¹ Fa berien otianya fa Najyok niho niho fafairok hojie hara niho laheramahitak niholongi huja olwaji to nihoyiha huja olwaji. ² Nyuo hati niho hunya holongi hobaya, atianya Najyok nihojie talahito hongete, la onyumu ngete ojo ongida ngete olunyohi nireji fad, ibieu cebu ngete nafok ho nahide hunya obwoni inyi nifok. ³ Itwongo iha langete afangan ho kwatan ho ngete, la iyaru nemanyita ho ngete cebu nahinefitere nareji fad to na golon ho ngete. Lo fa nahorihi ngete nahitinyilaja hepalita, ngete hanahitwongo niteten hehene ho Lahaboloroni. ⁴ Alotu ngete golon niho anjiloji, toho nafure na olunohi ngete ongida bebe ilany nafure hosing. ⁵ Nihali anjilo ngete ajo, "Iji lahito ho ne, baya ara ne amonye hoji"? Cebu hari, "Ara ba ne amonye niho ngete, ngete ba ora ahito niho ne"? ⁶ Hari, lo fa neyeno Najyok lolokang inyi nifok, ojo ngete, "Anjiloji ho Najyok fad ongida omoje ngete." ⁷ Tanjiloji ojo ngete, "Ngete la ihuhum lolohailongi ho anjiloji ho ngete, ho nangadief ho hima ho lahegiamak ho ngete." ⁸ Nyuo hati to Lahito ojo ngete, "Nahitwongi hoji, Najyok, hadi ho hadi. Neluk ho hang hoji ora eluk noho ongidari. ⁹ Ikwama ji nangidari nyuo, idaya narohoji, tinga Ni jyok, Najyok hoji, inaha Najyok, Najyok hoji, atwehi nelata ho kwama nihoji bebe ilany haletok hoji. ¹⁰ Tolochifot, Lohobu, iterehiji nafotiri ho fok. Ora nahide ahigiama hehes hoji. ¹¹ Otuhohine ba sing, nyuo hati ji iwasihi. Otuhohine hadi sing toho nabongo. ¹² Ibibir be ji sing toho nohofito, cebu ibebiel ba sing toho nabongo. Nyuo hati iwasihi ji, obu nengaji hoji ichungi." ¹³ Nyuo hati niho ali anjilo Najyok otianya niho ibwo noholong, "Itwonge niteten hehene ho ne many ehon ne lomerok hoji orahi ibojit hehejiaha hoji"? ¹⁴ Obe irssulari nolohailongi ho anjiloji ofwe igiama nimasik fad cebu iririe lati hula owahi lunyohiso nehitalahino?