1 ಯೇಸುಸ್ ಕ್ರಿಸ್ತುಕರಿ ಮಾನವಳು ಹರ್‍ಯೇಕ್‍ಸ್ಝಣು ದೇವ್‍ಥಿ ಪೈದಾ ಹುವಾಳು ಹುಯ್ಯಿರೂಸ್, ಕೋಣ್ಬಿ ಪೈಧಾಕರ್ಯೋತೆ ಬಾನ ಪ್ರೇಮ್ ಕರಾಸ್ನೀ ಯೊ ಬಾಧೀ ಪೈದಾಹುವಾತೆ ಅಕ್ಖಾವ್ನಾ ಪ್ರೇಮ್‍ಕರಾಸ್ 2 ಅಪ್ಣೆ ದೇವ್ನಾ ಲಡ್ಕಾವ್ನಾ ಪ್ರೇಮ್ ಕರಿಂಯೇಸ್‍ಕರಿ ದೇವ್ನಾ ಪ್ರೇಮ್‍ಕರೀನ್ ಇನಿ ಹುಕುಂನಾ ಪಾಡಿಲಿಸ್ಛಾಲಿಂಯೇಸ್‍ಕರಿ ಇನೇಥಿ ಮಾಲುಂ ಕರ್ಲಿಂಯೇಸ್ 3 ದೇವ್ನೀ ಉಪ್‍ರ್ಲಿ ಪ್ರೇಮ್ ಷಾತ್ಕತೊ ಇನಿ ಹುಕುಂನಾ ಹಾತ್ಮಾ ಪಾಡಿಲಿಸ್ಛಾಲಾನುಸ್, ಇನಿ ಹುಕುಂ ಭೋಸ್ಝೋರಾಃಯ್ತೇ ಕಾಹೇ. 4 ಷೇಕತೊ ದೇವ್‍ಥಿ ಪೈದಾಹುವಾತೆ ಅಖ್ಖೂಸ್ ಜಗತ್ನಾ ಜೀತಾಸ್ ಜಗತ್ನಾ ಜೀತಾಸ್ತೇ ಅಪ್ಣೋ ಭರಾಖ್ಹೋಸ್ 5 ಯೇಸು ದೇವ್ನೋ ಛಿಯ್ಯೋಕರಿ ಮಾನವಾಳಸ್ ಕಾಹೇತೆ ಜಗತ್ನಾ ಜೀತವಳ ಅಸ್ಝುಕೋಣ್‍ಸ್ಛಾ ಕ್ರಿಸ್ತುಥೀಸ್ ಜೀವ್‍ಜಾನ್ ಮಳಾಸ್‍ತೇ ಇನಾಭಣ್ತೂ ಸಾಕ್ಷೀಕರಿ 6 ಆಶತ್ಕಿ ಕತೊ ಯೇಸು ಕ್ರಿಸ್ತು, ಪಾಣಿಥೀಬಿ ಲ್ಹೋಯ್ಯಿಥೀಬಿ ಸಾಕ್ಷಿಲಿಧೋಹುಯೊ ಪಾಣಿಥೀಸ್‍ಕಾಹೇ, ಪಾಣಿಥೀಬಿ ಲ್ಹೊಯ್ಯಿಥಿ ಸಾಖ್ಷಿ ಹುಯ್ಯಿರೊಃಸ್ 7 ಯೊ ಕಾಹೇತೆ ಆತ್ಮ ಸಾಕ್ಷಿ ದೇವಾಳೊಹುಯ್ಯೊರ್ಹೋಸ್; ಆತ್ಮ ಸತ್ಯಸ್ವ 8 ರೂಪ್ ಹುಯ್ಯಿರೋಸ್. ಆತ್ಮ ಪಾಣಿ ಲ್ಹೊಯ್ಯಿಕರಿ ತೀನ್ ಸಾಕ್ಷಿಸ್ಛಾ; ಆ ತೀನ್‍ಬಿ ಏಕ್ಕಾಸ್ ತರೀಭಾಥಿ ಸಾಕ್ಷಿ ಬೋಲಾಸ್ 9 ಅಪ್ಣೆ ಮನ್‍ಖ್ಯಾನಿ ಸಾಕ್ಷಿನಾ ಪಾಡಿಲಿಯೆಂಸ್‍ನೀ ದೇವ್ನೀ ಸಾಕ್ಷಿ ಇನೇಥಿಬಿ ಮೋಟಿ ಹುಯ್ಯಿರೀಸ್. ದೇವ್ ದಿಧೋತೆ ಸಾಕ್ಷಿ ಷಾತ್ಕತೊ ಯೊ ಇನಾ ಛಿಯ್ಯಾನಿ ಖಬರ್ಮಾ ಬೋಲ್ಯೋತೇಸ್ 10 ದೇವ್ನಾ ಛಿಯ್ಯಾ ಪರ್ ಭರಾಖ್ಹೊ ರಾಖಾವಳು ಯೊ ಸಾಕ್ಷಿನಾ ಇನಾಮಸ್ ರಾಖಿರಾಖ್ಯೋಸ್. ದೇವ್ನಾ ಮಾನಕೊಯ್ನೀತೆ ಯೊ ದೇವ್ನಾ ಸ್ಝುಟೀಲನಿತರ ಕರಿನಾಖಸ್; ಕಿಮ್‍ಕತೊ ದೇವ್ ಇನಾ ಛಿಯ್ಯಾನ ಖಬರ್ಮಾ ಬೋಲಿರಾಖ್ಯೋತೆ ಸಾಕ್ಷಿಮಾ ಇನೆ ಭರಾಖೊ ಕೋ ರಾಖ್ಯೋನಿ 11 ಯೊ ಸಾಕ್ಷಿ ಕೆವ್ಹಿಕತೊ ದೇವ್ ಅಪ್ಣಾ ಜಿವ್‍ಜಾನ್ನಾ ದೀರಾಖ್ಯೋಸ್, ಯೊ 12 ಜಾನ್ ಇನಾ ಛಿಯ್ಯಾಮಸ್ ಸ್ಛಾಕರಿ, ಕೋಣ್ತೋಬಿ ದೇವ್ನಾ ಛಿಯ್ಯಾನ ಮಾನಿಲಿಧೂಕಿ ಇನಾ ಯೊ ಜಾನ್ ರಾಃಸ್; ಕೋಣ್ತೋಬಿ ದೇವ್ನಾ ಛಿಯ್ಯಾನ ಮಾನಕೊಯ್ನೀಕಿ ಇನಾ ಯೊ ಜಾನ್ ಕೊರಾಃಯ್ನೀ ದೇವ್ನೊ ಛಿಯ್ಯಾಮ ಭರಾಖ್ಹೊರಾಖಾವಳನ ಘಟ್ ತೀರ್ಮಾನ್ ರಾಃಸ್ 13 ದೇವ್ನಾ ಛಿಯ್ಯಾನೊ, ನಾಮ್‍ಪರ್ ಭರಾಖ್ಹೊರಾಖ್ಯಾ ಹುಯಾ ತುಮಾರಮಾ ಜಿವ್ಜಾನ್ ಸ್ಛಾಕರಿ ತುಮ್ನಾ ಮಾಲುಂಹೊಣುಕರಿ ಆ ವಾತೇವ್ನಾ ಲಿಖ್ಖಿ 14 ಅಸ್ಝು ಅಪ್ಣೆ ದೇವ್ನೀ ಮರ್ಜಿನಿತರ ಷಾತ್ ಮಾಂಗ್ಯಾತೋಬಿ ಯೊ ಅಪ್ಣಿ ಅರಸ್ಝ್ ಖ್ಹಾಂಸ್ಝಾಸ್ಕರಿ ಇನಿ ವಿಚಾರ್ಮಾ ಅಪ್ಣಾ ಹಿಮಆತ್ ಸಛಾ; 15 ಅಪ್ಣೆ ಷಾತ್ ಮಾಂಗ್ಯಾತೋಬಿ ಯೊ ಅಪ್ಣಿ ಅರಸ್ಝ್‍ನಾ ಖ್ಹಂಸ್ಝಾಸ್ಕರಿ ಅಪ್ಣಾ ಮಾಲುಂಹುಯೂತೊ ಅಪ್ಣೆ ಮಾಂಗಿಯೇಂತೆ ಇನೇಥೀ ಅಪ್ಣಾ ಮಳ್ಷೇಕರಿ ಅಪ್ಣಾ ಮಾಲುಂ ಹುಯಿರೂಃಸ್ 16 ಕೊಣ್ತೋಬಿ ಇನೊ ಭಯ್ಯಿ ಮರಣ್ ಕಾಹೇತೆ ಪಾಪ್ ಕರ್ವಾನು ನಸ್ಝ್‍ರಾಯೂತೊ ಯೊ ದೇವ್ನಾ ಅರಸ್ಝ್ ಕರ್ವಾದೆ; ತೆದೆ ದೇವ್ ಮರಣ್‍ಕಾಹೇತೆ ಪಾಪ್ ಕರಾವಳಾನ ಜಾನ್ ದಯಾ ಕರ್ಷೇ, ಮರಣ್‍ನಿ ಪಾಪ್ ಸ್ಛಾ; ಯೊ ಪಾಪ್ನೀಬಾರೇಮ ಅರಸ್ಝ್ ಕರ್ನೂಕರಿ ಮೇ ಬೋಲು ಕೊಯ್ನೀ 17 ನಿಯ್ಯಾತ್ನಾ ಆಡುರಹೈತೆ ಅಖ್ಖೂ ಪಾಪ್ ಹುಯ್ಯಿರೂಸ್; ಕತೊ ಮರಣ್ ಕಾಹೇತೆ ಪಾಪ್‍ಸ್ಛಾ 18 ದೇವ್‍ಥಿ ಪೈಧಾಹುಯೂಹು ಪಪ್ ಕರಾಕೊಯ್ನೀಕರಿ ಮನಾ ಮಾಲುಂ ದೇವ್‍ಥಿ ಪೈಧಾಹುಯೂಹೂ ಇನಾ ಬಸ್ಛಾವಸ್; ಶೈತಾನ್ ಇನಾ ಧರಕೊಯ್ನೀ 19 ಅಪಣೆ ದೇವ್‍ಥಿ ಪೈಧಾಹುಯಾಹುಯಾಕರಿ ಜಗತ್‍ಖ್ಹರೂ ಶೈತಾನ್‍ನಾ ಕಬ್ಜಾಮ ಸ್ಛಾ ಕರಿ ಮನ ಮಾಲುಂ 20 ದೇವ್ನೊ ಛಿಯ್ಯೋ ಆಯ್ಯಿನ್ ಸತ್ಯಹುಯ್ಯಿರೋತೆ ಇನಾ ಮಾಲುಂ ಕರ್ಲೆವಾನಕಾಜೆ ದಿಮಾಕ್ ದೀರಾಖ್ಯೋಸ್‍ಕರಿ ಅಪ್ಣಾ ಮಾಲುಂ. ಅಸ್ಝು ಅಪ್ಣೆ ದೇವ್ನೋ ಛಿಯ್ಯೋ ಯೇಸುಕ್ರಿಸ್ತುಮಾ ರಃವಾಳ ಹುಯಿನ್ ಸತ್ಯಹುಯಿರೋತೆ ಇನಾಮ ಛಿಂಯೇ, ಯೊ ಸತ್ಯದೇವ್‍ಭಿ ಜಾನ್ ಹುಯ್ಯಿರೋಸ್ 21 ಪ್ರೇಮ್ನಾ ಲಡ್ಕಾ ಫುತಳೀವ್ನಾವ್‍ಕಂಥೂ ದೂರ್‍ರಃವಾನ ಕಾಜೆ ತುಮ್ನಾ ಬಸ್ಛಾಯಿಲೆವೊ.