¹ Gebo gede Almasihu paliye nguwupa, nye du nya paliye. du un ume upaliye nguwupa wa nabo aka bibi gme. ² Nga yitete utu aba me uki, ngase gume te, bame ibeme nbani aka bibyi ame te la, nde bame ibeme Usigapa eye te. ³ Ngete gebo nyina me ibeme, nbanu me ba kpu Usigapa la te ame te abya li, ibeme kan ko, ibe imumunu geye, ukilaki game, bezegewu, gapya game, ni aka ya nboo game ne. ⁴ Uni damaba gede uyina maka ye kwede ni bane gala, nba ga aka ibibi yene. ⁵ Nde uzu ude te ge usigapa ni iwu yaba ne ubeme nba me te. Gebo gede na uwa kye ba iwa. ⁶ Gebo guye Uyesu me uwazi gii bani itsitsi du. Umete gebo gede Usigapa gwozi kye ba iwa tu ke ba yi nu ulai ne te be, gi ba yi nu Usigapa ne nu uluhu gbogbo age. ⁷ Gebye ka lika gbi atsutsu li. Gebo guye te nya nye iye usesele, nya gina moo iwu yenye ibo, ginya me Aduwa me igwo game te. ⁸ Ubeme upe gbi te, uvu gede, nyinea ye idika zwi, gebo gede geye efunene nu uzunubi. ⁹ Ka moo idiya ibo ni agbila gele ne la. ¹⁰ Tu ke gwogwo yene gwu ibe, nyina me lika agi idiya ni ya ne. Nyina mete gi nyina vu bani ibe ya Usigapa gamoo ibo sesele. ¹¹ Unume uge lika, usame ke lika ko Usigapa ge te. Unume ume usa yi ke ntsi ye ubeme Usigapa gaa te. nyina me Ibeme, gi ni ibe gbii Usigapa efu usu nu Uyesu Almasihu. Ye gwonene lika ko Usigapa ni ntsi yana ne gbogbo agee. Amin. ¹² Bani yami, nyine ke su liye gume nyina pa mete gede ube upupa etuena la, wa yene te kwukwa gede ube udadama etuene. ¹³ Nde nyina me nmuana, gebo gede nyina sa paliye uyili me Ualmasihu sipa te, gi ekime ube sele na efu esu te nyina gina me nmwana wa. ¹⁴ Akyene tutu gebo ka liye ko Almasihu, nyinea vu bani anabalika, gebo gede uluhi ubesele nu uluhu wo Usigapa ne yi nene ne. ¹⁵ Nde liye kene aka vu wa bani gawu, ko ibe geyi, ko uni aka itsuku game, ko aka gazwi la. ¹⁶ Nde nya meliye gebo gede nya vu uni Aduwa, nzize aka moo la, nde gode gede nya pa liye gebo ka liye ko Usigapa ¹⁷ Tuye iwa ga za atopo ni bani gam ko Usigapa ne. Utopo nyine pa, wa bani ne nba ba lika ko Usigapa la te, pa, wavu gede ngye? ¹⁸ Unume ukpu lika te una likya gapa ka bani ikpukpu Usigapa la, ni bani Uzunubi ne ayi guneyi? ¹⁹ Gebo guye te bani me nba paliye gebo ko Usigapa te, bani iye yaba agyi Usigapa me ume ba te, nba ginaa me lika usele.