¹ To ho ohitingidarariti ijie to nahiruk, ohibwon ijie ho nayomo niho Najyok to Hobu hojie Yesu Kristo. ² Tongete ohibuon cebu jie ho nehoi to nahiruk niho anya mehino na ohibotiari jie. Ohikwama jie niho nagolon na ohisiarahi ijie Najyok no ho namoyi, nagolon na ohihoro hadi jie nibolori ho Najyok. ³ Obu lora anya hama, cebu ohikwama niho nahitegemita hojie. Ohijien iji ojo iyeno nahitegemita nadihan. ⁴ Nadihan iyeno nahisiarahiso, nahisiarahiso iyeno nagolon noho namoyi. ⁵ Obu anya golon iyeno nahilongojita, to nanyuo, ejuhohini nakwama ho Najyok natajio hojie to Nolohailong-Na-Onyila, lofa isieri niho jie. ⁶ Lofa ho hiniame jie, noholong na oyeyejiere Kristo to lati hula obe iruhi. ⁷ Hebe lobo latwani otum oye to lahangidarani. Ngete naja,kuya haye latwani to latwani la ongida. ⁸ Nyuo hati etelihi Najyok nangidari ho ngete niho jie,lofa hohira ijie ahepalak, oye Kristo to jie. ⁹ Na obolo bebe, tahanya ahitinyilaji ijie to nohoto ho ngete, ohitalahino hadi ijie to hilongojita ho Najyok. ¹⁰ Kuya, lofa hohira ijie amerok, ahitoyomohini fa ijie ho Najyok to nayeyi heha langete, nobolo bebe, laholong nahitoyomohini ijie, ohitalahino hadi to nahisu ho ngete. ¹¹ Obu ce tanya hama, ohikwama cebu ijie niho Najyok to Lohobu hojie Yesu Kristo, la ohisiarahi ijie ohihorihi anya iyomo. ¹² To ho iruu nepal nifok to latwani abito, olotu cebu nayeyi to nepal. Nayeyi ho nahisarahiso niho lati fad, to nanya epalari lati fad. ¹³ Many niholongi hechihita, abwoni fa nepalita nifok,nyuo hati obu ikiane nepalita na be nechihit. ¹⁴ Ilany fa nayeyi many to holong hobo Adam many niholong ho Muse, dobu niho lati hula obu ipalari to ho bo Adam, lofa ora ahetelehitani niho ngete lofa olotiniso. ¹⁵ Nyuo hati neyalita noho arus obu ora toho nepal. Nara to nepal hotwani abito lati oyeyi olwaji, baya hati namehino ho Najyok ho neyalita ho mehino ho twani abito, Yesu Kristo, italahu olwaji. ¹⁶ Obu neyalita okialare ho nahitokwami ho latwani la ipalaya. Olotu nangoto ho Najyok to nepal hotwani abito. Neyalita ho hitalahino olotu nehalu hepalita huja olwaji. ¹⁷ Nara to nepal hotuani abito ilany nayeyi, baya hati hadi lati hula ohurihini neyalita na obolo cebu neyalita hongidari ilanyini to nahisu ho twani,Yesu Kristo. ¹⁸ To nepal ho twani abito epalari lati fad cebu to nahigiama na ongida loho twani abito etalahini lati fad. ¹⁹ To nepal ho twani abito, etarahi fa lati fad ahepalak, cebu to nahiruk ho twani abito, etarahi fa lati olwaji ahepalak, cebu to ngidari ho twani abito, ofwoni ba itarak lati hula olwaji ahangidarak. ²⁰ Nyuo hati olotu nechihit ojo ongida nepalita obengi. Nyuo hati nepal ihwanahino, namehino alotu ihwanahino bebe. ²¹ Idwong anya ojo ongida nomo nelanya nepalita niyeyi, ongida cebu namehino ilany to nangidari noho nahisu niho Yesu Kristo Lohobu ho jie.