¹ Wowe̱ siyo̱ li ovbime̱n, utotomi vbi e̱seo̱he̱n lo̱ rivbi e̱ke̱in Jesu. ² Bi emi lu ho̱in tai vbi usee si o̱se̱e̱ lebun, nwuo̱in o̱ vbi obo̱ si eia lemo̱n aduduan le lo̱ meti gbo vbie̱ eia evbee. ³ Deba me̱n oya si okhuan khuan me̱n, ze̱n elabi egbe gbi ovbiokho̱in si Krist Jesu. ⁴ Aimi ovbiokho̱in lo̱ ga lo̱ chie mo̱n ue̱e̱n o̱vbe isi o̱lagbo̱n na lo̱ re̱o khu, lo̱ ire̱ chie̱n o̱lo̱ uemi lo̱ e̱nghi o̱lo̱ kpokhumi nai vbi obia. ⁵ Iyo̱ o̱ si o̱ia o̱ bi eia evbee yan sunmemi, akha fi erun si o̱kpokhumi o̱i vbi uhunmi so̱i re khan uhi le re̱ sunmemi. ⁶ O̱ e o̱vbo li o̱lime lo̱ meti bia kpao zavbi emi lo̱ ko̱i e. ⁷ O emi vbi eta me̱n, o̱li O̱lo̱mo̱e̱n, o̱lo̱ zi emi ere̱me̱n nwun we̱ e̱o kuere. ⁸ E e i Jesu Kristi, lo̱ za vbi uanmi si Idafvid dian re, la khuae sho̱ vbi use si ele uloi re. Ebi yai wewo̱i vbi ela lo̱se̱n me̱n. ⁹ Li ya o ya ni se̱ vbo̱ khi ari ighan gbalo̱ me̱n bo̱ o̱lo̱ uemi lo̱be. Ama, a kha meti gbali eta si Oise̱le̱bua. ¹⁰ O̱hio̱ si o̱na imio̱n ozie̱n yi elo̱ u kha ze̱i li ain kei mie̱n amiefan lo̱ ri vbi Kristi Jesu, bi o̱khai lo̱ ri vbo̱ re̱le̱ re̱le̱. ¹¹ Eta la lo̱ diudun an li kho̱na: "Mai kha uu de ba'a, mai lo̱ gbo gba u agbo̱n. ¹² Mai kha mo̱n ozie̱n, mai lo̱ gba de ba'a wee ayee. Mai kha sio̱n, o̱lo̱ gbo sin mai. ¹³ Mai kha faa egbe a, o̱ ya faa egbe a, okha meti sin egbe so̱i." ¹⁴ Ya ei ain eli emi na re. Hin uke̱ke̱ ni ain vbi isao si Oise̱le̱bua li yain o̱ ya roo o̱vbi e̱mo̱n eta li ain wee, Erimidi si o̱na, emo̱ de nwun emi o̱i evbo̱. Erimidi si o̱na, ikhueo rivbo̱ yi elo̱ daa eho̱n. ¹⁵ Uemi lu lo̱ e̱n toto bo̱ u, lu re̱ ri egbe vbie̱ Oise̱lebua, ze̱n elabi o̱lo̱bia la e̱n kho̱i mo̱n emi si ekho̱i, lo̱ vbie eta si ata o̱ vbi eko̱ ebo̱i de o̱. ¹⁶ Si egbe le̱ vbi eta vbia vbia, lo̱ totobo̱ si mai chie̱n ai e̱n Oise̱le̱bua. ¹⁷ Eta si ain lo̱ ve̱an bi e̱te̱ ore. Usee sian li khi Ihaime̱nus bi Ifiletus. ¹⁸ Ena ikhi imo̱nhe le fi ata do̱n, Yain khi a sho̱ vbi di re ra le̱ le. Ede li amieho̱n si eso. ¹⁹ O̱re̱ ri iyo̱, igbin loto̱i lo̱ ze zei si Oise̱le̱bua omuzain a vin o̱na o̱vbo̱ "O̱lo̱mo̱e̱n o̱ e̱n elo̱ vbi so̱i" bi o̱i khi o̱ia lo̱ su eni si O̱lo̱mo̱e̱n, o̱lo̱ sho̱ vbi ai en ulo̱se̱n re." ²⁰ Vbi iwe li efe ri, uko̱kemi si igolu bi isiliva uo̱kpa keri vba. Ukokemi si eran bi owe gbo ri vbo̱. Eso vbi ena a ri ain wee vbi emi lo̱se̱n, ari eso vbi ukpode̱ si iwuan. ²¹ O̱ia kha kho̱ egbo̱i fuan, a chie̱n ukokemi si e̱kpe̱n. A lo̱ vaan i o̱ vba yi o̱kpa, lo̱ chie̱n o̱lo̱ de wun emi li o̱li o̱ga, lo̱ e̱hin egbe khe̱ obia lo̱se̱n. ²² la ni emi li igbama o̱ za to. Ya khui emi lo̱ de o̱vbo̱, amieho̱n, ihume̱ke̱n lo̱i o̱fure udeba elo̱ echi O̱lo̱mo̱e̱n vbi e̱ke̱n udu lo̱ fun ain. ²³ Emo̱ obo̱ o̱ vbi amia si oruru bi ai en emi. Ebi ikhae run o̱shan vare li khi e ain. ²⁴ Ayi o̱ humi si O̱lo̱mo̱e̱n kha gbudu ya roo. O̱lo̱ ui o̱ia li ohoo yi eia ere̱me̱n, o̱lo̱ meti vbie̱ emi, bi o̱mo̱ ozie̱n. ²⁵ Vbe̱ ke̱ o̱ri egbo̱i chie̱n emi lo̱ lo̱ ya re̱ ri emi vbie̱ elo̱ i ta baai. Lai mie̱n khi Oise̱le̱bua zi ain mo̱n idelugu di oe̱n si o̱li ata. ²⁶ Elo̱ chie meti oe̱ ke̱n sho̱ vbi ifi si esun re, lo̱ kpao we ei ain.