1 Simone Petur, lapiti, ora cebu ahejifiteni ho Yesu Kristo, niho ehule ahorihini na hiruk na ongida toho ohorihinere ijie, nahiruk nipitan ho Najyok ho lahetalahani ho Yesu Kristo. 2 Ikie na ngidari ho Najyok obwon nihote, ikie nayomo ofunahino nihote tonolofero ho Najyok ho noho Yesu Lohobu hojie. 3 Nareji fad huja ihon Najyok to nahifirang ho ngete cebu ho nemanyita esieri niho hojie to nolofero ho Najyok, la ohingeleu ijie tanakwatan ho nabwanan ho ngete. 4 Tohunya, isiarahi fa ngete ijie nengatita huja ongidari. Ihon fa ngete anya ojo ongida ite ihorihisi nehorita ho Najyok, to efurusute niho nahoholiso na obwon inyi nifok ho nemanyita huja orohoji. 5 Tanya hiram, ihwanati nangidari hote nihorihinere nabwanan hote to nahiruk, to horihiso nolofero. 6 To nolofero hote, tohorihiso natuna ho kwan. To natuna ho kwanite hote olotu nadihan.Tanadihan ihorihisite nemanyita ho Najyok. 7 To nemanyita ho Najyok, ite ehorihisi nakwama ahilasira. Cebu to nakwama hilasira, tohorihisi nakwama. 8 Nabwoni hunya reji nihote, obolori nihote, obu ba te ibotiati kuya obu iyisete nilofero ho Lohobu ho Najye Yesu Kristo. 9 Nyuo hati niho latwani lo obe ho hunya reji otiala ngete nanyuo lonyiha tang; angodo ngete. Alulworo ngete nahilalariso holo ngoro hepalita ho ngete 10 Inaha hilasira/ihwanataha angida nihihuhumari nangelesere ho nanyumuniso na otiriha tarihe nikwanite hote. Nehwanatite hunya reji, obu ba itwamahitati. 11 Ongahini hadi nolokoli nihote nihang na osio jik noho Lohobu cebu lahetalahani hojie Yesu Kristo. 12 Ngetehana abwonitita ba ne nihituhuyahitari ite niho hunya reji, adobu ijianatate sing, cebu ite ifirangata nihiruk tahanya. 13 Egigilo ne ojo ongida niho ne nihitedetinere ite cebu nihituhuyahinere ite to hunya reji, hamanya ne nihanya haji. 14 Ajieni ne ojo anyiha ne nahiduhariso nahaji ho ne niger, toho itelehi Lohobu hojie Yesu Kristo niho ne. 15 Ehon hadi ne na ongida nihote nihihunita hunya reji tihitik lomo nalo ne. 16 Obu jie ohijifito nodohoji huja okufuni tonolofero hogesemi no fa nahiramahi jie holong ohiramahinere nihote nahifirang ho naleyeji ho Lohobu hojie Yesu kristo, nyuo hati, ohira fe jie ahatialak ho bolori hongete. 17 Ohorihi fa ngete niho Najyok Lamonye nabayangi ho nakwatan no fa natianya namurut niho niho Nakwatan Na obolo ojo, "Ngete ale Iha ne, Lahito ho litaji, la akwama ne tung." 18 Ahitiyir ijie anya murut na olotu to hide, lo fa ijie ohibwon ho ngete nihide ho denge na onyila. 19 Ohibwon ijie ho netenyit ho Lohobu no fa ojo natarihe, na igiamatate angida. Okialare ho nahima na ofarang nimaji nerwok many olotu na fangan, ho nahangeri ho fangan otulohino nitajio hote. 20 To jianataha anya so, obu natianya na igierehino olotu tanahigigilo ho laheramahitak ho hiramitani ho Najyok. 21 Hobu ibwo nahiram olotu tanawahan ho latwani, nyuo hati ta lati hula atingere to Nolohailong Na- onyila ngete lotianya niho Najyok.