¹ To nahubanyi berien nilohichahi ho holong ho yafaji, sing hona fwoniso niho sere, iyenise neteteleso ne huhumahini sing. ² sing hona horihiso namorwo aboborino to hosere. ³ sing hona hiruhiso, nyuo hati obu o horihini nakwan ho Lohobu Yesu. ⁴ Lo fa sing ho hebubunyute to anya, hilihe lati harik ho nabotia ijiefite nabongoji huja omimili. ⁵ Ifuti fa nangorwo ho nabayangi ho nachumo nifok, sing ho najiman niho ehwe ngorwo, ''Nanyuo te itahitete lahesujoni nihiji ho lahayeyak? ⁶ Obe ngete tinyini, ebuhu! Ihuyasu tatali ngete otianya nihote lo fa ngete obwon Galileya, ⁷ ojo ongida isieri Iha ho Najyok nihes ho lahepalak cebu ogurohini, niholongi ho hutik, ibuhu hari.'' ⁸ Nangorwo ho nahihuyaniso nahiramita ho ngete, ⁹ ho nayiteriso to hosiere ho nahiramahiso hunya reji fad niho lolohejehi ho ngete tomon habito ho lati fad. ¹⁰ Tahanyani Maria Madalina, Yuwana, Maria iyang ho Juma, cebu ngorwo hinihe huja obwoni hosing ho nahiramahiso hunya reji niho lejifitok. ¹¹ Okialare anya tianya toho nahilima niho lahejifitok, obu sing iruhi nangorwo. ¹² Nyuo hati Petur ho nadeto, ho nahinam nihosere, ho nabotia cebu atiala nihotwa helume, ngete ho nateliniso nabongoji to nakwanite ho sing. Peturu tinya ho naloten nihang ho ngete, ikuyasu ojo nanyuo lolotu. ¹³ Odahe fa sing harik nihene holong to nihang na onya Emmaus, na ora namitiri metaharik to Yerusalemu. ¹⁴ Sing ho natianya nikwanite ho sing nareji fad huja idwongi. ¹⁵ Lo fa natianye sing ifiase harabito , Yesu to nakwan hongete ho nanyihaji ho nahililik hosing. ¹⁶ Ongode fa nohonyehite hosing nitelinere ngete. ¹⁷ Yesu ho najiman niho sing, ''Nanyuo te hule harik itianyati idahati hati?'' Sing ho nabotia ahula ilongojite. ¹⁸ Lobo nihosing, nafure Kleopas, ho najiman niho ngete, ''Iji hama libe ijien nareji huja idwongi da Yerusalem hunya holongi?'' ¹⁹ Yesu ho najiman niho sing, ''Ahuni reji?'' Sing ho nah itarangahiso ngete, ''Nareji huja idwongi niho Yesu ho Nazarene, la ora fa aheramahitani ho hiramita, la ogol bebe cebu ora atianya nihatemeni ho Najyok cebu niho lati fad. ²⁰ Nehoi na isiarahinerete lolohitwaha ho lapadiri cebu lahabolorok ho hang ngete ojo ongida ifadari ngete cebu ogurohini ngete. ²¹ Nyuo hati hohigigilo jie ojo haradwo ngete litalahu Isarayil. Ee, nihobhunya fad,ara tahanyani noholong noho hutik many lo fa ofwonierete hunya reji tuhohino. ²² Nyuo hati cebu, hinihe nangorwo huja ohidaha ho jie hetebayangahiso ijie, to na bwanan hosing nihosiere many berien to nahubanyi. ²³ Lo fa nabu sing ohorihini nakwan ho ngete, sing ho na fwoniso, ho natianya ojo ateli cebu sing Anjiloji to riga la ojo isu fa ngete. ²⁴ Hilihe lati hula obwoni hojie ho nafwoten nihosiere nahorihiso toho ojimiterete nangorwo. Nyuo hati obu sing oteli ngete.'' ²⁵ Yesu ho najiman niho sing, ''O lati hula ibuyange cebu obwoni ho natajio huja oniame to nahiruk nitenyita fad huja otenyi laheramahitak ho hiramita! ²⁶ Obu fa ongida niho Kristo