¹ ದೌವರ್ತಾ ಸೇವೆಸೈರದು ಯೇಸು ಕ್ರಿಸ್ತನು ಅಪೋಸ್ತಲನು ಅಯಿಕ್ರ ಪೌಲನು ನಂಬ್ರುಕದ್ದಿ ನಂಬಿಕೆತ್ಕೊರು ಕರ ಮೌವ್ವು ನಯಿಕ್ರ ತೀತನ್ಕು ವರಿರ ಕಾಗ್ದ. ² ಅವಯಿಕ್ರ ದೌರಿಂಡು ನಂಬ್ರುತ ರಕ್ಷಕನಾಯಿಕ್ರ ಯೇಸು ಕ್ರಿಸ್ತನಿಂಡು ಕೃಪೇನು ಕರುಣೆನೇನು ಶಾಂತಿನು ಅಗೊಟು. ³ ಸುಳ್ಳು ಸೋನದೆ ಇಕ್ರ ದೌರು ಅನಾದಿಕಾಲತ್ಕೊರೆ ವಾಗ್ದಾನ ಸೇಂದ ನಿತ್ಯ ಜೀವತ ನಿರೀಕ್ಷೆಯತ್ತೆಯಿ ತಾನು ಪರ್ ಕೊಂಡಿಕ್ರ ನಂಬಿಕೆಯೇತ್ತೆಯಿ ಮತ್ತೆ ದೌರ್ ಭಕ್ತಿಯತ್ತೇಯಿ ಸತ್ಯಾತ ಜ್ಞಾನತ್ಕೂರು ನಾನು ಪನಿ ಸೆಯಾರೆ. ⁴ ಸುವಾರ್ತೆ ಸರ್ ರಾ ಜವಾಬ್ದಾರಿನ ನಂಬರ್ತಾ ರಕ್ಷಕ ನಾಯಿಕ್ರ ದವ್ರುತಾ ಆಜ್ಞೆ ಅನುಸರವಾಯಿ ನನ್ಕು ತಂದಿದು. ಅನಗೂ ನಲ್ಲ ಸಮಯತ್ಕುರು ಸುವಾರ್ತೆ ಸೋನ್ನೂರ ಮೂಲಕ ತಟ ವಾಕ್ಯಾತ ನನ್ಕು ಪ್ರಕಟ ಸೆಂದಿದು. ⁵ ಕೇತ್ರದ್ವೀಪತ್ಕೊರು ಇನ್ನೂ ಕ್ರಮತ್ಕು ವರದೇ ಇಕ್ಕಿರ ಕಾರ್ಯಲತ್ತೆಯಿ ಸರಿ ಸೈಯಿರ್ಕು ಊರು ಊರುಕೋರು ಇಕ್ರ ಬೇರಾಯಿಲಾ ನೇಮಿಸುರ್ದು ಯಿಂಡು ನಾನು ನಿಂಗಲೂಕು ಅಪ್ಪಣೆ ತಂದ. ಕಾರಣತಿಂಡು ನಿನ್ನತೆಯಿ ಆಟೇ ಉಟೋಟು ವಂದೇ . ⁶ ಸಭೇತ ಬೇರ್ ಮಣುಸು ನಿಂದರಹಿತನು ಒಂಡೆ ಪಂಡು ಇಕ್ರದು, ಅಯಿಕಿರ್ದು ಅಲ್ಥ ಮಕ್ಕಿಗ್ಯ ನಂಬಿಕೆಗನುಸಾರವಾಯಿ ಇಕುರ್ದು; ಆಗ್ಯ ದುರ್ಮಾರ್ಗತಗ್ಯ ಅಯಿಕುರ್ದಂಚು. ⁷ ಯಂತುಗಿಂಡಿಕೆ ಸಭಾದ್ಯಾಕ್ಷನು ದೌರ್ತ ಉಟ್ತಾ ಜವಬ್ದಾರಿ ಇಕ್ಕಿರಂತಂದು ಅಯಿಕ್ರತಿಂಡು, ಅದು ಸಭೆತ್ಕೊರು ಸ್ವಂತ ಆಲೋಚನೆಯಿಂಡು ನಡ್ಕಾರದು, ದೋಷ ಇಲಾರಂತಾದು; ಅದು ಹೆಸರ್ ಸೇಯಿರಾದು, ಕರ್ತನ್ನಿ ಕುಡಿಕ್ರದು ಲಡಾಯಿ ಸೇಯಿರಾದು ಶನ ಲಭತಾ ಬಯಸರಂತದು ಅಯಿಕ್ಕಿರದಲ್ಲ. ⁸ ಅತಿಥಿಸಾತ್ಕಾರ ಸೇಯಿರಾದು ನಲ್ಲತ್ತ ಪ್ರೀತಿ ಸೇಯಿರಾದು, ವಿವೇಕಿಯೂ ನ್ಯಾಯವಂತನು ಪರಿಶುದ್ದನು, ದೌರುತಾ ಭಕ್ತನು ನಲ್ಲತ ತಿಳ್ಜ್ ಕೊಂಡಿಕ್ರದು ಆಯಿಂದು. ⁹ ತಾನು ಸ್ವಸ್ಥ ಬೋದನೆಯಿಂಡು ಎಚ್ಚರಿಕೆ ಸೇಯಿರುಕೂ, ಸುವರ್ತಾವಿರೋದಿಲತಾ ವಯಿ ಕಟ್ಟುರುಕು, ಶಕ್ತನಾಯಿಕ್ರಕಾನಿ ಕ್ರಿಸ್ತನತಾಉಪದೇಶತ್ಗು ಅನುಸರವಾಯ್ಯಿ ವಿಶ್ವಾಸತ ವಾಕ್ಯನ ದೃಡವಾಯಿ ಪುಡ್ಸುಗುರ್ದು. ¹⁰ ಅಯಿಲಿಕೊರು ಮುಖ್ಯಾವಾಯಿ ಸುನ್ನತಿ ಅಯೀಕ್ರಗ್ಯ ಅಧಿಕಾರತ್ಗು ಒಳಪಡದೆ ಇಕ್ಕಿರಾಯ್ಯ, ಪನಿಕಿ ವರಾರಂತ ಸಲುತ್ತೆಯಿ ವಸೆತ್ತುರಾಂತಯ್ಯ, ಮೋಸ ಸೇಯ್ಯಿರಯ್ಯ ಅಯಿನು. ¹¹ ಆಗ್ಯ ಶನಲಾಭ ಸೇಯ್ಯಿರಕ್ಕಾಯಿ ಸೇಯ್ಯಿಮನದಯಿ ಇಕ್ಕಿರಂತ ಉಪದೇಶನ ಸೆಂದು, ಕುಟುಂಬತೇ ಹಳ್ ಸೈರಾಗ್ಯ ಅಲ್ಟ ವಾಯತ್ತೆಯಿ ಮುಚ್ಚುಸಬೇಕಾಯಿದು. ¹² ಕ್ರೇತದ್ವೀಪತಯ್ಯ, ಯೋಪ್ಪೋತ್ತಿಗು ಸುಳ್ಳುಗಾರರು ದುಷ್ಟಮೃಗತಗ್ಯ ಸೊಂಬೇರಿಗ್ಯ ವರಗುಮೆತ್ತಡಸಗ್ರಯ್ಯಲೂ ಆಯ್ಯಿನಿಂಡು, ಅಯಿಲತಾ ಸ್ವಂತ ಪ್ರವಾದಿಲ್ಕುರು ಒಂಡು ಸೋನ್ನಿದು. ¹³ ಈ ಸಾಕ್ಷಿ ಕರನೇ ಅಯಿದು, ಅನ್ಗಾಯಿ ಅಯಿಗ್ಯ ಯೆಹೂದ್ಯರ್ಲ್ತ ಕಟ್ಟು ಕಥಿಲ್ಕು ಸುಳ್ಳು ಸೊನ್ನುರಂತ ಮಣುಸುರ್ತ ವಿಧಿಲ್ಕಿನೂ ಲಕ್ಷ್ಯ ಕುಡ್ಕಾದೆ. ¹⁴ ನಂಬಿತ್ಕೊರು ಸ್ವಸ್ಥಚಿತ್ತರಯ್ಯಿ ಇಕ್ಕಿರ್ಕನಿ ಅಯಿಲತ್ತೆಯಿ ಕಠಿಣವಾಯಿ ಖಂಡ್ಸಿ ತಿಳ್ಸು. ¹⁵ ಶುದ್ದರ್ಕು ಅದ್ದಿನು ಶುದ್ದಿನೆ; ಆನೆಕೆ ನಂಬಿಕೆಯಿಳರಲ್ಕಿ ಎದು ಶುದ್ದಲ್ಲ; ಅನೇಕೆ ಆಲ್ಟ ಬುದ್ದಿನು ಯೋಚನೆಗ್ಯ ವಲಸಾಯನು. ¹⁶ ಆಗ್ಯ ತಂಗ ದವರುತ್ತೆಯಿ ತಿಲ್ಜುಗೊಂಡಿರೋ ಇಂಡು ಸೋನಿಗ್ಯಕ್ನು; ಆನೇಕೆ ಆಗ್ಯ ಆಸಹ್ಯವಾಯಿಕ್ಕಿರಂಥ ಕಾರ್ಯಲಾ ಸೇಯಿರಂತಯ್ಯ, ದವುರುಕು ಅವಿದೇಯಾರು ಸತ್ಕಾರ್ಯತ್ಗು ಭ್ರಷ್ಟರು ಆಯಿಕ್ರತಿಂಡು ದೌರುತ್ತೆಯಿ ತಂಗುಲಾತ ಕಾರ್ಯಲಾತಿಂಡೆ ಅಲ್ಲಗಳಿಯನು.