1 To teleji nofa nanyiha nafangan nihisiahitere niholong noho abito, Maria madalina hebwo cebu onya Maria ho nafuoniso itiala nelume. 2 Nilihilik ho nalotiniso nahitwahaji, alotu anjeloji to hide ho nahitangadariso namorwo ho nahitwango da. 3 Nakwan ho ngete ho nahingaira to ho nomo nahila, nabongoji ho ngete obuori to ho nefududu. 4 Ihihire fa lahitiak ho nafwoniso to ho lati hula oyeyi. 5 Anjelo ho natianya niho nangorwo ojo, "Hebayangata, ajien ne ojo itahitetete Yesu, lofa ogurohini. 6 Obe ngete tinyi, ebuhu, to ho lofa otianyari ngete nihote. Ifwosu to tialata namaji nofa onuhahinerete Lohobu. 7 Ifwasi kerem iramahisi lolohejehi, 'Ebuhu ngete to yeyi. Totialata, alo ngete to nahatemeni hote to Galileya. Ifwasi hadi te horihiso ngete. 'Ahiramahi ne ite." 8 Nangorwo ho nahidahiso nelume kerem to nabayangi ho nakwama na obolo, ho nahinam nilohejehi ho ngete. 9 Sing ho nahirama ho Yesu, Yesu ho najiman nihosing, "Fad nolofalangaji." Nangorwo ho nafwoniso hinef nehejiaha ho ngete, ho nahitokwata ngete. 10 Yesu ho najiman nihosing, "Habayangata. Ifwasi iramahisi hilasira ho ne ikie ofue Galileya. Ofwe ba sing tiala ne da." 11 Nofa ho dahe nangorwo, hilihe lahetiak ho nafoten to ho nahang nahitwahaji ho nahiramahiso lahetomojok nareji fad huja iduongi. 12 Nofa neriame lapadiriji ho lolohitwaha sing ho natianya anya hiram, ho nahisiarahiso narobia huja olwaji niho lasenger. 13 Ho nahiramahiso sing, "Tojimata niho helihe,' Ofwoni lolohejehi ho Yesu to naharie ho nahohwalaru nakwan hongete ijie ohigetoro.' 14 Nomo nesiahita anya tianya lolohitwahaji, ohitanito be je ngete,hegigilete." 15 Lasigere ho namojiniso narobia ho nahi hon to ho iramahinerete sing. Anya tianya ho nahi sarahiso niho Yahu ho nahitiringa bwanan ho tahanya. 16 Nyuo hati lolohejehi ho ngete tomon ho harik ho nafoten to ho Galileya, nidenge na iramahinere Yesu sing. 17 Lofa natelini sing ngete, sing ho nahitokwata ngete ilihe orise. 18 Yesu ho na lotiniso niho sing ho najiman, "Nagolon fad esieri niho ne to hide ho nifok. 19 Ifwasi itejianati nihangite fad. Isiarahisi na batisimo to nafure ho monye, ho no ho Lonyi,ho no Lohailong Na-Onyila. 20 Itejianata sing ongida obayangi nareji fad huja ahiramahi ne ite.Abwon ne ho te didik,many nilohichungi ho fok."