¹ Ko me, an ei iko modik eniy onangko. ² Ngafko koknaku deyi ana ngaha ka, ana darjanta kasu, ana hangkali, ana rutanta zina tong ona jire, tong ndaltu ki ngara bogeba. ³ Ka a ke e jerare monde ngaftik kasu ki na'ako, ana hitna bu. Nzuni deyi baya sena ham inabi shei bu. Nzuni shutante ei zignen ⁴ deyi ana shutanta mondei mimi'i mdalte zazinsu ki millansu. ⁵ Shutante nzuni deyi ana man asum ki bu'unok tili, ana deita babnensu, jo ana sunta ka dom zazinsu. Nzuni e shida 'ya woi kika kada eni Ndeyi we 'yak huli. ⁶ Ka a ke e, on gedok bogebak bunji deyi ana hangkali. ⁷ A lei lahai yiya, mati katko 'yak shutu tong rutai zignen; nako iko shutantu, tam deinos zina ki na'ako. ⁸ On dignos lahiya an 'yak huli bu, shida yo ana shanak eni Ndeyi a kola kawa, kika mure wena ei disai a ana kammu. ⁹ Bayaku suntante kasu dom bobensu ana bano tong lei miya. Nzuni suntantesu tilinsu baya e shanak nzuni bu. ¹⁰ Nzuni e shiri bu. Ki ka ka ai, nzuni tam ona jire so zina, kika nzuni moi zinak shutantumu ka Ndeyi a wangumu tong lei miya. ¹¹ Kika tili modik Ndeyi hetenok algi shaf. ¹² A shutantamu mu e shana ka rutanta disa, ki ndalta dunya. A zofshemu kola idamu mu e deino tong hangkali, ki tili modi tong bille ndeyi a sommodi woiye e ¹³ jajum yom tishe dom ki gesa biska barka ki zoha tilimu, wato ndishe nama ka Bomu abano Ndeyi ki a wanga muni Yeso Kiristi. ¹⁴ Yeso ongko kannik kammu, kika wange munik tong mure daha uhe matimu biyai bu'uno, ki kanni, biyai zansu genga kika rutanta ei zina. ¹⁵ I eni ki dolyas na'ako ko on gedo ka ei maye e. I ramtuk gedo. Ko wus yo'oto bok ko bu.