1 Tahanya, egierehi ne nihote, hilasirak, anya iwaraga ho ne noho harik nihitekenyinere nohosi hote, 2 ongida ite ihuyasu netenyita hulo fa otenyi berien to laheramahitak ho hiramita ho Najyok hula onyilaji cebu natianya ho Lohobu hojie Lahetalahani hara niho lahejifitok 3 Tojiana anya soni, ojo ofwoni hadi lati hula okeniterete lati ikenitere ite, toho owahiterete sing, 4 ojimi, "Ajiha nangata hoyitiniso hongete? Ayeyi fa monyie hojie, nyuo hati iyuhuni nareji fad nimaji many tolochifot hobia(ho fok.)" 5 Olulwere sing bebe anya, ojo ihuhumuni fa nahide ho nafok to hari cebu tanahari, many to berien, ta natianya ho Najyok- 6 ce bu ta natianya ho ngete ho nahari nafok niheni holong, imuhoyo fa nolobulang ho , ho nabunyoriso- 7 Nahide ho nafok otunahine tene tianya ho hima, na otunahini nihene holong hongotere ho hiramita ho nahipalariso ho lati hula obu owahi Najyok. 8 Ikie anya obu iluny to higigilita hote, hilasira ho hinasira, ni hene holong niho Lohobu, okialare hadi to ho nengaji nalif abito, cebu niho hunya hengaji nalif abito okialare hadi to ho noholong abito. 9 Obu Lohobu iyimita toho igigilerete hilihe, nyuo hati orie ngete nihote. Obu ngete owak lobo nihote ongida oye, nyuo hati owak ngete ite fad iwahati. 10 Nyuo hati, olotu hadi noholong ho Lohobu toho lahohwalani. Otuhohino hadi nahide ta nahigwogworita na okwat. Nareji huja ongidari oswahari mohite to nahima, cebu ongoti hadi nafok ho nahigemita huja obwoni da. 11 Toho itorohojari hadi hunya reji fad niho anya hoi, irahata hadi to ho ahuli ati niho nemanyita hote cebu nijianari Najyok? 12 To wahata cebu iruhariti to ho nihatemeni nalotiniso ho holong ho Najyok, nahadi ibunyojierete nahide to nahima, nareji fad huja obwoni nifok olojwahe hadi ninwahan na ogol. 13 Nyuo hati ohiwak ijie nangejuk ho hide cebu nengejuk ho fok na ongat ngete, namaji na obwonitere nangidari. 14 Ngete hana, hilasira ho hinasira, toho iwahatete huja reji, itwengete hula obe ibwanata ho nepal, cebu ongida ohihorihini ite ibwanata ho nayomo ho ngete. 15 Cebu ihwanahisi nariajan ho Lohobu hojie ahitalahiniso, to ho igierehinere hilasi hojie Paulo nihote, toho nagianyan na isiarahini fa niho ngete. 16 Otenyitito paulo hunya reji niwaragaji ho ngete fad, obwoni nareji hinihe huja ogoli tanajianan. Lati hula obu orahi alohejehi ce bu hula okakanyahi, orahi sing alati hula ogesemi nireji itapalahanyarite sing hunya reji, to ho ihwanariti sing hinihe nabuhi, nihipapalarita hosing. 17 Ngetehana, hilasira ho hinasira to ho ejianatate huja reji, itiesete nakwanite hote, ongida obu ohiyare ite niger tahitononongita ho lati hula obu ojieni nechihita, ga ba ite itilitasi nahiruk hote. 18 Nyuo hati, toboloroto niho namehino cebu nilofero ho Lohobu hojie lahetalahani Yesu Kristo. ikie nakwatan obwon niho ngete tahanya hojik. Amen!