nihorihinere nahipadata to hunya reji nihiruhunere nikwatan ho ngete?'' ²⁷ Ichak niho Muse olotu liho laheramahitak ho hiramita fad, Yesu hobnahiramahiso niho sing nareji huja obwoni niho ngete niho nabuhi fad. ²⁸ No fa nanyihaji nihang, na ofwojierete sing, Yesu ho nahihon to ho nomoboringariso kai. ²⁹ Nyuo hati sing ho nahitugulihiso ngete, ojo, ''Itwonge hojie, nara atari cebu adoyoriso noholong.'' Tinya Yesu ho naloten itwongo hosing. ³⁰ Lo fa netwongo ngete ho sing nilonyasere, ngete ho nahiduhuniso nebune, ho najwahan, ho nabunyon, ngete ho nahisiarahiso sing. ³¹ Nohonyehite hosing ho nakianyan, sing ho najianan ngete, ngete ho nalitariso to hatemeni hosing. ³² Sing ho natianya nikwanite hosing, ''Obe dwo natajio hojie owuluro na otianyari ngete nihojie tehoi, ngete ho nangan ne-abuk nihojie?'' ³³ Sing ho nadeto nihene holong, ho nayitereso to ho Yerusalem. Sing ho nahorihiso ehule tomon harik ifure harabito, ho lati hula obwoni hosing, ³⁴ ojo, ''Ebuhu Lohobu tarihe, naleyeji niho Simone.'' ³⁵ Sing ho na hiramahiso reji huja idwongi te hoi, tatali Yesu oleyo niho sing nibunyo hebune. ³⁶ Lo fa natianye sing hunya reji, Yesu to nakwan hongete obotia nihiji hosing, ho najiman niho sing, ''Ikie nayomo obwon niho hote.'' ³⁷ Sing ho nahihihira cebu ifuti ho nabayangi, cebu hara oteli sing nolohailong. ³⁸ Yesu ho natianya niho sing, ''nanyuo te ibayangata? Nanyuo nahifisita ifuti nitajio hote? ³⁹ Totiala nehas ho ne cebu nehejiaha ho ne, ojo ne to nahotek ho ne. Totiro ne ce bu itel. Obe Nolohailong obu obwonitere nakwan ce bu nohoyito, toho iteliji ne abwonitere.'' ⁴⁰ Lo fa natianya ngete anya, ngete ho nahiteliso sing nehas cebu nehejiaha ho ngete. ⁴¹ Sing he kuyase nikwama hosing , cebu omachanase, Yesu ho najiman niho sing, ''Ibwanatate hebwo nasinge no nyasu?'' ⁴² Sing ho na hisiarahiso ngete nahayemi na na atoli. ⁴³ Yesu ho nahiduhuniso ngete ho na nyasu sing nihatemeni hosing. ⁴⁴ Ngete ho najiman nihosing, ''Lo fa hebwon ne hote, ahiramahi ne ite ojo nareji fad huja igierehini nichihita ho Muse, niho laheramahitak ho hiramita, cebu niho nafureto ongida otuhohini.'' ⁴⁵ Tinya ngete ho nangan nohosi hosing, ojo ongida sing ojieni nabuhi. ⁴⁶ Ngete ho najiman niho sing, ''Igierehini, ojo ongida Kristo hohorihi nahipadata, ibuhu hari to yeyi niholongi ho hutik. ⁴⁷ Ongida itotose nahiwaha cebu nalahshiso hepalita to nafure ho ngete niho nihangita fad, ichak to Yerusalem. ⁴⁸ Etialatate hunya reji to noho nyehite hote. Totialati, asulahiso ne nengatita ho Monye ho ne nihote. ⁴⁹ Nyuo hati itilasete nihang, many nahitejiefi ite to nahifirang to todo.'' ⁵⁰ Tinya Yesu ho nahiyaru sing niger many onyihaji sing Beteny. Ngete ho natingon nehes ho ngete, ho najwahan sing. ⁵¹ Ngete ho jwaha sing, ngete ho nahidahiso sing ho natingoro ngete nihide. ⁵² Tinya sing ho nahitokwata ngete, ho nayiteriso to ho Yerusalem to nakwama na obolo. ⁵³ Sing ho nahitiringa da nitempulo, ijwaha Najyok