^{1 2} 1 ಈ ಕಾರಣತಿಂಡು ಅನ್ಯ ಮಂದಿಯಾಯಿಕ್ರ ನಿಗ್ಲಿಂಡು ಯೇಸು ಕ್ರಿಸ್ತನ ಸೇರೆಯಾದುಯಾಯಿಕ್ರ ಪೌಲಯಿಗ್ರ ನಾನು 2 ನಿಗುಲ್ಕೊಸ್ಕರ ನಂಕು ತಂದ ದೌರ್ ತ ಕೃಪಯುಗತ್ತ ವಿಷಯತ್ಕುರು ನಿಂಗ ಕೊಟಿಕ್ರದಾನೇಕೆ. ^{3 4 5} 3 ಗುಪ್ತವಾಯಿಕ್ರತ ಆತ್ರ ಪ್ರಕತಣೆಯಿಂಡು ನಂಕು ಹೆಂಗು ತಿಳಿಸಿದುಯಿಗ್ರತ ನಾನು ನಿಂಗುಲ್ಕು ವರ್ಜೇನೋ: 4 (ವರ್ಜೆಕ್ರತ ನಿಂಗ ಓದಿ ಪತೇಕೆ ಕ್ರಿಸ್ತನ ವಿಷಯತ ನನ್ಕಿಕ್ರ ಗ್ರಹಿಕೆನ್ನ ನಿಂಗ ತಿಳಿಜ್ಗೊಬೋದು ) 5 ಆ ವಿಷಯ ಈ ಕಾಲತ್ಕುರು ದೌರ ಪರಿಶುದ್ದ ಅಪೋಸ್ತಲ ,ಪ್ರವಾದಿಲ್ಕು ಆತ್ಮನಿಂಡು ತಿಲಿಸಿಕ್ರಕಾನಿ ಬೇರೆ ಕಾಲತ್ಕುರು ಮನುಷ್ಯುರ್ಕು ತಿಳಿಸುಲ್ಲ . ^{6 7} 6 ಅದೆಂದಯಿಂಡೆಕೆ, ಅನ್ಯಜನರು (ಯೆಹುದ್ಯರೆಂಟಿ ) ಬಾದ್ಯರು ವಂಡೇ ವಡ್ಮಗ್ಯ ಸುವಾರ್ತೆಯಿಂಡು ಕ್ರಿಸ್ತನಿಂಡು ಆತ್ರ ವಾಗ್ದಾನತ್ಕುರು ಪಾಲುಗಾರರಗುರ್ಡುಯಿಂಡೇ. 7 ದೌರು ತಟ್ಟ ಶಕ್ತಿಯ ಪ್ರಯೋಗತ್ಕುರು ನಂಕು ಅನುಗ್ರಯಿಸಿಕ್ರ ಕೃಪಾನುಸಾರವಾಯಿ ನಾನು ಈ ಸುವಾರ್ತೆಕಿ ಸೇವಾಕನಾಯಿರೆ. ^{8 9} 8 ಕ್ರಿಸ್ತನ ಐಶ್ವರ್ಯ ವಿಷಯವಾಯಿ ಅನ್ಯ ಮಂದಿಲ್ಕಿ ನಾನು ಸಾರುರ್ಕಾನಿ ಪರಿಶುದ್ದಕುರು ಅತ್ಯಲ್ಪನಾನ ನಂಕು ಅನುಗ್ರಹವಾಸು . 9 ಆದಿನು ಯೇಸು ಕ್ರಿಸ್ತನ್ಕುರು ಸೃಷ್ಟಿಸಿಕ್ರ ದೊರ್ಕುರು ಲೋಕಾತಿಂಡು ಮರೆಯಾಯಿಂದ ವಿಷಯಾತ ಆನ್ಯೋನ್ನತೆ ಆದೆರ್ಕು ಕಂಗುರ್ಕಾನಿ ಸೈಯಿಕ್ರಕಾನಿ. ^{10 11} 10 ನಾನ ವಿದತ ದೌರ್ತ ಜ್ಞಾನ ಪರಲೋಕತ್ಕುರು ಇಪೋದು ರಾಜತ್ವತ್ಕು ಆದಿಕಾರಿಲ್ಕು ಸಬೇತಿಂಡು ಗೊತ್ತಗುರ್ಡುಯಿಂಡು ಆತಾತೆಯ ಉದ್ದೆಸಿಸಿದು. 