¹ Inaha, hilasirak ho ne hula etilasito ne, nakwama ho ne cebu natarabuk, tanya hoi tobotiati na ogol niho Lohobu, morit. ² Elelia ne ho Euodia, cebu elelia ne ho Sintiche, torahata to hosing niho Lohobu. ³ Tarihe, ahiramahiso cebu ne iji, la ehigem ho ne harabito, to lwaha hunya ngorwo, egemi sing ho ne nihitasarahinere nefanjelio harabito ho Klement ho haletok ho ne lahegiamak, hula obwoni nafureto hosing nibuk ho hisu. ⁴ Tokwamati niho Lohobu tihitik;hari ajo ne, tokwamata. ⁵ Nariajan hote, owak iramahini niho lati fad. Anyiha Lohobu. ⁶ Hehuyasete ibwo nasinge, nyuo hati niho nareji fad tanamojo nihifiasere, iramahi Najyok nasinge na iwahatate cebu ijimata nihongete awa. ⁷ Nayomo ho Najyok na ilany nejienita fad, olwak ba natajio hote ho nahigigilita hote niho Yesu Kristo. ⁸ Nilohichungi, hilasirak, nabwoni hinihe nareji huja otiri, nabwoni hinihe nareji huja obayangi, nabwoni hinihe nareji huja onyilaji, nabwoni hinihe nareji huja imedehi, nabwoni hinihe nareji huja otenyite angida, nabwon nangidari nihosing, nabwon ibwo nahitokwata nihosing, igigileta niho huja reji. ⁹ Igiamati nareji huja itejienusute, ifwotusute, itiyirusute, cebu itelusu niho ne, obwon ba Najyok ho yomo nihote. ¹⁰ Akwama ne niho Lohobu bebe tahanya itelengejuhotote nawan hote ne. Dobu fa igigiletete to ne, obe fa nabahata hote nilwahari ne. ¹¹ Abu ne atianya to newahita ho ne, ajien ne nabwanan ho nagolon nimanyita fad. ¹² Ajien ne tatali ne hesu niholongi ho hiraat cebu niho holongi ho saman. Nihoiha fad etejien ne tatali ne habwon niholong ho saman ho niholong ho hure, tatali ne hinef cebu tatali ne hawak. ¹³ Hehon ne hunya reji fad to ngete la ohitogolo ne. ¹⁴ Nyuo hati, ehwanatate angida nibwanari ho ne nihirat ho ne. ¹⁵ Ite lati ho Filipian tojianata ojo nilochifot ho efanjelio, lo fa nedahi ne Masedonia, obe nakelesia ohilwak ne nihisiarahinere ho nimojiniso mayak ite hama. ¹⁶ Dobu lo fa ne habwon Tesolonika, ebatusute nalwaha niho ne. ¹⁷ Obu ojo atahito ne nahiyalita, nyuo hati atahito ne nahangeri na ofunahi nangidari hote. ¹⁸ Abwon ne ho nareji fad huja olwaji. Angida ne. Ahorihi ne niho Epafrodita nareji huja ofwoni nihote. Owuri sing, nahihuhumuta huja ongidari huja isieri Najyok okwama. ¹⁹ Ohisiarahi ba ite Najyok ho ne nareji huja iwahatate to ho nebarita hongete nikwatan niho Yesu Kristo. ²⁰ Tahanya ikie nakwatan obwon niho Najyok Lamonye hojie jik ho jik. Amen. ²¹ Ehatahisi lati fad hula orahi loho Yesu Kristo. Lahilasirak hula ohibwon ho ne ohihate ite. ²² Lati ho Kristo tinyini ohihate ite, bebe niho lati ho Caesar. ²³ Ikie nangidari ho Lohobu Yesu Kristo obwon niho nolohailong hote.