¹ "Jirewa, jirewa, na rame kun, nən wara dəma təfa da miya mafgi garta təmamin gu bin, amman da shi aɗau da dəvo dama, nən tunu akər na babu kapat. ² Ba ci təfa da miya mafgi a ci ne makwatak təmamin gu. ³ Ba ci dəmi mafgu a rəpte ci, təmamin gu a kəmu wara gəri, a ci ye ɗauru təmamin gu na dlugun shi da jikshi i vəda. ⁴ A ku a ci dana kə ri i vəda, a ci dayi da nuti i kəma, təmamin gu da ɗiga ci gaɗa akshi zəga na wura gəri. ⁵ Akshi a dəga magəraf bai amman a kurna a ci, gaɗa akshi zəga wura magəraf cin bai." ⁶ Yeso dlamikshi rama gamzazigai tuku, amman akshi sanutu be gəd a ramikshi bai. ⁷ Se Yeso da ramikshi wam, "Jirewa, jirewa, na rame kun Iyu ne mafgi daragai təmamin gu. ⁸ Duk ba ci ni kabən ni ga akər na ba ci kapet, amman təmamin gu kur na kəremtak shi. ⁹ I ne mafgu, in tiye tufu da riga nin, na ra na a ci; a təfa da vəri da bi na rik dawa. ¹⁰ Akər gu a ni bai se i kəra, na tək na tlimit. Na dew ga ɗa akshi da bi aro kuru da bi du tlapar. ¹¹ Iyu ne makwatak bəlan, makwtak bəlan a tadi aro gəri i təmamin gəri. ¹² Guzub ba ci wana tumanja, makwatak bai kuru təmamin gu kəri bai, in i ka dambaligun a ni nin aivana timamin gu da rawun gəri. Se dabatligurau raka na shi da wayinakshi. ¹³ A ci a rawan gəri gaɗa a ci guzub seperata lambo gəri bai na təmamin gu. ¹⁴ Iyu makwatak bəlan, na zəga na kanai kuru ka nai ke zəga na Iyu. ¹⁵ Afək ga zəga na Iyu, Iyu na zəgana Afək ga, kuru na bari aro ga gaɗa təmamin gu. ¹⁶ I na təmamin dagai mi wara a kun daragu timamin tuku bai. Na ni na akshi cam, gaɗa akshi da kəmi wura ga gaɗa akshi da dlaminakshi gayi makwatak ke gayi. ¹⁷ Gaɗa sənu ne Afək gu an cu Iyu: Na bar aro ga gaɗa na midu wam. ¹⁸ Na nən bata bai da midu da ri ga, amman na baru gaɗa aɗa ga, ina awayau baru, kuru i na awayau gənu wam. Na gəne awayu tuku da ri Afək ga." ¹⁹ Ɓəra aɗa wakatu wam da gadava yahudaucin gaɗa təlamin tuku. ²⁰ Gawashi da ramma, "A cu na zuwak kuru ni yi na a ci, kwa kərəmta gəri gaɗa gəmo?" ²¹ Ndawa jəgab da ramma, "Jandau təlam nin mi wara zuwak təfi təkau bai. Zuwak a dəmu na rəptak da tliguyu bi?" ²² Se lakwtu da dlamin gara lakwtu ngumuri ki bar aɗa i kunu Urshalima. ²³ Sartu bazara, se Yeso da yin gəri kunu wənduwa Səku i baka ri Sulemanu a mbasu. ²⁴ Se yahudaucin da vərina a ci da rami ci ma, har fatawan ka jəba ja na tuman? in ci Məgəngyi, a rami ja parak." ²⁵ Yeso da ramikshi ma, "Na rame kun amman kwa bar jirewa bai wananin wara na dlamu i kunu dləgun Afək, tatiki di kun i tai. ²⁶ Duk na kasau kwa bar jirewa bai ga ɗa kun təmamin ga bai. ²⁷ Təmamin ga a kərəmta wura ga: na zəga na akshi, kuru akshi a dəga ga. ²⁸ Iyu na barikshi aro mi go dadigiri, akshi a mutu bai, kuru na nən bata bai da gumbakshi da amiga. ²⁹ Afək ga, wara bara ni akshi, rimana gagizhin ndawa duk. Kuru na nən bata bai da gumbakshi da kun amai Afək gu." ³⁰ Iyu na Afək gu duk be gayi." ³¹ Se yahudaucin gu ndangu guguyak zam gaɗa da vərka ci. ³² Yeso ndan gumikshi maya, "Na tatəki kun wana bəlalimin gawa dari Afək. Da kun wanau tawan kwa ye vərka ga?" ³³ Se yahudaucin gu da ramma ya, "Ja vərka ci gaɗa wananin bəlan gu bai se dai gaɗa ngadar ci, gaɗa ci nən gaiyiwa, kan cu dlama na ci Səku." ³⁴ Yeso da ramikshi maya, "Da tarna bai i kunu dumaya na ramma kun zuwak." ³⁵ In a ci daurakshi ma zuwak nin, i ja gaye təlam Səku deu (go nən a dəmu musta rama Kakasuku) ³⁶ Kwarami ci ma nən Afək gu in pe baka, kuru ndawa a ci i kunu duniya ba ci ngadar,' gaɗa na ramma Iyu wən Səku'? ³⁷ In na dlama wana Afək ga bi nin, kwa bara jirewa bai. ³⁸ Amman in na wanau, ko kwa bara jirewa bai, a bara jirewa i aɗak wanau gaɗa kwa zəgi kuru kwa sanuti ci i dak Afək a kunu ga iye na kunu Afək gu". ³⁹ Akshi maku da jəba ci wam amman a ci da pədən gəri da amikshi. ⁴⁰ A ci da yin gəri fak i gəre gadira Jordan i ri wara Yahai dlamu wana Baptisima ndan mbasun gəri i ri tunu. ⁴¹ Ndawa wara a ni ri gəri akshi da ramma, "Yahai ngalte tatiki gənawa bai, amman be tawanke Yahai ramu i aɗa nangu jire." ⁴² Ndawa gawa da bari jirewa iri tunu.