¹ Keke me ulufu gee nu gedegede, gede utu wa ge bye te, bani diya ba nabo utumozi tii gi ba de aka yaba nu ulufu uzaza bani, ni ga tsene ka alzeni ne. ² Nu ami gatse ni aka itsuku yaba ne ya bye. ³ Bagye lika ko gavo game nu nbelili gagu mee usigapa mee tene gi nba za ni imoa nane nu gigye ka bani mee nba wulu ni bani mee nba kpu tii te. ⁴ Ibe mee ivu imeme yo usigapa te, ivu ibe isele. Ibe mee ivu imeme yo usigapa te, ivu ibe sele. Yavu igege la. ⁵ Nde ivu imeme tii nu lika ko usigapa nu ada ne nu upye ne. ⁶ Nde na gee bani aka mee navu befe sele ko uyesu ada. Gede agozu kpaye nu lika ko ubagasikiya se ga tsine usele gume nna bate. ⁷ Nde gye ipipili gee ya gase mee ivu iyeye ya byene kpukpu luku te, nde na gi iwu yegye nu gaba usigapa. ⁸ Gede iwu gigi liye yaliye gegyi, nde lutu ga gii nu usigapa uyeliye ni ibe gbii, uvo lika kana wo leyi wo keke mee se wo leyi mee uwa bete. ⁹ Ume lika uvu lika tii wo tsi gade agwa kele. ¹⁰ Nu gayi te te, iya mee gatimeka tsi gede yaba yapo nu usigapa uni liye uni gase bani gbii te, tutu bani mee awulu nane te. ¹¹ Guvu gi na tsene ibe mee. ¹² Ka wulu gii unide pye ututu nu utu mee nna like te la, nde nu gayi te, navu uni papa nu uwozo bani mee, nba vu bani gabi te, lika ga gee, iye, gaye, gawulu, gayi tsam. ¹³ Tse gi nma be de iwu ye gye nu ga gee ibeme wo ga tseni. ¹⁴ Ka vutuva nu gawa gume uyi nu woze gye te ne la, umee a gyi gede na paa ibe te, ni ibo mee batizu gee bee te. ¹⁵ keyapo paa ibe me de iwu ye gye moa gi ga gee gazu gee kene avu ube papa niyapo yo gungu. ¹⁶ Fulu ba iwu yegye ni ibe mee atseni te, sede mo agee nu game te na wa gase iwu yegye se bani mee awe te.