¹ Lakwtu mi nda 'yawu Yeso i Baitalami kǝ lardi Yahudiya, i zaman dǝgǝm Hirridus, ndak zǝgaya da caɗ da nai i Urrushalima da ramma, ² "A rawan Acu, warra nda 'yawu, dǝgǝm yahudaucin? Ja ika gǝshauGǝri i caɗ, ja deu gaɗa ja dlmici nakwana." ³ Hirrudus dǝgǝm kǝma kasǝn tǝnu, se hankalgǝri da tlingara, na kǝ ndak Urrushalima mak. ⁴ Hirridus da cacpai marǝmamin pǝrristaucin, na nda tarran ndiwa mak, da jayakshi ma, " I rawan ndaye ɗi Masihu?" ⁵ Akshi da ramici ma, ' I Baitialami kǝ larrdi Yahudiya,gaɗa nabi gu tarrnu kasau, ⁶ " Kǝm rro, Baitalami kǝ larrdi Yahudiya, ko rap kǝm ga-mbotak bai, i kun marǝmamin ndak yahudiya, gaɗa baci garva aye vǝrayi da kuna kǝm, warra aye dlaɓa makwatak ndaga Isrraila."' ⁷ Se Hirridus da ɗaure ndak zǝgayau i kun dǝɓǝs, da jayakshi i ɗa kalkal lakwtu mi gǝshaugu pakeu. ⁸ Da wanyakshi baitalami, ma, "Ada kwa bǝɗiyi (maki) na ankal, ri warra mayingu a kunu. Kwa beu na acin, kwa baraa labarrgu, gaɗa iyu ke nayi na dlamau nakwana." ⁹ Aku kǝmu rama dǝgǝmgu, se akshi da jǝb rakanshi, gǝshau warra akshi ike caɗ gu; da jǝb rakan i kǝmakshi, harr da nai darr'yi cǝk i dǝsku ri warra mayingu a kunu. ¹⁰ Akshi ikau gǝshaugu tǝnu, se akshi da dlam kuno na pǝrrɗai tlaparr. ¹¹ Akshi da tǝfi wǝnduwau daiki mayimgu na Marryamu miGǝri. Akshi da gutki, da dlami Ci nakwana. Da rǝpci lalitarrshi da dlamiCi bari kǝ dinarr, na lubban, na murr. ¹² Kakasku da gabɗakshi i kun suwan ma da kata i ri Hirridus bai, se akshi daivi na riwu i nye dɗakshi da dǝvu dama. ¹³ Da aku akshi bǝzu rǝwu, se maleika Sǝku da rami Isǝbu i kun suwan ma, "Atlu, ka mi na mayingu na miwu, ka rawi naci larrdi Masarr. A dlaɓi riwu, se na dlamici rama. Gaɗa Hirridus aye bǝɗiya(maka) mayingu da tǝkI na aci." ¹⁴ I kun dǝviɗgu, Isǝbu da tli da mi kulaɓu na miwu da rawi nakshi kun Masarr. ¹⁵ Da dlaɓǝngǝri riwu harr lakwtu bakota Hirridus. Su tǝku niyu na bee warra Mǝgǝnyi ramu da miya nabaucin ma, " Da kun Masarr na ɗaure Wǝngana."i ¹⁶ Hirridus ikau ndak zǝgayau ngǝrrǝntu na aci tǝnu, se da tlawurcingǝri tlaparr, da wanyi nda rəbina mamau gamsak warra a kun Baitalami, harr na warra akun lardu mak; warra amanshi shirin harr na mi mbotu na aman shirin ngun, tin da lakwtu mi aci zəga jirre biyu da miya ndak zəgayau. ¹⁷ I lakwtu ne rama mi Nabi Irrmiya ramu wakatu. ¹⁸ Ma "Nda kəma wura ɗagai i Rrama, a ɗanau i kun dlimatu gəshi tlaparr, a aɗan nin Rahila gaɗa kutli gara, atu ke kuru na kəmu (gənyi) bari miya(kanadi/jiba amai), gaɗa akshu nabai. ¹⁹ Lakwtu mi Hirridus bakotingəri tənu, se maleika Məgənyi da pake Isubu, i Masarr i kun suwan, da ramma, ²⁰ " Atlu ka mi mayingu na miwu, kayi naci lardi Isirraila, gaɗa ndak maka arro mayingu mutunakshi." ²¹ Isubu da tli, da mi mayingu na miwu, da nai i larrdi Isirraila. ²² Amman aci kəmau ma Arkilayus mau na gado afəkgəri Hirridus, a garva larrdi Yahudiya tənu, se da kəmi na kalau zaji rəwu. ²³ Amman Kakasəku dlamici gabaɗ i kun suwan tənu se da gwapəngǝri da yingəri i larrdi Galili, da yi da mbashingəri i marəm ɗa ɗagai mi nda ɗaurau ma Nazarrat. Gaɗa watata bee mi nabaucin ramu, ma, "Ndaye ɗauraGəri nən Nazarrat."