¹ Hilasira ho hinasira ho ne, heniafata nahiruk niho Lohobu hojie Yesu Kristo, Lohobu ho kwatan, to nahigegiala niho lati hilihe. ² Toho heruhi lobo latwani nihiji hote ijifito nayeliti ho nabongo na ongida cebu lahaparitani ho nahiruhiso ijiefito nabongoji huja iboti. ³ Nomo netiala iji niho latwani la ijiefito nab8ngoji huja ongidari ijo, "Ale, itwenge iji nimaji na ongida," nyuo hati niho ijo niho lahaparitani, "Tobotie di,"kuya, "Itwenge nihejiaha ho ne," ⁴ ibete igegialati nakwanite hote? Ebete irahata ahangotok hula ibwanata ho nahigigilita huja iboti? ⁵ Itiyirati, hilasira ho ne, obe fa Najyok onyumu laparitak ho nifok nongida osami nihiruk cebu ongida orahi alolunyot ho hang na ongat ngete niho hula okwame ngete? ⁶ Nyuo hati te itahajasi te lahaparitak! Obe lora lahasamak lohitegiame ite? ⁷ Obe lora sing lohiyarite ite nilokiho? Obe lora sing omore nafure na ongida na irahatate anohongete? ⁸ Nejifitetete nechihit na ongida, toho owak nabuk, "Tokwame latwani la omanya niger hoji toho nakwanhoji, "igiame angida. ⁹ Nyuo hati nesisietete hilihe lati, ipalarisetete, ohitwarahini ite ta nechit ahangilak hechihita. ¹⁰ Latwani la obayang nechihita fad, mayak ene ititihito tebwo nehoi, alotu ngete ipalatiso tanangilan nechihita fad. ¹¹ La ojo, "Hejiawu ngurutwani," cebu ojo, "Hefadaya." Nabu ji ijiawu ngurutwani, nyuo hati ji ifadaya, igiel ji nechihit. ¹² Totianye cebu igiama toho lati hula ba ongoti to nechihit ho hisiabita. ¹³ Olotu nangoto nebe mehino niho hula obu omehitite. Ilany namehino nangoto. ¹⁴ Ani ngidari naja, hilasira ho ne, najo lobo abwon ngete ho nahiruk, nyuo hati obu igiama? Hatum ene hiruk italahu ngete? ¹⁵ Ikie dwo lahilasi kuya nahinasi obu ijief nabongoji angida cebu obu obwon ho nangirang nihene holong. ¹⁶ Ikie dwo lobo nihote ojo nihosing," Ifwasi to nayomo, itwengete angida cebu ifwangata." Nabu te isiarahisi sing hinihe nareji huja obgidari nikwan,ani ngidari na? ¹⁷ Neho anya hoi nahiruk tanakwan hongete, abe nahigiama, oye. ¹⁸ Nyuo hati lobo ojo,"Ibwon ji ho nahiruk, ne abwon ho nahigiama." Itelehi ne nahiruk hoji nebe higema-ita, ongida ne ahitelehi iji nahiruk ho ne to nahigemita ho ne. ¹⁹ Iruhoto te ojo ora Najyok abito; Itenusu te. Nyuo hati dobu najiohi iruhi toho ja, cebu ihihire sing. ²⁰ Iwak ji ijianan, iji ale lahadatajieni, ojo nahiruk nebe higemita obe ho nangidari? ²¹ Obe fa itarahi Abramo ahangidarani to nahigemita lo fa nesiarahi ngete Isako iha langete ni altari? ²² Totialata, ojo igem nahiruk nahigemita hongete, tanahigemita etongoli fa nahiruk hongete. ²³ Itufuti fa nabuk na ojo, "Iruk Abramo Najyok, etarahi fa ngete ahangidarani," ongelese fa ngete amorite ho Najyok. ²⁴ Totialata ojo itingidari latwani to nahigemita, obu tanahiruk hama. ²⁵ Tanya hoi cebu, obe fa itingidari Rahab nahasomoni to nahigiama, lofa nefwotu ngete lolohijehi ho nasulariso sing tebwo nehoi? ²⁶ Toho nakwan nebe nolihailong oye,ora cebu, nahiruk nebe higiama oye.