¹ Inaha ongida ijie ohitiyira nitianya na ohitiyir ijie, ongida ijie obu ohifwo nihoi noroho niho ngete. ² Nangida nahiram lofa iramahini hara niho anjiloji,nnyuo hati nepal ho nabayangan bayangi ohorihini ba nehitegemita, ³ tatali hati be jie hahitum ohiluny lomo nabu jie ohikutohoi negigilita hojie niho nahitalahino na obolo?__Nahitalahino lo fa iramahi Lohobu berien niho jie to hula itiyiri ngete. ⁴ Etetelehi cebu Najyok niho ngete to nahitetelehita, nangidarita, cebu tanahigemita huja ogoli, ho nehiyalita ho Lohohailong Na-Onyila na ohwarahi ngete tanawahan ho ngete. ⁵ Obu Najyok ihwanahi nafok ongida na olotu, na ohitenya jie, niho anjiloji. ⁶ Ati, eramahi lobo ho najiman, "Ngai latwani, la igigilo ji to ngete? Kuya lahito hojyok, laja itialatite ngete? ⁷ Ihuhumu ji latwani omuta ilany anjiloji; itejiafahi ji natarabuk ho kwama ho nohobayangi niho ngete. ⁸ Ihwanahi ji nareji fad nifotiri hehijiaha hongete." Esiarahi Najyok nareji fad niho latwani. Obu ngete idahi ibwa nasinge nihisiarahinere ngete. Nyuo hati tahanya obu jie ohitel nareji huja isiarahini niho ngete. ⁹ Nyuo hai, ahitelito jie lo fa ihuhumuni kai, omuta ilany anjiloji--- Yesu, la, to nahitegiama ho nayeyi hongete, itejiefi ngete to nakwama ho nabayangi. Tahanya to nangidari ho Najyok, imang Yesu nayeyi to lati fad. ¹⁰ Ongida fa ojo Najyok, nareji fad huja obwoni to ngete cebu hara niho ngete, ongida iyiene lemusak olwaji nikwatan, ongida ihwanahi latwani lenefito ongida italuhu sing to nahitegemita hongete. ¹¹ Niho latwani la isiarahi cebu lati hula isiarahini, owoni sing to maji abito, Najyok. Tanya tianya latwani la isiarahi sing niho Najyok obu ngete obwonitere ho nariri ningelesera sing hilasirak. ¹² Ojo ngete, "Etokwata ba ne nafureto hote hilasirak ho ne, Eruho ba ne tote to hotwa ho lotubari." ¹³ Cebu hari ojo ngete, "Eruk ba ne niho ngete." Cebu hari, "Totiale, inyini ara ne ho lemusak hula isiarahi Najyok niho ne." ¹⁴ Naha, toho obwoniterete lemusak ho Najyok fad sing nakwan ho nohoto abito, obwonitere cebu Yesu huja reji fad, ongida to nayeyi itobwoj la obwonitere nagolon ho yeyi, na ojo , laharahojani. ¹⁵ Ora fa anya ojo ongida ngete italahu hula fad obayangi nayeyi, omanye namanyita hosing ahatwarak . ¹⁶ Tarihe obu ora lolo anjiloji ngete olwaha. Ati, olwaha ngete lemusak ho Abramo. ¹⁷ Ongida fa nihongete nelotinere toho hilasirak hongete nihoiyiha fad, ongida ngete olotu bwanan apadiri lo obolo la ahariajani cebu aheruhutani niho nareji ho Najyok, cebu ongida ngete ohorihi nahitalahino ho hepalita ho lati. ¹⁸ Toho ipadata Yesu to nakwan ho ngete, isusi ngete, olwak fa ngete ehule fa isusi.