¹ ಅನೇಕೆ ನೀನು, ತೀತನೆ, ಸ್ವಸ್ಥಬೋದನೆಕಿ ಸರಿಯಾಯಿ ಅದ್ದ್ನಳು ನಲ್ಲನಡತೆಯಿಂಡುನಡುಕ್ರುಕನಿ ಉಪದೇಶ ಸೇಯ್ಯಿ. ² ಏನಾಗು ಇಂಡಿಕೆ, ವೈಸಯಿಕ್ರರಂತಯ್ಯ,ಕರ್ತನ್ನಿ ಕುಡ್ಕಿರಾ ಅಭ್ಯಾಸ ಇಲ್ಲರಂತಗ್ಯ, ಗೌರವಯಿಕ್ರಗ್ಯ, ನಲ್ಲಮನ್ಸುಇಕ್ರಗ್ಯ, ನಂಬಿಕೆ ಪ್ರೀತಿ ತಾಳ್ಮೆ ಇಕುರ್ದು ಇಂಡು ಭೋದನೆ ಸೇಯ್ಯಿ . ³ ಅನ್ಗೆನೆ ವಯಿಸಯಿಕ್ರ ಪಂಬ್ಳಯಗ್ಯ ಸಾಡಿ ಸೋನರಂತಗ್ಯ ಕರತನ್ನಿ ಕುಡ್ಕಿರ್ಕು ಗುಲಮರಗ್ದೆ, ದೌರ್ ಭಕ್ತಿಕಿ ಯೋಗ್ಯವಯಿ ನಡ್ದುಗುರ್ದು. ⁴ ಇದಲ್ದೆ ವಯಿಸಯಿಕ್ರ ಪಂಬ್ಳಯಗ್ಯ, ಪರೇತ್ ಪಂಬ್ಳಯಲ್ಕಿ ಮಾದರಿಯಾಯಿ ತಂಗುಲತ್ ಮೂಲಕ ದೌರ್ತಾ ವಾಕ್ಯತ್ಗು ದೂಷಣೆ ಅಗರ್ಕನಿ ನಡ್ದುಗುರ್ಕನಿ ಕೆಪ್ಪಿಕಿರ್ದು, ಪರೇತ್ ಪಂಬ್ಳಯಾ ಮನಗೂ ಮಕ್ಕಿಲೆತ್ತೆಯಿ ಪ್ರೀತಿ ಸೇಯಿರಂತಲೂ ಬುದ್ದಿ ಇಕಿರಂತಯಲೂ ಪತಿವರ್ತಿಗಯೀ ⁵ ತಟು ಉಟ್ಗಯಿ ಪನಿ ಸೇಯ್ಯಿರಂತಯಲೂ ನಲ್ಲಯಿಲೂ ಆಯಿ, ಅಯಿಲ್ತ ಮನಗುಮರ್ಲುಕು ವಿಧೇಯರಾಯಿ ನಡ್ದುಗುರ್ದುಯಿಂಡು ಬುದ್ದಿ ಸೊನ್ನುರುದಿಂಡು ವಯಿಸಯಿಕ್ರ ಪಂಬ್ಳಯಳ್ಕಿ ಬೊದ್ನೆ ಸೇಯ್ಯಿ. ⁶ ಅನ್ಗೆನೆ ಯೌವನಾಸ್ಥರು ಆದ್ದಿವಿಷಯತ್ಕೊರು ಸ್ವಸ್ಥಚಿತ್ತಾರಗುರ್ದುಯಿಂಡು ಅಲ್ಕಿ ಎಚ್ಚರ್ ಸೇಯ್ಯಿ. ⁷ ನಲ್ಲಕಾರ್ಯ ಸೇಯಿರತ್ಕೊರು ನೀನೆ ಮಾದರಿಯಾಯಿ ಇರು, ನೀನು ಸೇಯಿರ ಉಪದೇಶತ್ಕೊರು ಸತ್ಯತಿಂಡು ಗೌರವತಿಂಡು ನಿಂದಿಸುರ್ಕು ಅವಕಾಶ ಇಲಾರ್ಕನಿ ಸ್ವಂತ ಬುದ್ದಿ ಇಕುರ್ದು. ⁸ ಅಪ್ಪೋದು ನಂಬುರ್ಕು ಎದುರಾಳಿಅಯಿಕ್ರಗ್ಯ ನಂಬುರ್ತು ವಿಷಯತ್ಕೊರು ಕೊಟ್ಯಾತ ಯಂತು ಸೋನ್ನುರುಕು ಅವಕಾಶಯಿಲ್ದೆ ನಾಚಿಗ್ಯನು. ⁹ ಸೇವಾಕರು ತಂಗ್ಟ ಯಾಜಮಾನಾನ್ಕು ವಿದೇಯಾರಯಿಂದು ಅಯಿಲತೆಯ್ಯಿ ಮೆಚ್ಚುಸುರ್ಕ ಪ್ರಯತ್ನ ಸೇಯಿತ. ¹⁰ ಪದ್ದ್ ರೀಗಿ ವಾಸೆತದೇ, ಯಂತು ಪೆಟಿ ಅಚ್ಗಾದೇ, ನಂಬಿಗಸ್ತರಿಂಡು ಪೇರ್ ಪಡಿರ್ಕು, ನಂಗ್ಟ ರಕ್ಷಕನಾಯಿಕ್ರ ದೌರ್ತ ಉಪದೆಶತ್ಗು, ಆದ್ದಿ ವಿಷಯತ್ಕುರು ಸಿದ್ದವಾಗುರ್ದುಯಿಂಡು ಉಪದೇಶ ಸೇಯ್ಯಿ. ¹¹ ಯೆಂತಿಗಿಂಡೆಕೆ ಅದ್ದಿ ಮನುಷ್ಯರ್ಕು ರಕ್ಷಣೆ ಸೈರ ದೌರ್ತ ಕೃಪೆ ಪ್ರತ್ಯಕ್ಷವಾಸು. ¹² ಅದು ಭಕ್ತಿ ಇಲ್ಲರಂತದೂ ಲೋಕತ ಆಸೇಲತೇಯಿ ಉಟೊಟ್ಟು ಭಾಗ್ಯಕರವಯಿಕ್ರಂತ ನಿರೀಕ್ಷೆತ್ತೆತ್ತೆಯಿ. ¹³ ಇಂಡೆಕೆ ಮಹಾನ್ ದವ್ರು ಮತ್ತೆ ನಂಬ್ರುತಾ ರಕ್ಷನಯಿಕ್ಕಿರ ಯೇಸುಕ್ರಿಸ್ತನತ ಮಹಿಮೆಪೂರ್ಣವಯಿಕ್ಕಿರಂಥ ಪ್ರತ್ಯಕ್ಷ ತ್ತೆಯಿ ಎದುರುಪಕತಾ ಇಹಲೋಕತ್ಕೊರು ಸ್ವಸ್ಥಚಿತ್ತರಯ್ಯಿನೂ ನಿತಿವಂತರಯ್ಯಿನು ಭಕ್ತಿಯಿಂಡು ಜೀವಿಸುರುದು ಇಂಡು ನಂಬುರುಕು ಭೋದನೆ ಸೇಯ್ಯದು. ¹⁴ ಆತನು ನಂಗಲಾತ್ತೆಯ್ಯಿ ಸೈತನನತ ಕೊಟ್ಟಿ ಚಟಲಿಂಡು ವಿಮೋಚುಸುರ್ಕು ನಲ್ಲಕಾರ್ಯಲ್ಕೊರು, ಅಸಕ್ತರಯಿಕ್ಕಿರಂಥ ಸ್ವಂತ ಜನರತ್ತೆಯಿ, ತನಕಯಿ ಬೇರ್ಪಡಿಸಿಗೊಂಡು ಪರಿಸುದ್ದು ಸೇಯ್ಯಿರ್ಕಯಿ, ತನ್ನತ್ತೆಯಿ ಒಪ್ಪಿಸಿ ಕುಡ್ಚು. ¹⁵ ಈ ಕಾರ್ಯತ ವಿಷಯತ್ಕೊರು ಭೋದನೆಸೇಯಿತ ಎಚ್ಚರ್ಸ್ತಾ ಪೂರ್ಣಅದಿಕಾರತಿಂಡು ಖಂಡಿಸ್ತ ಇರು. ಎದು ನೀನ್ನ ತಿರಸ್ಕಾರ ಸೇಯ್ಯರಕನಿ ಪತ್ಗೋ .