾಯ್ಯಿ ದೇಖೂಕರತೆದೆ ಧೋಳೂ ಲುಂಘ್ಟಾಪೇರಿಲೀನ್ ಬೇಸ್ಝಣಾ ಪಖ್ರ್ಹಾಫಕ್‍ಕರಿ ಇವ್ಣಾಕನ ಉಬಿರೀಃನ್. 11 ಗಲೀಲಾಯವಳಾ, ತುಮೆ ಆಚ್ಭಣಿ ದೆಕ್ತಾಹುಯ್ಯಿನ್ ಉಭ್ಯಾಸ್? ತುಮಾರ ಕಂಥೊ ಆಬ್ಮಾ ಉಡಿಗಯೋತೆ ಆ ಯೇಸು ಕೆವಿಃಲಪಟ್ಮಾ ಆಬ್ಮಾ ಗಯೋತೆ ತುಮೆ ದೇಖ್ಯಾಕಿ ಯೋಸ್‍ಲಪಟ್‍ಮಾ ಆವ್ಷೇಕರಿ ಬೋಲ್ಯಾ. ತೆದೆ ಇವ್ಣೇಖ್ಹರಾ ತೇಲ್ನಾ ಸ್ಝಾಡಾನೊ ಭಾಗ್ ಕರಿ ಬೋಲಾವತೆ ಗುಗುಟ್ಟೇನಬಿ ಯೆರೂಸಲೇಮ್ನಾ ಪಾಸ್ಛಾಫರೀನ್ ಆಯಾ. 12 ಯೊ ಗುಟ್ಟೇನಬಿ ಯೆರೂಸಲೇಮಿನಾ ಸಬ್ಬತ್ ವನ್ಮಾ ಯಾತ್ರ ಕರಾಯೇತ್ರೇ ದೂರ್. ಇವ್ಣೆ ಇಸ್ಝ್‍ಗಾ ಆವಿನ್ ಇವ್ಣೆ ರಃವಂಕರ್ತಾಥಾತೆ ಮ್ಹಾಡೀಪರ್ ಗಯಾ: 13 ಕೋಣ್‍ಕೋಣ್‍ಕತೊ - ಪೇತ್ರ, ಯೋಹಾಣ, ಯಾಕೋಬ, ಅಂದ್ರೆಯ ಫಿಲಿಪ್ಪ, ತೋಮ ಬಾರ್ತೋಲೊಮಾಯ, ಮತ್ತಾಯ ಅಲ್ಛಾಯಾನೊ ಯಾಕೋಬ, ಸ್ಝಾತ್ನೊಅಭಿಮಾಣಿ ಕರಿ ಬೋಲಾಯೊತೆ ಸೀಮೋನ, ಯಾಕೋಬನೊ ಯೂದಾ, ಅವ್ಣೇಸ್‍ಖ್ಹರಾ; ಅವ್ಣೇಖ್ಹರಾ ಏಕ್‍ಮನ್‍ಥಿ ದೇವ್ನೀ ಪ್ರಾರ್ಥನೆಮಾ ಥಾ. 14 ಥೋಡಿ ಸ್ಝಣಿ ತ್ರಿಯಾಖ್ಹರಿ ಯೇಸುನಿ ಆಯಾ ಮರಿಯಬಿ ಯೇಸುನ ನ್ಹನಾ ಭಂಯೇಬಿ ಇವ್ಣಿ ಸೋಡೆ ಥಾ ಯೂದನ ಬದಲ್ ಅಲಾದ ಏಕ್ಜಾಣಾನ ಅಪೋಸ್ತಲಕರಿ ಸ್ಛೂಣ್ಯಾತೆ. 15 ಯೊ ದನ್ಮಾ ಕಂಷೇಕಂ ಏಕ್ಖ್ಹೊಈಖ್ಹ್ ಸ್ಝಣಾ ಬಂಯೆಬಂದ್ ಮಳಿಆಯಾ ಪೇತ್ರನೆ ಇವ್ಣಾ ಅಧಾಕ್ಮಾ ಉಠೀ ಉಭೀರಿಃನ್ ಅಮ್‍ಬೋಲ್ಯೊ. 16 ಭಯ್ಯಿಬಂದೊ, ಯೇಸುನಾ ಧರ್ಯಾಹುಯಾವ್ನಾ ವಾಟ್‍ವೊತಾಳ್ಯೋತೆ ಯೂದನಿ ಬಾರೇಮ ಪವಿತ್ರಾತ್ಮನೆ ದಾವಿದ ಮ್ಹೊಡೆಥಿ ಪೈಲ್ಹೇಸ್ ಬೋಲಾಯೋತೆ ಗ್ರಂಥ್‍ನಿವಾತೆ ಪೂರಹುವಾನು ಅವಶ್ಯ ಥಿ. 17 ಯೂದ ಹಮಾರಿ ಇಷಾಬ್ಮಾ ಮಳೀನ್ ಆ ಸೇವೆಮಾ ಭಾಗ್ ಹುಯಿರೋಃಥೊ. 