¹ Nihalu ho hunya reji Yesu ho nahitelehiso nakwan hongete hari niho nolohejehi nilotifor ho Tiberias; ngete fa anya tatali ngete itelehi nakwan hongete: ² Obwon fa Simone Petur harabito ho Tomas lofa onya Didima, Nathaniel loho Cana la obwon Galileya, iha Zebebee, cebu hilihe lolohejehi ho Yesu harik. ³ Simone Petur ho najiman niho sing, ''Halo ne itolwaha nahayem.'' Sing ho najiman niho ngete, ''Ijie, ce bu, ohifwonu hoji.'' Sing ho nafoten ho na dwahahiso nitigol, nyuo hati niho ene harie abu singbitolohini ibwo nasinge. ⁴ Lofa nafangino, Yesu ho nabotia nilohipulere, nyuo hati obu fa lolohejehi ojieni ojo Yesu ele. ⁵ Yesu tiye ho najiman nihosing, ''Hilahaji, ibwanatate hebwo nasinge ho nyasu?'' Sing ho nahitarangahiso ngete, ''Obe.'' ⁶ Ngete ho najiman nihosing, ''Ipipirehisi nangerieji hote niteten ho tigol, ihorihisi ba te hinihe.'' Tiye sing ho nahipipirehiso nangerieji hosing, nyuo hati obu fa sing otum ipihini ngete nihotwa ta bolori hohayemi. ⁷ Lolohejek lo fa okwama Yesu ho najiman niho Petur, ''Ngete ale Lohobu.'' Lofa nitityir Simone Petur ojo Lohobu fa ele, ngete ho natodohiso natolbongo tona kwan hongete,ho nahibirehiso fa nakwan hongete nihotwa ho hari. ⁸ Ehule nolohejehi hilihe ho nafwoniso nihotwa hotigol, cebu ipihite fa sing nangerie na ifut ho nahayem. ⁹ Lofa nadohini sing niger to hari, sing ho na heriniso nahima inwahahini da nahayemi otwalahini nitodo hongete, ho nebune. ¹⁰ Yesu ho najiman niho sing, ''Iyienete hinihe nahayem huja inefinetete.'' ¹¹ Simone Petur ho nadwahan ho na hipihiniso nangerie nifok, nefut ho nahayem nalohoi, namiya abito ho nehejek miyet ho hutik; dobu olwaji fa nahayem, obu fa nangerie ochira. ¹² Yesu ho najiman niho sing, ''Ifwosu anyesete.'' Obe lobo lolohejek ifi ngete, ''Ngai iji?'' Ojieni fa sing ojo Lohobu. ¹³ Yesu ho nalotiniso, ho nahiduhuniso nebune, ho nahisiarahiso niho sing, ho nahayemi. ¹⁴ Ora fa anya noho nahinyiahita hutik na itelehinere Yesu nakwan hongete niho nolohejehi nihalu ho hibuhiniso ngete toyeyi. ¹⁵ Nihalu ho nyasu, Yesu ho najiman niho Simon Petur, ''Simone, iha Yuwana, ikwama ji ne bebe ilany hule?'' Petur ho najiman niho ngete, ''Ee'e, Hobu; ijien ji ojo ahikwama ne iji.'' Yesu ho najiman niho ngete, ''Itanya laborekwo hehoriangi hone.'' ¹⁶ Ngete hona jiman niho ngete harii nenyiahita nohoharik, ''Simon, iha Yuwane, ikwame iji ne?'' Petur hona tianya niho ngete, ''Ee'e, Hobu; ijien iji ojo ajikwama ne iji.'' Yesu hona jiman niho ngete, ''Totuna ha nehoriangi ho ne.'' ¹⁷ Ngete ho najiman niho ngete nenyiahita noho hutik, ''Simone, iha Yuwana, ikwame ji ne?'' Petur ho nahilongojita tananyuo ifi Yesu ngete many nenyiahita hutik, ''Ikwame ji ne?'' Ngete ho najiman niho ngete, ''Hobu, ijien iji nareji fad; ijien iji ojo ahikwama ne iji.'' Yesu ho najiman niho ngete, ''Itanyase nehoriangi ho ne. ¹⁸ Tarihe, tarihe, ajo ne niho ji, lofa hemuta ji, itejiefitito ji nakwan hoji to nabongo ho nadaha namaji na iwak ji; nyuo hati nelotu hiragang, irwehi hadi ji nehes hoji, lobo latwani olotu itejiafahiso ji nabongo ho natingon iji niho namaji na obu ji iwak loten.'' ²⁰ Petur ho nangolo ho nateliniso lolohejek lo fa okwama Yesu bebe ijifito sing- lofa cebu onganga nilochwolo ho Yesu niholong ho ngirang ho najiman, ''Hobu, ngai ngete la olo hitafadariso ba iji?'' ²¹ Petur ho na ngoliniso ngete ho najiman niho Yesu, ''Hobu, nanyuo ba ale twani ihon?'' ²² Yesu ho najiman niho ngete, ''Nawak ne ojo ongida ngete itilasu many nalotu ne, Nanyuo na nihoji? Ijifine ne.'' ²³ Tiye anya hiram ho nahisarahiso niho hilasira, ojo abu ba nolohejehi oyeyi. Ohorih hati Yesu obu oteny niho Petur ojo obu ba ele lohejek oye, nyuo hati, nara ne lajo ojo ongida ngete itilasu many nalotu ne, nanyuo naja nihoji?'' ²⁴ Ngete ale lolohejek la ora ahapiahani ho hunya reji, cebu lo fa igierehi hunya reji, ohijien ijie ojo natiala hongete otirahi. ²⁵ Obwoni cebu hinihe nareji huja igem fa Yesu. Hara egierehini dobu abito nifok, ajo ne dobu nafok tonakwan hongete habu dwo obwonitere nabuhi huja otum egierehine.