11 ನಾಗ್ಟಾ ಕರ್ತನಾನ ಯೇಸುಕುರು ಅದು ಸಂಕಲ್ಪಿಸಿಕ್ರ ಶಾಶ್ವತವಾನ ಸಂಕಲ್ಪಕಾನಿ ಇದಾಸು. ^{12 13} 12 ಆತಿನ್ಡನ ನಂಬಿಕೆಯಿಂಡು ನಂಕು ದೈರ್ಯ ಭರವಾಸಸು. 13 ನಿಂಗಿಲಿಂಡು ವಂದ ಕಷ್ಟತ ವಿಷಯವಾಯಿ ನಿಂಗ ದೈರ್ಯಗೆಡಬಾರ್ದುಯಿಂಡು ನಾನು ಆಸೆಪಾಡರೆ.ಆದು ನಿಗ್ಟ ಗೌರವವಾಯಿದು. ^{14 15 16} 14 ಈ ಕಾರಣತಿಂಡು ನಾನು ನಾಗ್ಟ ಕರ್ತನಾನ ಯೇಸು ಕ್ರಿಸ್ತನ ಮುನ್ಕು ನಾಟ್ತ ಮೊಣಾಕಾಲುರಿ. 15 ಏ ಅವ್ವತ್ತ ಪೇರ್ನ ಪರಲೋಕತ್ಕುರು ಬ್ಹೊಲೋಕತ್ಕುರುಯಿಕ್ರ ಕುಟುಂಬನ ಅತ್ಗಕೋ, ಆ ಅವ್ವ. 16 ನಿಂಗುಲ್ಕು ತಟ್ಟ ಮಹಿಮೆ ಐಶ್ವರ್ಯಾಕ್ಕನುಸಾರವಾಯಿ ಆತ್ರ ಆತ್ಮನಿಂಡು ಅಂತರ್ಯಾತ್ಕುರು ವಿಶೇಷ ಬಲನ ಅನುಗ್ರಹಿಸಿಕ್ರಕಾನಿ. ^{17 18 19} 17 ಕ್ರಿಸ್ತನು ನಿಗ್ಟ ಹೃದಯಾತ್ಕುರು ನಂಬಿಕೆಯಿಂಡು ವಾಸಿಸುರ್ಕಾನಿ ನಿಂಗ ಪ್ರೀತಿಕುರು ನೆಲೆಗೊಂಡು . 18 ಪರಿಶುದ್ದರೆಂಟ್ಟಿ ಅತ್ರ ಉದ್ದ ಅಗಲ ಆಳ ಎತ್ತರನ ಗ್ರಹಿಸುರ್ಕಾನಿ 19 ಜ್ಞನಾತ್ಗು ಕ್ರಿಸ್ತನ ಪ್ರೀತೀನ ತಿಳಿಜ್ಗೊಂಡು ದೌರ್ತ ಸಂಪೂರ್ಣತ್ಗು ಪರಿಪೂರ್ಣ ವಾಯಿದುಯಿಂಡು ಆತಾತೆಯ ಬೇಡಿಗ್ಯರೆ. ^{20 21} 20ನಂಗುಲ್ಕುರು ಕಾರ್ಯ ಸಾದಿಸ್ರ ತಟ್ಟ ಶಕ್ತಿಯಾ ಪ್ರಕಾರ ನಂಗ ಬೆಡುಗುರ್ಕಿನ್ನ ಯೋಜಿಸುರ್ಕಿನ ಅತ್ಯದಿಕವಾನತ ಸೈಯಿರ್ಕು ಶಕ್ತನಾಯಿಕ್ರತಿಂಡು. 21 ಸಬೇತ್ಕುರು ಕ್ರಿಸ್ತ ಯೇಸುಯಿಂಡು ತಲಂತಲಾನ್ತರತ್ಕು ಮಹಿಮೆಯಾಗೊಟ್ಟು. ಆಮೇನ್.