1 Sing fad ho nadeto nihide, ho nahiyeno Yesu nihatemeni ho Pilato. 2 Sing ho nahichak itwobo ngete, ojo, ''Ohihorihi jie ale twani iramahita nahiramita huja ogesemi niho lati hojie, iramahita sing ojo ongida obu isiarahite namochoro niho Saesar, ojo cebu ara ngete to nakwan ho ngete a Kristo, Lohobu.'' 3 Pilato ho nahifiasu ngete, ojo, ''Ira ji a Hobu ho Yahud?'' Yesu ho nahitarang ngete ojo, ''Ejo ji tarihe.'' 4 Pilato ho na jiman niho lolohitwaha ho padiri ho nalohoi ho lati, ''Abu ne ahorihi nepal niho ale twani.'' 5 Nyuo hati sing idayari, ''Isuswe ngete lati, cebu itejiana nihang ho Yuda fad, ichak to Galileya many niha nya maji.'' 6 Lo fa netiyir Pilato anya, ngete ho nahifiasu kuya ora ale twani loho Galileya. 7 Lo fa nahorihi ngete ojo obwon ngete nihene Herode, ngete ho nahirasulariso Yesu da Herode, ngete to nakwan ho ngete obwon Yerusalem niho ehwe holongi. 8 Lo fa natel Herode Yesu, ngete ho nakwama bebe, tonanyuo owak fa ngete tialan ngete noholongi huja olwaji. Ehitiyir ngete to ngete owak ngete tialan hinihe nedwarita huja igem ngete. 9 Herode ho nahifiasu Yesu to nahifita huja olwaji, nyuo hati Yesu obu nahitarang ngete. 10 Lolohitwaha padiri ho lahegierok ho nadeto,hula ingereji itwobe ngete. 11 Herode ho lasegere ho ngete ho namoro ngete, cebu okeniterete ngete, ho nahitejiafahiso ngete na bongoji huja onyilaji, ho nasulariso Yesu niho Pilato. 12 Herode ho Pilato ho narahan amorit nihene holong (berien orahi fa sing amerok) 13 Pilato tinya ho na ngeleniso lolohitwaha ho padiri harabito cebu gala ho nalohoi ho lati, 14 ho najiman nihosing, ''Iyenetete niho ne ale twani la iyarita lati nihoiha huja orohoji, totialata, ne nihifiasere ngete nihatemeni hote, abu ne ahorihi nepal niho ale twani ho huja reji itwoberetete ngete. 15 Obu, dobu Herode, ngete ho nahinyahiniso ngete nihojie, totiale, obe ibwo nabayangi ho yeyi na igemi niho ngete. Inaha abek hadi ne ngete, cebu alahu ngete.'' 17 18 Nyuo hati sing ho na yoo fad harabito, ojo, ''Ifadaye latwani, tolahahi Barabbas nihojie!'' 19 Barabba ngete latwani la ihwanahini nilotwarari to nahifirata ibwo nahang ho sing cebu ta nahifadariso. 20 Pilato ho najiman niho sing hari,owak olahahini Yesu. 21 Nyuo hati sing ho nahigogworita, ojo, ''To gurohi ngete, to gurohi ngete.'' 22 Otianya ngete niho sing noho nenyahita hutik, ''Tatali, ani singe na oroho ale twani ihon? Abu ne ahori ibwo nasinge na otum ifadajierete ngete. Inaha, natuhohino na lumo ngete, alahahi ba ne ngete.'' 23 Nyuo hati sing ho nahigogworita to namurut na okwat, owahi sing ojo ongida ogurohini ngete. Cebu Namuruto hosing ho nahisiarahiso Pilato iruka. 24 Tinya Pilato ho nahiruk nawahan hosing. 25 Ho na lahahiso latwani la otwarahani sing to nahiram ho nangalasu ho nahiram ho hifadarita. Ho nahisiarahiso Yesu to ho niwahan hosing. 26 Lo fa neyare sing ngete, sing ho nahinef Simone lo ho Sirene, olotu to hang, ho nahisiarahiso nahite na ikwala niho ngete ongida oting, nihijifitere Yesu. 27 Nalohoi ho lati , ho nangorwo huja ilongojite ce bu oye ngete, ijifite ngete. 