¹ Ite to nakwanite hote ijianata te, hilasirak, ojo nafwoniso hojie nihote obu orohojaya, ² nyuo hati ahipadata fa jie cebu ohitegiama nihiji ho lati to Filipi, to ho ijianatate. Ohifirang fa jie niho Najyok hojie nitianyari nihote nefanjelio ho Najyok nihiji ho ngalasu. ³ Obu natianya hojie olotu tepal, kuya to hibot, kuya to gesemi, ⁴ nyuo hati to ho ohinyimu Najyok ijie ongida ohigiama to nefanjelio, ohitianya jie, obu nihitokwamari lati, nyuo hati Najyok, la otiala natajio hojie. ⁵ Hobu jie ibwo noholong ohitenyu ibwo natianya na orohojaya, to ho ijianatate, kuya noho hitunuhura to narohoji, otiala Najyok, ⁶ kuya ohitahito jie nakwatan niho lati, kuya nihote kuya niho hilihe, lofa nahitum ijie ohihorihi nengidarita ho rahan ahejifitok ho Kristo. ⁷ Ati, ohirie fa jie to hiji hote to ho nomo itatangari hotohito lemusak hongete. ⁸ Ohibwon ijie ho nakwama nihote; ohikwama fa jie nihiramahinere ite obu nefanjelio hama nyuo hati cebu nahisu hojie, tananyuo efwosu te rahan ahangidarak nihojie. ⁹ Ihuyasu, hilasirak, nahigiama hojie cebu nahigiama hojie na ogol: ohigiama jie naharie ho nafarani ojo ongida ijie obe ohira ahetegiamak niho lobo to hiji hote, nahitotoso jie nefanjelio ho Najyok nihote. ¹⁰ Etialatate, cebu Najyok, tatali ijie ohingida nihote hula iruhoto, to ho ijianaritite nikwanite hote, ¹¹ to ho orahitere lamonye limusak hongete, ohigem ijie cebu ohitogol ite cebu ohiramahi ¹² ojo ongida ite idahati to nadaha na ongida niho Najyok, la ohingeleu ite nihang hongete cebu niho nakwatan. ¹³ Tanya tianya ohisiarahita ijie nawa niho Najyok nihitik, ojo, lofa nehorihisite natianya nihojie, natianya ho Najyok, eruhotote ngete obu atianya ho twani, nyuo hati,toho orahitere ngete atarihe, natianya ho Najyok, na cebu igiama nihote hula iruhoto. ¹⁴ Nihote, hilasira, hula ifwosu rahan ahitetiamak ho kelesiaji ho Najyok huja obwoni Yudeya niho Yesu Kristo, ipadatati fa cebu te to hunya reji niho lati hote, toho ihwanariti fa sing to Yahud, ¹⁵ hula ifadari Lohobu Yesu ho laheramahitak ho hiramata ho Najyok, ohirohori ijie niger, cebu hula obu itokwami Najyok nyuo hati ingereji niho lati fad. ¹⁶ Oriamariti sing ijie natianya niho paganoji ojo ongida ba sing italahine, ongida sing obwoni ho nepalita tihitik. Olotu narohoji nihosing na obolo bebe. ¹⁷ Ijie, hilasira, ahihwarari fa ijie nihote to noholong hinihe kai, nihatemeni, obu nitaji, ahigem ijie na otum to nawahan na obolo nitialari nohomomite hote, ¹⁸ tanawahan hojie ifwoniso nihote,ne Paulo hari, nyuo hati Lahesuswani ohitik ijie. ¹⁹ Nyuo hati nanyuo nagolon hojie noho namoi, kuya nakwama, kuya nengita ho hitokwata-obe lora ite toho orahiterete lati hilihe-nihetemeni ho Lohobu hojie Yesu Christo nilotiniso hongete? ²⁰ Irahatate akwatan hojie cebu akwama hojie.