¹ Tiye anjelo noho miyet ho nahutan nangobwo hongete. Atel ne nahangeri tohide ho nadoniso toho nifok. Isiarahini fa anya hangeri nengata hehoi olo toho niwure na owudo cebu obe holohichungi. ² Ngete ho nabuton nafirik hene iwure, nafuro nesaga ho nataloniso niger toda tofirik toho nafuro nahitwahijik na olotu tomaji holokwere. Noholong ho nolobwangi ho nahibielo edimele to nafuro ilwahino tofirik. ³ Tohotwa hofuro ofwoni nejufeho niger nifok, cebu isiarahini fa sing nahifirang toho noho tone nifok. ⁴ Iramahini fa sing ojo ongida obu ipalari namiyang na obwon nifok kuya cebu ibwo nasinge na onyori kuya nahite, nyuo hati lati hula obu obwoniterete nawaragaji ho Najyok huja obubure nihomomite hosing. ⁵ Obu fa isiarahini sing ojo ongida ifadarite ehule ati, nyuo hati ojo ongida olumotite sing nayiafaji miyet. Namiajan hosing hadi okialare ho nahiyeri hohitoni lomo naswak latwani. ⁶ Niho ehwe holongi otahite hadi lati nayeyi, nyuo hati obu ohorihini ngete. Owahi hadi sing nayayi nyuo hati obu ohorihini, nyuo hati nayeyi erataya tiye hosing. ⁷ Okialare nejufeji toho nasingiraji huja ihuhumahine nirem. Nitodo hohosi hosing obwoni fa ibwo nasinge toho ningita na ora amilet na omimil cebu nohomomite hosing okialare toho noho lati. ⁸ Obwoniterete fa sing nafofi toho nohongorwo cebu nahala hosing okialare toho nahala ho loyime. ⁹ Obwoniterete cebu nakufuhi toho nabiliata cebu nakwatan hefuho hosing toho nalohoi hogadigadi ho nasingiraji inamamite nirem. ¹⁰ Obwoni sing ho nalisani ho nayiliji to ho nahotoni; nilisani ho sing obwoni sing ho nahifirang nihitemiajari lati niho nayafaji miyet. ¹¹ Obwoni sing ho to ho Lohobwok hula otiale sing anjeloji ho nawudo ho noho obe ichung. Nafure hongete to noho Hiburu fa Lahepapalani,cebu to noho Grik obwon ngete hebwo nafure Appolion. ¹² Narohoji nahabito aringai. Iririe! Nahalu hanya obwoni narohojita harik huja ofwonise. ¹³ Anjilo lahitaleji ho nahutan nangobwo, ne ho nahitiyiriniso namurut na olotu to mwaraha ho altari na obwon nihatemeni ho Najyok. ¹⁴ Ojo namurut niho anjilo loho italeji lofa obwon ho nangobwo, ''Tolalahahi hula anjeloji ongon hula itihehine nihari ho Eufrates.'' ¹⁵ Sing ehule anjiloji ongon hulo fa ihuhumahine niho ene holong, ene holong, ene yiafa, cebu ene nga, fa ho nalahahiso noho hifadariso nihituhutihi ho twaniti ¹⁶ Orahi fa lasegere hula obwoni nihorwongite ho singiraji namilioni namiya harik (2oo,ooo,ooo). Itiyir ne nalwajan hosing. ¹⁷ Ngete anya tatali ne atel nasingiriaji nileyeji ho ne cebu ehule oyire niho sing: Nakufuhi hosing fa huja odoriyari, huja ilirifaji, ahuja buletok. Nohosi ho singiriaji okialare ho nohosi holoyimeji, tohutuhe hosing olotu nahima, nafuro, ho nafuro na ongwo. ¹⁸ Lahituhutihi ho lati ifadari fa tohunya hidiahita hutik: nahima, nafuro, ho nafuro na ongwo na olotu fa tohutuhe hosing. ¹⁹ To nahifirang ho singiria obwon fa nihutuhe hosing ho nilisani hosing-toho nalisani hosing okialare fa toho nariahu, ce bu obwoni ho nohosi isiarahiterete sing lati nangarangan. ²⁰ Natonge ho lati, hula fa obu ifadari tohunya idiahita, obu iwahari niho nareji huja egemi sing, kuya cebu obu itobwoji namojo niho najyohi ho namininga noho singati na omimil, namadiali, nasoforiaji, namori, ho nafututuruji-nareji huja obu otum otiale, itiyire, kuya odahe. ²¹ Kuya obu sing iwahari niho nahifadarita hosing, ho nahimomolita hosing, ho nahijejiasu hosing kuya nahoho hosing.