¹ Gebo gédẹ ya mẹ katimẹ za na ne, ya ga'ẹnẹ gédẹ nyinẹ aka gigi gi aniheli ya Usigapa mẹ n nyinẹ wa té ya sẹ ẹ fenela. ² Gebo gédẹ; "Ni utu'a liyesi, ni wu gutakpu kẹnẹ, ni mi n dẹ ibo ni uzu'a gana." Pa, kyekye mẹ uvu utu'a liyesi, pa kyekye mẹ u vu uzu'a gana. ³ Yẹ ye gédẹ lika kẹ yi ẹ fene la te, yẹ gigi gi gọngọ e tu gine la. ⁴ Ganu guyẹ té, i bemẹ iya mẹ té, ni ba gigi gi nyinẹ a kpụ gédẹ i vu bẹbyi ya gatimẹ ka Usigaps. Ivu bẹbyiya gatimẹ kana, ni ginyẹ ka liye ga mọ, liyé, gasezi, ligbezi, gakum, ⁵ ukakaentsi, ilu, lime, lukọ, ⁶ ni ga yi tsa, liye-gamọ, ga-kpụ, ni ulufu nẹ, si ge ye ka utata. ⁷ I vu bebyi ya gatimẹ ka na ni lika ka Ukụkwasi ni ntsi ya Usigapa ne: Si ga-lili si ga-pele, i nya ibe ya lụkọ i sensele. ⁸ I me gatime, si ga-yaba, si ga-ku-fene té. A kyẹ yi tọtọ gédẹ i vu banị bani ga zẹẹ nde lika ka yi vu wa utata. ⁹ I mẹ gatimẹ ka gédẹ a kpụ yi la té, nde a kpụ yi tsim. I mẹ gatimẹ ka gédẹ ya tsi té, nde pa kẹ i tsitsi ya gii kẹ yi té. I mẹ gatimẹ ka gédẹ a giyi liyẹ gebo ka i be mẹ i mẹ té, nde wa vu ga gédẹ a wuyi té la. ¹⁰ I mẹ gatimẹ, gunugba-gunugba, nde iye si yi. I mẹ gatimẹ ka gédẹ i vu ba ni litolotsi té, nde i gigi gi banị ni gedu nẹ nya gibe. I mẹ gatimẹ ka gédẹ ya nya gyengyẹ la té, nde ibe gwo yi. ¹¹ Banị ukonrintia, i gé ẹnẹ lika tii gbyi, ya wọ iye ye yi la. ¹² Yẹ zo ẹnẹ iye la, nde nyinẹ nyinẹ zo iye ya iwụ yẹ nẹ. ¹³ Kyekyemẹ ma gé lika nẹ nẹ nẹ kẹ bebiki-nyine a gimi iye nẹ. ¹⁴ Nyinẹ a ka gwo lika kẹnẹ ni ba ni mẹ n ba kpụ Uyesu nẹ la té. Ngyẹ i ya gwo ibemẹ uyi tii té nu ibe ivava nẹ? Ngyẹ i ya gwo gubi ni giwa nẹ? ¹⁵ Nya pa té, ngyẹ i ya bene banị ya Yesu nẹ udodé ni banị ya usetan nẹ? ¹⁶ Nya pa té, ngyẹ iya gigi gi guza ka aduwa ni gaki ne avu udọdẹ? Gụwụpa kẹ yi vu guza ka Usigapa, kanko mẹ Usigapa gédẹ "Ma'a dẹ niba nẹ, gi ma zu tuzu ni ba nẹ ma'a vu Usigapa wa ba, gi ba vu banị ya mi" ¹⁷ Gebo guyẹ té, Usigapa gédẹ "Nyine, e fu a ki ba, gi nyinẹ" a ba kọkọ "Nyinẹ aga da ibe ibibisa la, gi ma gu ẹnẹ. ¹⁸ Ma'a vu Ada, gi nyinẹ a vu beby'ni gegu ka mi"