28 Nyuo hati ho Yesu nahibielo niho hosing ho najiman, ''Lemusak ho Yerusalem, heyete ne, nyuo hati toyete to nakwanite hote cebu to lemusa/lemusak hote. 29 Totialati, afwonise noholongi naba ojimiterete sing, 'Ikie najwaha obwon niho nate huja obotie (ikolifi) cebu nehotwa na obu ongijahi, cebu nahik huja obu onahi.' 30 Tinya ichahi ba sing jiman niho nadengeto, 'Tohuyarita niho jie,' cebu nitodoji, 'Imuhoto ijie.' 31 Ihoni sing hunya reji nakiani honyori, nanyuo ba lobwon nayohojoyo ngete?'' 32 Hilihe lati, lahahohwalak harik, iyare fa niger ho ngete ojo ongida ifadari. 33 Lo fa nafwoni sing niho namaji na ongelese ojo Nohou, sing ho nagurohiso ngete hehule lahepalak, abito to teten ho ngete cebu ile abito tehajong ho ngete. 34 Yesu ho najiman, ''Monye, ibalahi sing, obu sing ojieni nanyuo sing ihwane.'' sing ho narujuto newaragaji huja odudung sing, ho nahwara nabongoji ho ngete. 35 Lati/nati ho nabotia itiala lolohitwaha ikeniterete ngete, ojo, '' Italahu hilihe. Ikie ngete italahu nakwan ho ngete, nara ngete Kristo ho Najyok, la anyumoni.'' 36 Lasegere cebu ho nahilimari ngete, ifwonise niho ngete, isiarahite ngete nahari ho jalata, 37 ojimi, ''Nereji a Hobu ho Yahud, italahu nakwan hoji.'' 38 Obwon nahitelehi niho ngete na ojo, ''NGETE ALE LOHOBU HO YAHUD.'' 39 Lobo niho ehule lahepalak hula ogurohini,ho namoro ngete, ojo, ''Ibe ji ira a Kristo? Tolwahu nakwan hoji hojie cebu.'' 40 Nyuo hati abito ho nahitarang, ireng ngete ojo, ''Ibe ji ibayang Najyok, toho ibwonitere ji ningoto na okialare? 41 Ohibwon ijie inyi to nepal,ohigurohini ijie to nepal hojie. Nyuo hati ale twani obu ipalaya ibwo nasinge.'' 42 Ngete ho najiman, ''Yesu, ihuya ne nelotu ji nihang hoji.'' 43 Yesu ho najiman niho ngete, ''Tarihe ajo ne nihoji, bayia ibwon beji ho ne paradiso.'' 44 Abwon fa nisa hele, nedimele ho nahimuhoriso nafok fad many nisa ho metongon 45 lo fa nabu noholong ofarang. Tinya nabongo na itihehini nitempulo ho nahwara to hiji. 46 Yesu ho nayo tona murut na okwat, ''Baba, esiarahi ne nolohailong ho ne nihes hoji.'' Lo fa nateny ngete anya, ngete ho na yeyi. 47 Lo fa natel lolohitwahaji ho segere nasinge na igemi, ngete ho nahitokwata Najyok, ojo, ''Tarihe ora ale twani la opit.'' 48 No fa nateli nalohoi ho lati/nati hula/huja olwaji fad hula/huja ofwoni harabito itiala nareji huja igemi, sing ho nayiteriso ididinge nahik ho sing. 49 Nyuo hati lati hula ojien ngete, cebu nangorwo huja ijifine ngete to Galileya,obotia nololamaje, otiala hunya reji. 50 obwon fa lobo latwani la onya nafure Yosefo, labobwon niho lolohitwaha, la ongida cebu latwani la otirahi 51 (obu ngete iruk nahiruk cebu negemita ho sing), to Armatea, nahang ho Yahud, la itilasu nahang ho Najyok. 52 Ale twani ho nalotiniso niho Pilato, ho nahifiasu nakwan ho Yesu. 53 Ngete ho nahitegetehiso nifok, ho nabuburan to nabongo na angida, cebu ho nahitegetehiso ngete namorwo ikefi, namaji na hobe onuhahinerete lobo latwani. 54 Ora fa a holong ho huhumahino, cebu noholong heteleji olotiniso. 55 Nangorwo, huja ofwoni ho ngete to Galileya, ho nahijifaru nihalu, ho nateliniso nohosere cebu tatali itegetehini nakwan ho ngete. 56 Sing ho nayiteriso, ho nahihuhumahiso neheru ho nelataji. Niholong hetaleji sing ho nawirari to ho ojo nechihit.