1 Paulo, lagiamani ho Najyok cebu ora ahejifiteni ho Yesu kristo, nihihuhumahinere nahiruk niho lati hula onyumu Najyok cebu nihihuhumahinere nolofero na ofwe ho nemanyita ho Najyok, 2 niho nahiruk ho nahisu na osio jik na isiarahi Najyok la obu ogesem, ongat ngete many berien hobengi nengaji fad. 3 Niholong na otirahi, ihwanahi ngete natianya hongete ahitetelehiso to natianya ho ngete na iramahi ngete niho ne ojo ongida ne esiarahi to ho owahitari Najyok lahetalahani hojie. 4 Niho Tito, lahito la otirahi niho nahiruk hojie. Nangidari, namehino, ho nayomo niho Najyok Lamonye, cebu niho Yesu kristo letalahani hojie. 5 Tanya tianya edahine ite Krete, ojo ongida ite ituhohisi nareji hunofa hobu otuhohini, itofwotu lolohitwaha nihangite huja eramahi ne ite. 6 Ongida lolohitwahajik obe obwon hana namoro, habila nangorite abito, lemusk hula itiyire ho hula obu itarahi aharahojang kuya hula obu itiyire. 7 Osiriwu lahatialani ho kelesia, toho ahatialatni ho haji ho Najyok, ongida itwongo obe namoro, Ongida obu igogworita ngete kuya hula obu ititihite,hula obu ilolongojita,hula obu omate nabalu,ikie obu ilolongojite kuya lahehawurani. 8 Nyuo hati, ikie ngete, ora amorite ho reji huja ongidari. ongida ngete ojien higigilo, la opit, la obayang Najyok, la otun nakwan. 9 Ongida ngete inef angida natianya hechihita, ojo ongida ngete otum itogolo tene hitejiana nihiramahinere nainge na ongida cebu irianga lati hula idayari nahiram hongete. 10 Olwaji lati hula hula isitaji, bebe hula ongote. Obu nahiramita hosing ongidari. Itonwange cebu iyaritie lati tenehoi noroho. 11 Ongida ite itobwajata sing. Itejiane sing nareji huja obu otum sing itejiane nihorihinere narobia ho nahipalariso nekati fad. 12 Lobo nihosing, lahagunyani hosing, ho najiman," lati ho Krete ogesemita noholongi fad, laharohojak cebu itabayenge,lahalanak ho hotwasi." 13 Otirahi anya tianya, iramahi nihosing tanagolon ojo ongida sing obwoni ho nahiruk. 14 Hetiminingasi noholong hote nihitiyirari nadohoji ho Yahud hula idayari natarihe. 15 Niho hula onyilaji, onyilaji nareji fad nihosing, nyuo hati niho lati hula iboti cebu obu iruhi, obe ibwo nasinge onyila nihosing. Ilanya nihosing, dobu nohosi hosing cebu nahigigilita hosing epalare. 16 Owahi sing ijianan Najyok, nyuo hati nasinge na igiama sing ititihite sing nihongete. Obu sing iruhi cebu obu obayangi, cebu obwoni ahula obu otumi nihigiama na ongida.