¹ Kauso, Ne turengku, ana zomumu lalauna wonse so bolos kika ne dibkudi, ne zof dibnatku so jire, ² Kika ngu dib eniy Nabakui bu'uno anangko onzi, ki eni Bomu a bano ki awangu yo onangkok sarak majirakungku. ³ Manta woiye e yo tono, ta ana zurok asar hetetu sommodi tata ka. A ina zurok asar ke a tina dom ki ei tilinsu. ⁴ Nzuni ana ta, "Ta eni meshe ni?" Tingki do dikanshemu maftangko, an ei tika nzunik kauso bu tingki kena dunya." ⁵ Montangkok e ene ta baba ki eli hatanok ham, jo ki be'i ham, tingki onzi ki be'i eni Ndeyi, ⁶ ta ki be'i ei mayeidunya wonsis lakta, ki ham tsufana. ⁷ Me baba ki elis kauso, 'yangko tek ka yesi ki be'i eni. 'Yangko nzunik ka hoti sherya ki bo'itanta ana mure daha Ndeyi. ⁸ Monte woi bu, ana zomumu, ta goli modi gem Ndeyi kit sani dibu, jo sani dibu kit goli modi. ⁹ Bomu abano erta sheke ka enini kit shida yo ma'ato moishe bu, aka ka a, a habrik nguni. Nda lei modik hawotku bo'i bu, me leilo we tubu hototku. ¹⁰ Shafki ka a, sommodi Bomu abano nditu kit a shiri. Baba ngamitok adir lulula. Lei miya a bokinni tong yesi, dunya ki rutai hawoto shaf a taminsu hena. ¹¹ Tinda karei woi shaf a lalaktinsu ka ai, subang deyi shida biyai yiya? Suba ngu e deinok bu'ushi ki daha Ndeyi. ¹² Deyak zoha tili namik roshik gesa meshe Ndeyi. Badi wonsis, a laktitik dunyak yesi, ke lei miya a bokinni tong yesis kolno yam. ¹³ Me kika ngara enini, mu geshe dunyas hoyo ki babas hoyo, be is jire dei di. ¹⁴ Kika ka a, ana zomumu, tindang anan zoha tili ka ei mayei, daurai boltu nguni ana mure bole, ke ana mure 'yak huli domni, tong deinok lahiya. ¹⁵ Ke, nama habrik Bomu abano kika wangu,kit shida yo azomumu yagenamu Bulus tureku tong mantui onani. ¹⁶ Bulus iko eni ka ei mayei shafsu tong lalaunanni, a hawoto an ei ma'ato yo mantunsu yam. Ana mure bukara ki ana mure ina 'ya tong danum a wanglantik eniy e, kit shida yo a ishek kine eni Ndeyi, kika bo'itanta kasu. ¹⁷ Kika ka a, ana zomumu, tindang manangkotik ei mayei, deita katku kada bo'itingkuk be'i youtu algi ana mure daha uhe, har ngu yaklitik rutangkui zignen. ¹⁸ Me aya tong tili modi ki manta Bomu abano ki a wangu Yeso Masihu. Eri nama ka deyito sobi ki kauso godi dom. Amina.