¹ A ku na yuwan kwan, na takwas zəba i kun kana ki Galili, mi Yeso ye ariwu. ² Yeso na pakurauccin gəri ke ndam pekshi miya zəbau. ³ Lakwtu wara am ngumuru datsen gara tunu mi Yeso da ramici ma, "Am ngumuru damən gara ⁴ Yeso da ramitu ma, "Ama kade riga gada gemo? lakwtu ga gusku yaye zadeu bai" ⁵ Mi gəri darami ndak wana miyau ma, "Be tawanke aci ramikun nen a dlamina." ⁶ Na vakənak zədu wara nda paida na akshi gada pek am i lakwtu ngumuru a riwu. ⁷ Yeso da ramekshi ma, "Aniyana vakenanin gu na am" har akshi da niyudu perr har i wurau. ⁸ Se aci daramikshi nda wanau ma, "A tlina kwayidu i marim baci ngumuru" se akshi nda dlami kasən. ⁹ Marim ndak ngumuru da tambi amgu na bai dlamun gara amsa karak, amman aci za ga riwara atu vere bai (amman nda wanau zigana ri wara akshi ba am gu) se aci nda dauri gəmsik amau baci ngumuru. ¹⁰ Se da ramici ma, "Tike da barau am bəlan da sukur aku nen wayin gərin nda barau wara bata sau bai ci ka jəbna bəlan gu se gususku." ¹¹ Su be ajab sukur wara Yeso dlamu i rik zəba i Kana ki Galili ri aci tattiki kərmai gəri mi pakurauccin gəri ba ri ci jirewa. ¹² A ku sunu, Yeso, mi gəri, yaganauccin gəri na pakurauccin gəri dew nakshi kafarnahum akshi dam mbasi ki yuwan rap. ¹³ Lakwtu ngumuri sa ada yahudaucccin den gara dan tau, se Yeso da yin gəri Urshalima. ¹⁴ Aci da tashi ndak dəbət kwamin, na tumamin na tatabararin, na dna piya dagwada dam mbasu a riwu. ¹⁵ Se aci da limai gurutu daraikina akshi mak da kun wunduwa Səku, na tumamin gu na kwamamin gu. Aci da wayi na aywa dagwda dak piyau, da wayi na tebər shi. ¹⁶ I dak dəbət tattabaru da ramik shi ma, "Angwena na jandau da ri tuku, ai vena na dlama wunduwa Afək i asak." ¹⁷ Pakurauccin gəri da tani ma da tarnu ma, "Gabgabta wunduwa ci antanyu." ¹⁸ Se ndak garvauccin yahudauccin darami ci maya, "Ka tattika ja gənawa tawan tin ka tika dlama jandau?" ¹⁹ Yeso daurik shi ma, "Aribgina na wunduwa Səku tuku, kuru i kun yuwan kwan na tlalti du." ²⁰ Se nda garvauccin Yahudauccin daram ma, "Ndalmi wunduwak Səku tuku i kun aman gumu fudu ayau zədu,karam ma ka tlatlidu i kun yuwan kwan?" ²¹ Aci zigabai aci arma na wunduwa gubu tika gəri. ²² A ku a ci tlan gəri da kunu ndawa wara gamtak, da kugu pakurauccin gəri da tani aci ramu kasau, se akshi da bar jirewa i kun kakadu Səku na labar wara Yeso ramu. ²³ Lakwtu wara a kun Urshalima ari ngumurisa sa ada i ri gumun ndwa gawa da bar jirewa i kun dlugun gəri gaɗa akshi ikau ajab wara aci dlamu. ²⁴ Amman Yeso tado kunu na akshi bai gada zigana akshi gid. ²⁵ Gada aci ancu nen wan daramici aɗa genən bai, gaɗa a ci zigana be wara a gəshi nən.