¹ Tahanya lobo latwani la onya Ananias, ho Sapphira ngur nangete, itenyiangaya ibwo nasinge ho ngete, hana tunahiso narobia huja otongi netenyiangari ngete (ngur na ngete ajien), ² cebu ho na hiyeno hulodo natonge ho na hihwanahiso nihejiaha ho la hejifitok. ³ Nyuo hati Petur ho na jiman, "Anania, nanyuo lahi suswani ifut nitaji hoji nihitonongari Nolohailong Na-Onyila nihidimahinere hinihe nareji huja itenyangajiereji nafok? ⁴ Lo fa hobu itenyangari , obe fa ngete ora anoho ji? Nanyuo ji igigilo hunya reji nitaji hoji? Obu ji igesem niho lati nyuo hati niho Najyok."? ⁵ Lo fa nitiyir ngete hunya hiramita, Ananias ho na huyari nifok ho ho nawirita nolohichungi howirita. Nabayangi na obolo ho nahinef lati fad hula itiyiri ngete. ⁶ Nahilahaji ho na foniso nihatemeni ho nati ngon ngete nihide, ho nati ngoro ngete niger ho ho na nuhahiso ngete. ⁷ Lofa natumi natiala ho holong manyi hutik, ngur na ngete hana lotiniso, obu ojien na nyu lobwon. ⁸ Petur hana jiman niho ngete, "Iramahi niho ne kuya ite nyia ngasite nafok tana robia huja olwaji." ngete hana jiman, "ee, tohuja olwaji." ⁹ Tinga Petur ho najiman niho ngete, "Tatali te iruhoto harabito nitiamari Nolohailong ho Hobu? Totiale, nehejiaha ho hula onuhahini habileji hobwoni nikat, ohitingere ba iji niger." ¹⁰ Ngete ho nahuyari nihejiaha hongete, ho nawirita nolohichungi ho wirita, nahilahaji ho nafoniso horihiso ngete naye; ho nati ngoro ngete niger ho na nuhahiso niger ho habi. ¹¹ Nabayangi ho nahinef nakelesia fad, ho niho lati hula itiyiri hunya reji. ¹² Idwongi fa nahiteleyehita ho nahigiamita huja olwaji niho lati fad to nehes ho lahejifitok. Obwoni fa sing fad nihaji ho Salamone. ¹³ Nyuo hati obe lobo obwon ho nagolon nihiruhunere niho sing; nyuo hati, ihwanahini fa sing nimaji nobolo to lati. ¹⁴ Ofunahine lati hula iruhi niho Hobu, nalohoi ho laliawa cebu nangorwo, ¹⁵ ongida sing cebu otingite lati hula odiahe nihoiha h cebu itegete hite sing nigetita ongida nalotu Petur,ongida nerifi hongete odohi niho hilihe. ¹⁶ Alotu cebu ibwo nalohoi ho lati bebe harabito tohang ho Yerusalem, iyenete laha diahak ho cebu ehule hula obu no lohailongi hosing onyilaji ho cebu sing fad ehuhumi. ¹⁸ Nyuo hati lolohitwahaji ho padiri ho nadetino, he hule cebu fad obwoni hongete (hulo fa orahi noho nikat Sadducee); sing ho nahifut to nahayini ¹⁷ ho narwehiso nehes niho lahejifitok, ho nahi hwanahiso sing nilotwarari ho lati. ¹⁹ To naharie anjelo ho Lohobu ho nangan nekati ho lotwarari ho nahiyaru sing niger, cebu ho najiman, ²⁰ "Ifwasi, to botiati namaji ho tempulo itianyati nihoblati fad netenyita ho manya." ²¹ Lo fa netiyiri sing anyani, sing ho nahiruhiso netempulo to nafarani ho nahitejiana. Nyuo hati lapadir lobwon niha temeni alotu, hana ngialan lati hula itejiane harabito, ho lolo hi twaha ho isarayil, ho cebu hana sulariso nimaji ho lo twarari ongida letejianak