1 Nilohichungi, hilasirak, ohitotoso jie ite cebu ohisingahi ite niho Lohobu Yesu, ojo to ho ihorihisi te nahiramita nihojie nijiman tatalite hatumata idaha cebu itokwamati Najyok, toho idaharitite-ojo ongida te ihwanata bebe. 2 Ijianatate ahuni tenyita ijie ohisiarahi ite hara niho Lohobu Yesu: 3 Ngete anya nawahan ho Najyok, nihitinyilaja hote-ojo ongida ite idahisi nahiram hosomon, 4 ojo ongida te ijianata nitunari nangorwo hote niho ninyilaji cebu ho nibayangi, 5 obu lora to nahigeria(toho ihwanariti paganoji hula obu ojieni Najyok), 6 to naja obe lobo otum ipalaya niho hilasi hongete nihanya tianya, tananyuo ora Lohobu ahifadani niho hunya reji fad, toho ahiriagari jie ite cebu ohiramahi ite. 7 Obu Najyok ohingeleu ijie nihibot, nyuo hati ninyilaji. 8 Inaha, ngete la idaya anya obu ngete idaya lati nyuo hati Najyok, la isiarahi Nolohailong ho ngete Na-Onyila nihote. 9 To nakwama ho hilasiri obu te iwahata lobo latwani igierehi nihote, ite to nakwanite hote ahitejien ite Najyok nikwamari nakwanite hote. 10 Tarihe, ehwanatate niho hilasirak hote fad hula obwoni Masedonia, nyuo hati ohisinga jie ite, hilasirak, ojo ihwanata ngete dobu bebe. 11 Ohisinga cebu ijie ite nihiningere, igiamati nahigiama hote, igiamati to nehes hote, toho ohiramahinere jie ite. 12 Ihwanati anya ojo ongida ite idahati angida nibayangi niho hula obwoni niger to hiruk, cebu ongida ite obu iwahata ibwo nasinge. 13 Obu jie ohiwak ite obu ijianata, hilasirak, niho hula ogete, ojo ongidate obu ilongojitati toho lati hilihe hula obu obwoni ho najianan namoi. 14 Nahiruk ijie ojo oye Yesu cebu imuhu hari, dobu Najyok iyeno hadi ho Yesu lati hula ahuyari igete hongete. 15 Tanya ohijojie nihote tanatianya ho Lohobu, ojo ijie hula hohisu, hula ohidahini nilotiniso ho Lohobu, obu hadi jie ohifwo nihatemeni he hule agetere. 16 Lohobu to nakwan hongete ongiru hadi to hide, tanakwatan, tanamurut ho lolohitwahaji ho anjilo, to nangobwo ho Najyok, ho lahayeyak niho Kristo ibuhuni hadi berien. 17 Tinya ijie hula hohisu, hula ohidahini, harabito hosing ho nahitilaru nidis nihiriamari ho Lohobu nilobwangi, tinya ohibwonita hadi jie tihitik ho Lohobu. 18 Inaha, itotosete nakwanite hote to hunya tenyita.