¹ Dibsu deyi ana daha ana mene ki ana gedo, suntante kasu, deyi zugonsu ramtenok ka rutai zignen. ² Dibsu nzuni hul ngo bu, nzuni e jijok be is an shashana, su algi daf billensu, nzuni on na'akok algi shaf. ³ Kika onzi muni kem ana mure dibna ke ana mure suntanta ka. Mu deyanmu bayak ka karei yo dunya ki mure za'itu. Mu 'yangko deino ton tili bolo ki dasa. Ka shekemu bo'ino ke mu kukda zehe. ⁴ Me do jig-yayik Ndeyi a wangumu ki ndaltunik bula adam ndinoi, ⁵ kika rutai zina yom 'yangko bu, me yak kika ndaltuni wanga muni. Wanga munik be'i le is hoyo ki kelui bu'unoi hoyo. ⁶ Ndeyi kasimu Kelui bu'uno shei ki gem Yeso Masihu a wangumu. ⁷ Iko woi kika, namu wangko biskuk be'i tili modinni, mu deyimmu ana gyado tong zau so an bonto bu. ⁸ Dingdo wonses so jire. Ne ndalok e enik gedok tili ka ei maye e, yo a zoha mayei onangko jirek Ndeyi a zoha tili e rutai Ndeyi onsu zignen. Ei mayei zignen ke an wena bo hawo gem algi shaf. ⁹ me kol shashanak sarei, ki manta turba, ki yabtu tili ki mamardi ka uhe. Ei mayei anan 'ya bu ke an sauwi bu. ¹⁰ Ko shi shaf ngoi a mokshe tika ka hototku, ki bei gilla kanni ka modi do ka bolo, ¹¹ ko mantiti ta ngoi woi wuskok bille jire, a ishe zunhu ke olkok kanni. ¹² Don sarko Artimas ki Tikikus gemangko, i roshi ko bol ne e Nikobolis, ne ndalon deyi wondi a sommodi sange. ¹³ I roshi ko sartu Zinas, a manta sherya, ki Afolos, shida yo a yakla 'ya bu. ¹⁴ Suba biyamu biyamu shute bille ina rutai zignen yo a wadi 'yak kegje karei tong roshi nzuni ina deinok sarei bu. ¹⁵ Shafki biyai a gemno a zugonto lakda koi. Lakdidi ana ndalta muni tong ona jire. Tili modi deyik nguni shaf ku.