Nengat 1

1 Paulo, Lahegiamani ho Yesu Kristo, ongeleni ahetenjianani, onyumuni ninger to Nabuk ho Najyok. 2 Ngete anya nabuk Lofa ochihahi ngete berien to laheramahitak ho hiramita Nibuk Na onyila. 3 Otianya to lonyi, la oyisini te kat ho Davide to nakwan. 4 Tohibuhuniso ho lahayeyak, iramahini fa ngete Eha Najyok la ogolon to Nohailong ho lahanyilajani-Yesu Kristo Lohobu hojie. 5 To ngete ahihorihi jie namehino ho nahitejiana ho riajian ho hiruk to hangite fad, to nafure ho ngete. 6 Niho huja hangite ahingeleni cebu ite irahata aloho Yesu Kristo. 7 Ora anya waranga aloho lati hula obwoni Roma. Ikie namehino obwon nihote, ho nayomo niho Najyok Monye hojie cebu Lohobu Yesu Kristo. 8 Echak ne jiman awa niho Najyok ho ne to Yesu Kristo to te fad, nyuo otianya nahiruk hote nifok fad. 9 Ora Najyok ahenufani ho ne, la egiama ne to ngete nilohailong nibuk he halangete to nahiramahite ho ne ite tihitik. 10 Amojito ne tihitik nihifiasere ojo ongida ne ahoriho nehoi nilotinere to ho da hote to nawahan ho Najyok. 11 Egeria ne natialan ite, ojo ongida ne esiarahi nihote neyalita ho lohailong na olo isiarahiso ite igoloto. 12 Ngete naja na etalisu ne nihituhuhusahinere ne nihiji hote, to nahiruk hote abito abito ho noho ne. 13 Obu ne awak ite ibwanata na ibe ijianata, hilasira, ojo, awahita ne ilotinita da nyuo hati obwoni nahititihita ho tahanya. Awak ne anya ojo ongida ahorihi hinihe nitenyita to hiji hote ho tehiji ho paganoji. 14 Ara ne abongijoni niho Grik ho niho lahatomonok, niho laheleferojok ho niho lahadatajok. 15 To ho niho ne, ehuhumahino ne nihitokwatari nabuk nihote hula ibwanate Roma. 16 Abu ne eliriri to nabuk, ora agolon ho Najyok noho nahitalahino niho latwani la iruk, Yahud latiemi ijifahinerete Grik. 17 Niho nangidari ho Najyok esieri tohiruk niho nahiruk, to ho igierehini ojo, "Omanya hadi lahangidarani to nahirk." 18 Odok hadi nahilongojita ho Najyok niho lati hula obu iruhi ho hula iboti, to nabiangan hosing nyilaji abu sing ohorihini natarihe. 19 Tanayuo nasinge na ojieni to Najyok oleyo nihosing. Eramahi Najyok sing. 20 Nehoiha ho ngete huja obe oleyeji many to lobenere ho fok. Ojieni sing to nareji huja obieni. Orahi hunya ihoiha ho ngete agolon na osio jik cebu ora na olotu to hide. To nanya, obe hule ati obwoni hebwo nanenengita. 21 Nyuo, dobu ojieni sing Najyok, obu sing ito kwate ngete Najyok, kuya isieri sing ngete nawa. Obwoni sing a lati hula odatare nihigigilita hosing, cebu natajio hosing huja obu igigile angida ho natajio hosing etorwohi. 22 Itohuhuse sing na jianan,nyuo hati odatare. 23 Itekialarahini sing nakwatan ho Najyok na obe omudang ho latwani la omudang, nakeny, natiangi huja orahi nahejiaha ongon, ho nareji huja oriate. 24 Inaha, isiarahi Najyok sing to nawahan ho tajio hosing niho nahibot, nakwanite hosing ihoni na orohojaya nihiji ho lati. 25 Sing lotobi natarihe ho Najyok to nagesemi, cebu omoje, igiame niho nareji huja obieni ilany niho lahabiani, ngete otum itokwate tihitk. Amen 26 Isiarahi Najyok sing niho lati hula obu obwoni ho natarihe, isiarahite sing nahigiama hosing niho narji huja obu ofwoni niho Najyok. 27 Edahini cebu laliawa nahigiama hosing ninangorwo hosing ho nawahan hosing. Laliawa hula iho ne niho laliawa nasinge na obu otumohino, hula ohorihini nikwanite hosing nahitegiama no fa isieri niho lati hula iduharite natarihe. 28 To nabiangan hosing hisiarahiso najianan Najyok, ngete ho nahisiarahiso sing niho natula na obu ongida, nareji huja obu ongidari. 29 Ifuti sing ho nibot,nimomol, nawahita, ho nahoholiso. Obwoni sing ho nahayini, nahifadarita, nagesemi, ho nigigilita huja orohoji. 30 Itwonge sing ahabuangak, ahepapalak, lawaliwak ho Najyok. Orahi sing ahangalak, ahayiferok, lahapufak. Itwonge sing ahehumak ho reji huja orohoji, obu obayangi monye ho hotienge hosing. 31 Obu sing ojieni; obu sing ongidari, obu obwoni ho nangidari cebu obe namehino obuon nihosing. 32 Ojieni sing nichihita ho Najyok, lati hula igieme ehue reji otum sing ifadari.Obu ce sing igiama ehwe reji, isiarahite cebu sing hilihe hula igiama sing.