¹ Ohijien ijie ojo nara nafok alohitwongere na ohitorohojaya ijie,ohibwon ijie ho nahaji niho Najyok. Nahaji na obu ifahi to latwani, nyuo hati nahaji na osio, nihide. ² Niho anya haji ohiyogolo ijie, itilasere nahitejiefito to nabongoji hojie huja obwoni nihide. ³ To nahijiafahiso ngete obu otum ohihorihini ijie ongida obu longature. ⁴ Ohibwon ijie niho anya haji, oyogolo ijie nibwanari ho namiajan-obwo nojiman ohiwak ijie ojo ongida obu ohitejiefi . Nyuo hati, ohiwak ijie ojo ongida ohitejiefi ijie, ongida nasinge na omudang olitahi nihisu. ⁵ Latwani la ihuhumahi nihojie anya singe ngete Najyok, la ohisiarahi ijie Nolohailong toho namojo na olotiniso. ⁶ Inaha tobwanata ho nahiruk tihitek. Tojianata ojo nomo nahibwon ijie nihang nikwan, ohilama jie niho Lohobu ⁷ (ohidaha jie to nahiruk, obu to natiala). ⁸ Ongida ohibwon ijie ho nahiruk; ongida nihojie nilamajari tokwan nyuo hati nihang ohibwon ho Lohobu. ⁹ Ohihon ijie ho alotirat hojie, kuya ohibwon ijie nihang kuya ohilama to hang, nihitokwamari ngete. ¹⁰ Ohibotia hadi jie fad nilongotere ho hiramita, ojo ongida lati fad omojini nasinge na isiarahise to nareji huja igem nikwan, kuya noho ngidari kuya noho rohoji. ¹¹ Inaha, najianan nabayangi ho Lohobu, ohilelia ijie niho lati. Otiala Najyok nabwanan hojie. Egigilo ne ojo ejianatate. ¹² Obu jie ohiramahiso nakwanite hojie niho nihote hari, nyuo hati ohisiarahiso ijie ite natianya ongida ite ipufati tojie, ojo ongida ite ibwanata ho nahitarangi niho ehule otadare to nanyilaji ho kwanite hosing nyuo hati obu to nasinge na obwon nitaji. ¹³ Nejimatate obu jie ohigigilo, ora niho Najyok; cebu nejimatate opit nahigigilita hojie, ora to nangidari hote. ¹⁴ Nakwama ho Kristo lohitugulihi ijie, ojo ohiruk ijie niho anya: ojo oye latwani abito to lati fad,cebu inaha ojo ayeyi fad. ¹⁵ Oye Kristo to lati fad, ojo ongida hula isuji obu itwonge to nakwanite hosing.Nyuo hati, ongida sing itwonge to ngete lofa oye cebu itubuhuni. ¹⁶ Tanya hiram, niho tahanya toho nihatemeni obu jie ohingot nepal ho lobo toho ongoterete lati, dobu ohitarak fe jie Kristo niho anya hoi. Nyuo hati obu jie ohingot nepal ho lobo tohoja hari. ¹⁷ Inaha, nabwon lobo niho Kristo, abieni ngete angejuk. Aringari nolongoro ho reji. Totiala,alotu rahan angejuk. ¹⁸ Hunya reji fad ofwoni niho Najyok, ohitilahi ijie nikwan hongete to Kristo, ho nahisiarahiso ijie nahigiama ho hitoyomo. ¹⁹ Ngete, niho Kristo itoyomohiso Najyok nifok nikwan hongete, abu ikianahi nepalita ho hititihito nihosing, ho nahisiarahiso nihojie natianya ho hitoyomo. ²⁰ Ahinyumuni ijie a hahonyehite ho Kristo, to ho ilelia fa Najyok to jie. ohimojo ijie nihote, to Kristo: ''Toyomete ho Najyok!'' ²¹ Ihuhumu ngete Kristo ora eyalita hepalita hojie. Ngete la obe ipalaya. Ihon ngete anya ojo ongida ijie ohira ahangidarak niho Najyok.