¹ Tahanya to nalotinido ho Lohobu hojie Yesu Kristo cebu ho natubahino harabito nibwonitere hongete: ohifiasu jie ite hilasirak, ² ojo ikie obe ohiyeyale ite kerem kuya otegiame, kuya to nolohailong, to nahiram, kuya to newaranga nobokialare to ho olotu niho jie, niholong na olotinere Lohobu. ³ Ikie lobo latwani obu ohitonong ite niho tebwo nehoi. Obu hadi ngete olotu many nalotu nahuyarita niger, cebu netetelehini latwani la itwongo obe nechihit, iha lahepapalani. ⁴ Ngete la itirisa cebu otingito nakwan hongete na orohojaya niho latwani la ongele Najyok kuya la omoje. To nahigiama hongete, itwongo ngete nilohitomojore ho Najyok ho nahitarak ngete toho Najyok. ⁵ Ibe te ihuyasu lo fa abwon nitere ne da hotr, ahiramahi ne ite hunya reji? ⁶ Tahanya ejienatate nanyuo itik ngete, ongida ba iteleni ngete niholong na otirahi. ⁷ Nalunya hecihita egiama, obwon lobo latwani la itihito ngete tahanya many neyare ngete niger. ⁸ Iteleni hadi la obe ojien necihita, la hadi ifadaya Lohobu Yesu to nolofune ho hohutuk ho ngete. Itingiru hadi ngete nifok to nalotiniso hongete. ⁹ Nalotiniso ho twani la obe ojien nechihita ora ba to nahigiama ho lahesuswani ho nagolon ho ngete fad, nahiteleyehita, ¹⁰ ho nahigemita ho gesemi fad noho nabiangan ingidari. Orahi hadi hunya reji noho ehule oyeyise, tananyuo obu sing ohorihini nakwama ho tarihe niho sing nihitalahinere. ¹¹ Tanya tianya osulariso Najyok sing negiama no roho ongida sing iruhi nagesemi, ¹² Nolohichungi hongete, ongoti hadi nahigemita ho sing fad, hula obu iruhi natarihe nyuo hati iyare nakwama niho narohoji. ¹³ Nyuo hati ongida ijie ohisiarahi nawaa niho Najyok to te, helasirak hula okwama Lohobu. Ahinyumu ite Najyok alochifot nihitalahino itinyilaj natajio hote to nolohailong ho nahiruk noho natarihe. ¹⁴ Ngete anya na ohingelenere ngete ite to nafanjelio nihorihinere nakwatan ho Lohobu hojie Yesu Kristo. ¹⁵ Iniafata natarihe hu lo fa ohitejieni ite, tanatianya kuya to newaraga. ¹⁶ Tahanyani ikie Lohobu hojie Yesu Kristo to nakwan hongete, ho Najyok Monye hojie la ohikwama ijie cebu ohisiarahi ijie nahitotoso na osio ho nagolon noho namoi na ongida to nangidari, ¹⁷ nahitotoso cebu ihuhumahi natajio hote negemita huja ongidari cebu natianya