¹ Inaha, obute ibwanata ho nanenengita, iji latwani, iji la ingoto, nasinge na ingot ji litwani ongotohino nikwan hoji. Iji la ongoto igiama ji huja reji. ² Ohijien ijie ojo nangoto ho Najyok obwon to natarihe nomo nahuyarahino nihe hule igiame huja reji. ³ Ihwanahisi anya,iji latwani, iji la ingoto lati hula igiama hunya reji dobu igiama iji huja reji. Iluyi hadi ji niho nangoto ho Najyok? ⁴ Kuya igigiloji na omuta to nebarita ho ngidari ho ngete, nihilongojita ho ngete na olotiniso kaikai cebu ho nariajan ho ngete? Ijien iji ojo nangidari ihuanahini ongida ihi yaru iji nihiwaha? ⁵ Nyuo hati ora to nagolon ho taji hoji ho nataji na obe iruk nepal ngete na litunahiji narohoji niholong ho rohoji, ngete, noholong ho hitelehiso napitan ho ngoto ho Najyok. ⁶ Odumahi hadi ngete lati abito abito to negemita hosing: ⁷ niho ehule iwasihini, nahigemita huja ongidari otum itokwate, obayangi, obe ohoholi, isiarahi ngete nahisu na iwasihi jik. ⁸ Niho hula okwame nakwanite hosing, hula obu obayangi natarihe nyo hati obayangi nemanyita huja orohoji, olotu hadi nahilongojita ho Najyok. ⁹ Iyeno hadi Najyok narohoji cebu nahihuyasu niho latuani la igiama nareji huja orohoji, ochif to Yahud ho naloten niho Grik. ¹⁰ Nakwatan ho nabayangi cebu nayomo olotu hadi niho latwani la igiama nareji huja ongidari, niho Yahud ichak ho naloten niho Grik. ¹¹ Obe nahigegiala niho Najyok. ¹² Lati lalohoi hula ipalari obe nechihit oyeyi hadi obe nechihit, lati lalohoi hula oyeyi to nechihit, ongoti hadi sing to nechihit. ¹³ Obu lora lahetiyirak hichihita hula ongidari nihatemeni ho Najyok nyuo hati lati hula igiama nechihita sing hadi itipitahini. ¹⁴ Negiame paganoji hula obe ojieni nichihita, igiame to nohosi hosing nareji hechihita, otelehi ojo orahi sing echihita nikwanite hosing, dobu obu sing obwoni ho nechihita. ¹⁵ To nahigiama hosing itelehi najiman ojo nahigemita huja owahi nechihita igierehini nitajio hosing. Negigilita hosing orahi ahapiahak nihosing, cebu nahigigilita hosing kuya idwobi kuya isisio sing nikwanite hosing ¹⁶ cebu niho Najyok. olotu hadi anya iduong niholong na ongotere Najyok natenyita ho lati huja idimare, to nabuk ho ne, niho Yesu Kristo. ¹⁷ To ho nomo hengele ji nakwan hoji aloho Yahud, la iruk nichihita, ikwama niho Najyok, ¹⁸ ijien newahita ho ngete, imang nareji huja obuoni ha ma niho ngete, na ohiramahi iji nechihit. ¹⁹ Cebu to ho nomo ibwon ji ho nagolon ojo iji to nakwan hoji iji reji sharihiteni ho lahangodoni, nafangan niho hula obwoni nidimele, ²⁰ la irianga lati hula odatare, lahetejianani ho ledoleji cebu ibwon nichita niho nagianyan ho tarihe. ²¹ Iji tinya, la itejiana lobo, ibe ji itejiana nakwan hoji? Iji la itotoso nabiangan hoholiso, ihoholiso ji? ²² Iji la ijo hegeterete nangorwo ho lati, igetereji nguru twani? Iji la idaya nakialare, irujuto ji nitempulo? ²³ Iji la ikwama ho napufa nichihita nichihita, ha tum iji itolongojita Najyok to nahipapala hoji nechihita?" ²⁴ Obu obayangi nechihita ho Najyok nihiji ho paganoji to te, "To ho nofa igierehinerete. ²⁵ Olwak nahiruk iji nomo nejifito ji nechihita, nyuo hati nebe ji ijifito nechihita nahiruk hoji obu ora ahiruk. ²⁶ Nefifito latwani la obu iruk nechihita, habe nabiangan ho ngete nahiruk isiari ngete itarahi aheruhoni? ²⁷ Obe lora hula obe iruhi longote nahiramita hote, lobo nejifito ngete nechihita? Nyuo ibwanatate ho nabuk na igieri cebu iruhoto irahata hati ahepapalak hechihita! ²⁸ Obu ngete ora lo ho Yahud la onyila teger; kuya nahiruk na obwon to todo nikwan. ²⁹ Nyuo hati ora ngete aloho Jew la onyila to hotwa, cebu nahiruk no nitaji, niho nolohailong,obu nahigierita. Nakwatan hele twani olotu obu niho lati ati nih; Najyok.