¹ Ngete ale Paulo laheyiaratani hohiram ho Yesu. Abu ne ara aheyiaraitani hohiramita ho Yesu toliawa obe ce bu tolatuani, hati to Yesu Kristo ho Najyok Lamonye, lofa itedetu ngete toyeyi. ² Holahilasira fad obwoni hone, egierehiso ne ni kelesiaji noho Galatia. ³ Iko nangidari obwon niho ite hona nayomo niho Najyok Monye hojie hoce bu Hobu Yesu Kristo, ⁴ ngete lofa isiarahi nakwan hongete nihipalita hojie ojo ongida atum italahu ijie niho anya narohoji na obwon niho hunya ngaji, toho nawahan hojyok hojie hoce bu Lamonye. ⁵ Niho ngete iko nakwatan obwon jik many jik. ⁶ Abayangahi ne ojo ibielehinetete fa kerem niho nabwanan hama nahutuk na odwa. Abayangahi ne ojo ibielehinetete niho ngete lafa ohingele ite tona ngidari ho Kristo. ⁷ Obe ibwo nahutuk na odwa, hati obwoni hilihe laliawa sing hula isuduni namehino hoce bu owahi itapalariso nahutuk na odwa noho Kristo. ⁸ Hati ora dobu ijie kuya anjelo tohide ongida ohiramahi ite natianya na odwa ilanya ngete lofa ohiramahi ite, ongida ificieri ngete. ⁹ Toho ahiteny fe ijie berien, hati tahanya ajone hari, ''Nara lobo lotenyitito niho ite natianya na odwa obu hati ora lofa iruhotote, owak ngete ificiere.'' ¹⁰ Toho ne tahanya atahito ne nahisiarahiso holati kuya Najyok? Hora ne hatahitito nahitokwama hohulati? Nara ne hebuha tiama ohitokwama lati, obu ne ara ahegiamani ho Kristo. ¹¹ Toho awak ne ite ijianata, hilasira, ojo tianya na odwa nofa eramahine obu niho lati ce. ¹² Obu fane efwotu ngete niho latuani, kuya letejien ngete. Hati cebu, ora fa tona tujuohiso ho Yesu Kristo niho ne. ¹³ Itiyirata fete nahiram hono fa manya hone to Judaism, tatali fane iribetio nikelesia hojyok oangaya cebu natiaman hoce epapalaya ngete bebe. ¹⁴ Etobolor fane to Judaism olangaya nalohoi holati hone Jews. Abwon fane honakwama tonagolon noho nolohangite hobo Monyie hone. ¹⁵ Hati okwama fatia Najyok ninyumunere ne many tohotua heyiang hone. Ohingele fa ne ngete tona tonangidari ho taji ¹⁶ ongida itelehi ihalangete niho ne, ojo ongida ne eramahi ngete nihiji holati hula obu orahi aloho Yahud. Abu fa ne kerem kerem ifi honakwan hono hoto ¹⁷ hoce bu obu fane alo many Yerusalem niho ehule abwoni aheyaritak ho hiramita ho Yesu nihatemeni hone.Nyuo hati hatum fa ne alo Arabia cebu tiye ayitoyo toho Damaska. ¹⁸ Tiye nihalu hengasi hutik ne ho naloten fa many Yerusalem iwaja Kephas, cebu ne ho na hitwong fa hongete noholong tomon homiyet. ¹⁹ Nyuo hati obu fa ne atelu hilihe laheramahitak ho hiramita ho Yesu mayak Juma, ihahilasi ho Lohobu. ²⁰ Totialati, nihatemeni ho Najyok, niho nareji huja egierehini ne nihote,obu ne agesem. ²¹ Tiye ne ho naloten fa nimasik ho Siria ho Cilicia. ²² Hobu fa nakelesiaji ho Yudaya hu nofa obwoni niho Kristo ohijieni ne , ²³ nyuo hati itiyiratite fa sing, ''Ngete lofa ifadarita ijie itokwata nahiruk lo fa ipalarita ngete," ²⁴ itowate sing Najyok to ne.