1 I ri itue̱ke̱n isi Oise̱le̱bua do abo̱ lavba imio̱n, li vba nwun egbe vba ni Oise̱le̱bua vbi iuabo si elo̱ ri vbi agbo̱n, I o̱fuan, li Oise̱le̱bua gao obo̱ mie̱n. O̱na i khi ari e̱wain ga. 2 Vba e ke uemi bi eia isi o̱li agbo̱n na, ama chie̱n o̱lo̱ delegbe o̱ vbi udu lo̱gbo̱n luke mo̱e̱n. Uo̱ na lu re̱ e̱n o̱le̱ se̱n, la gaobo̱ mie̱n, lo̱ gbai. 4 Eri mai bun li mai re̱ ri vbi egbe o̱kpa, ama obia o̱kpa ki mamai ere̱me̱ o̱ bia. 5 Iyo̱ gbo o̱ khi mamai le bun li mai re̱ vbi egbe o̱kpa vbi Kristi, bi mamai o̱do̱de chie̱n o̱kpa vbi egbe si o̱zeva so̱i. 6 Mai mo̱n ohan o̱do̱dan elabi e̱seo̱he̱n la re̱ na mai. Oha isi o̱ia kha vbi ateta kpoto̱i, ai ro̱ i u elabi adiudu an so̱i se̱. 7 O̱ha si o̱ia kha vbi isi ugami, o̱i ya ga, o̱ia kha mo̱n o̱ha la re̱ vbie̱ emi, o̱i ya vbie̱ emi. 8 Ohan si o̱ia kha vbi ariakhaa, o̱i ya ria akhaa, ohan si o̱ia kha vbi isi o̱lo̱ ro vbi obo̱ re, o̱i ya gbudu uo̱i gbagba. ohan si o̱ia khi vbi isi o̱lo̱ ri agbo̱n shian, o̱i ya ri ifun e̱ngbere uo̱i. Ohan so̱ia kha vbi si o̱lo̱ mo̱n itue̱ke̱n, ai ya ri ijajegbe uo̱i. 9 Vbae zi ihume̱ke̱n vbi si ea. Vba si egbe le̱ vbi emi lo̱be, ai fi obo̱ nwin emi lo̱hunme̱n. 10 Re̱ yi ihume̱ke̱n isi imio̱n, mai mo̱n ato vbi egbe yi egbe. Re̱ yi ekpe̱n, mai mo̱n ekpe̱n yi egbe. 11 Re̱yi obia ubiami, vba e ya si egbe. Reyi si etin, mo̱n etin si alo̱ uemi. Reyi ugami si o̱lo̱mo̱e̱n. 12 Ya gho̱gho̱n o̱ vbi adiegbe an lu mo̱e̱n vbi ebi a nwun e̱o daa vbi sao. Mo̱n ozie̱n vbi egbe si okpokpo se̱. Ya lie ero̱mo̱n. 13 Mo̱ obo̱ o̱vbi emi ni elo̱mieho̱n o̱ hoo. Hoo ukpode̱ lo̱ bun lu lo̱ za ya ghaa ire. 14 Ri ihianba ni elo̱ khue̱ shan; e keo̱. 15 Kpa elo̱ gho̱gho̱n, gho̱gho̱n; de baa elo̱ vie̱ vie̱. 16 Vba mo̱n udu o̱kpa yi egbe. Vba e ya o emi vbi ukpode̱ si ikhua egbe re, ama vba ga obo̱ mie̱n eia si aguee. E chie̱n o̱ze̱ wain vbi aoo se̱e̱. 17 Eri o̱be ba o̱be li o̱ia o̱so. Ya ui o̱lo̱se̱n vbi e̱o si eia ere̱me̱n. 18 O̱kha ze̱ u, sai khi obo̱ se̱ lo̱ ri, e vbi o̱fure baa eia ere̱me̱n. 19 Ei e̱ oga le gbe̱, re he o̱vbo̱ li ibiohan si Oise̱le̱bua. Eri avio̱in khi, "I e̱n oga, me̱me̱ li mo̱ o̱in, I lo̱ de lo̱i hae, i yo̱ li O̱lo̱mo̱e̱n tai." 20 "Ama, ohanmi kha gbi o̱be se̱ re̱ nai e. Ohan ame̱ kha gbo̱i, re̱ nai o̱n. Ukha ui o̱na u hua igie̱n mi erain o̱ i vbi uhumi. 21 Ezi emi lo̱be kpokhumi vbi egbe se̱ ama ri o̱lo̱se̱n khuokho̱in si o̱be.