18 ಯೊ ಅದ್ಮಿ ಇನೂ ಗಲತ್‍ಥಿ ಕಮಾಯೋತೆ ಪೈಶಾನ ಏಕ್ ಖೇತರ್ನಾ ಮೋಲ್ ಲಿಧೋ; ಅಸ್ಝೂ ಹೆಟ್‍ಮುಡ್‍ಕ್ಯೂ ಗೋಡ ಉಪ್ಪಾರ್ ಕರೀನ್ ಪಡೀನ್ ಇನೂ ಪೇಟ್ ಫುಟೀನ್ ಅತಲ್ಢೀಕ್ಹರಿ ಬಹಾರ್ ನಿಕ್ಳೀ ಪಡೀಯ್ಯಿ. 19 ಆ ವಾತೆ ಯೆರೂಸಲೇಮ್ ಖ್ಹಯೇರ್ನು ಅದ್ಮೀನಖ್ಹರೂ ಮಾಲುಂಹೋತಾಲೀನ್ ಯೋ ಖೇತರ್‍ಕರಿ ನಾಮ್ ಆಯೂ. 20 ಇನಿ ಒಬಮಾ – ಇನೂ ಘರ್ ಹಾಳ್‍ಹುವಾದೆ, ಯೊ ಅದ್ಮಿನಾ ಫರ್ನೂ ಇಮ್ ಹುವಾದೆ ಕರಿ ಇನೂ ಕಾಮ್ ಬುಜೇಕ್‍ಸ್ಝಣಾನ ಹುವಾದೆ ಕರಿ ಸಂಗೀತ್‍ನಿ ಗ್ರಂಥ್‍ಮಾ ಲಿಖ್ಕಾಯ್ಯಿಹ್ಯೋಸ್. 21 ಇನಾವಾಖ್ಹ್‍ಎ ಖ್ಹೊದಾ ಯೇಸು ಅಪ್ಣಾಮಾ ಅವ್ತೋ ಸ್ಝಾಯ್ತೆ ವೊಖ್ಹತ್ಮಾ ಕತೊ ಯೋಹಾನನೆ ಬಾಪ್ತಿಸಂ ಕರ್ಯಾಯೋತೆ ಧರ್ಲಿನ್. 22 ಯೇಸು ಅಪ್ಣಾಕಂಥೋ ಉಪ್ಪಾರ್‍ಲ್ಯಾ ಜಗತ್ನಾ ಉಡಿಗಯೋತೆ ದನ್‍ಲಗೂ ಅಪ್ಣಿಸ್ಝೋಡೆ ರವಾಳಮಾ ಏಕ್‍ಸ್ಝಣು ಅಪ್ಣಿಸ್ಝೋಡೆ ಇನಿ ಪುನುರುತ್ಥಾನ್‍ನಿ ಬಬರ್ನಿಬಾರೇಮ ಸಾಬೂತ್ ಬೋಲಾವಳೊ ಹೋಣು ಕರಿ ಬೋಲ್ಯೊ. ಆ 23 ವಾತೇವ್ನಾ ಖ್ಹಂಜೀನ್ ಇವ್ಣೆ ಯೂಸ್ತಕರಿ ಬೋಲಾವತೆ . 24 ಬಾರ್ಸಬಕರಿ ಯೋಸೇಫನಬಿ ಮತ್ತೀಯನ ಉಭಿರಾಖೀನ್ ಪ್ರಾರ್ಥನೆ ಕರ್ತಾಹುಯ್ಯಿನ್. 25 ಅಖ್ಕಾನ ದಿಲ್‍ನಾ ಮಾಲುಂಕರ್ಯೊಹುಯಾ, ಯೂದ ಅಪೋಸ್ತಲ ಕರಿ ಆ ಸೇವೆನಿಸ್ಝಗೋಮಥೊ ಭ್ರಷ್ಟಹುಯಿನ್ ಇನಾ ಹೋಣೂತೆ ಸ್ಝಘೊಕನ ಸ್ಛಲೋಸ್ಝಾತಾಲಿ ಯೊ ಸ್ಝಗೋನಾ ಲೆವಾನವಾಖ್ಹ್‍ತೆ ಆ ಬೇಸ್ಝಣಾಮ ತೂ ಸ್ಛೊಣ್ಯೋಹುಯಾನ ವೊತಾಳ್‍ಕರಿ ಬೋಲ್ಯಾ. 26 ಇನಾಪರ್ ಇವ್ಣಾಕಾಜೆ ಚಿಟ್ಟಿನಾಖ್ಯಾ. ಚಿಟ್ಟಿ ಮತ್ತೀಯನ ಆವ್ತಾಲೀಯೊ ಗ್ಯಾರಾಃಸ್ಝಣಾ ಅಪೋಸ್ತಲರ್‍ನಿ ಸ್ಝೋಡ್ಮಾ ಮಳೀನ್ ಗಣತೇಹುಯೊ.