iyene. ²² Nyuo hati lolohitwaha ho lasegere ho nafoten obu ohori hini sing da nimaji ho lotwarari, sing ho nayiteriso ho ho nahiramahiso, ²³ "ohi horihi jie no lotwarari ikiana cebu lati hula otiale obotie nikat, lo fa nahinga ijie ngete, ohorihi jie lobo latwani obe tohotwa." ²⁴ Tahanya lo fa netiyir latwani la inefito natempulo cebu lolohitwaha ho padiri anya hiram, ome fa niho sing nijiman ojo nanyuo ba lolotu nihongete. ²⁵ Lobo latwani ho nalotiniso hiramahiso niho sing, "Hulo fa ti ihwanahisite nilotwarari ehule lobotie nitempulo itejiana cebu ite jiane lati." ²⁶ Tinya ile inefito netempulo ho nafoten ho haletok, ho ho nahiyeno sing nihalu, na obe nangalasu, obayangi sing ojo kuya ifadi ba lati sing. ²⁷ Lofa neyene sing, sing ho nahihwanahiso sing nihatemeni ho lolohitwaha. Lolohitwahaji ho padiri ho nahifiasu sing, ²⁸ ojo, "Ohiramahi jie ite ojo ongida obu itejianati tanya fure, nyuo hati te itufutata Yerusalem to na hitejiana hote, cebu iwahata iyeno nohoto hale twani niho jie." ²⁹ Nyuo hati Petur ho lahejifitok ho nahitarang sing, "Ongida ijie ohibayang Najyok obu lati. ³⁰ Najyok ho monyie hojie la itubuhu Yesu, lofa ifadasite, to nayihahiso hote ngete nikiani. ³¹ Na jyok ho natingon ngete ho nahihwanahiso nitieten hehene ongida ora ahetalahani ho lati, ongida isiarahi nahiwaha niho Isarayil, ho nahibalahiso hepalita. ³² Ahi tel ijie hunya reji, cebu Nolohailong Na- Onyila, lofa isiarahi Najyok niho hulo obayangi ngete. ³³ Lofa netiyiri lolohitwaha anyani, ilongojite fa bebe ho nawahan ifadariso lahejifitok. ³⁴ Nyuo hati lobo latwani niho laharisak la onya nafure Gamaliel, lahetejianani hechihita, lofa obayangi lati fad, ho nadeto nihide ho nahiramahiso ojo ongida iyare lahejifitok niger soni. ³⁵ Tinya ngete ho najiman nihosing, lati ho Isarayil, itiyirati inyi niho nasinge nejimatate ihwanati niho hula ti. ³⁶ Niho hinihe noho longi fa, olotu fa Teudesip ara ngete atwani, ho lati hilihe, orahi namiya ongon ho nahijifito ngete. Ifadari fa ngete, ho nahitasarariso hulo fa ijifite ngete fad alotu obwonan naharus. ³⁷ Nihalu hale twani, Yuda lo Galileya ho nadetino niholongi ho nofa ikianariti lati ho nahiyaru hilihe lati nihalu ho ngete. Ngete cebu ho nayeyi, ho lati hulo fa obayangi ngete ho nahisarariso. ³⁸ Tahanya ajo ne nihote, to bwanata angida niho hule ti cebu idahisi sing hama, kuya nara anya higiama noho lati, ipireri hadi. ³⁹ Kuya nara noho Najyok, obu bete itumata ilanyusu ngete; ihorihisi bate ojo ingalasetete ho Najyok." Tinya sing ho nahiruhohiso. ⁴⁰ Sing ho nangialan lahijifitok ho nabeho sing ho nahiramahiso sing ojo ongida sing obu otianya to nafure ho Yesu, ho nahidahiso sing ofwa. ⁴¹ Sing ho nahidahiso lolohitwaha to nakwama ojo ekianahini sing nihipadata to Nafure. ⁴² Niho noholongi fad, nitempulo cebu to nahai, itiringe fa sing itejiana cebu itotose Yesu ojo ngete Kristo.