1 Lemusak ho ne, egierehi ne hunya reji nihote ojo ongida ba te obu ipalasi. Nyuo hati lepalaya lobo, ohibwonitere jie ho latwani la obwotia ho Monye, Yesu Kristo-latwani la ongida. 2 Ngete la isiarahi nakwan hongete to nepalita ho jie, obu to jie hama, nyuo hati cebu to nafok fad. 3 Tanyani ohojien ojo ohijien ijie ngete, nomo nahinef ijie netenyita hongete. 4 Ngete la ojo, "Ajien ne Najyok,"nyuo hati abe inefito nechihita hongete, ora ahagesemeni, cebu obe natarihe nihongete. 5 Nyuo hati la inefito netianya hongete, tarihe niho ele twani etufutahini nakwama ho Najyok. Tanyani ohijien ijie ojo ohibwon ijie hongete. 6 Ngete la ojo iwasihi ngete niho Najyok ikie ngete to nakwan hongete cebu odaha to ho odahari fa Yesu Kristo. 7 Abu ne egiero nechihit nangejuk nihote, nyuo hati nolongore hichihit na ebwoniteretete many berien. Nolongore hechihit ngete natianya na itiyiratate. 8 Nyuo hati, egierehiso ne nihote nechihit nangejuk, na otirahi niho Kristo ho nihote, tananyuo alo nidimele ituhohino, natarihe ho fangan afarang. 9 Ngete la ojo abwon ngete nifangan nyuo hati oliwa niho hilasi obwon ngete nidimele dobu tahanya. 10 Ngete la okwama hilasi iwasihi nifangan obu ibwo noholong ho hititihito nihongete. 11 Nyuo hati ngete la idaya hilasi obwon nidimele cebu odaha nidimele; obu ngete ojien aji ngete olo tanyuo itongod nedimele nohonyehite hongete. 12 Egierehi ne nihote, lemusak ho ne, tananyuo, alahahini nepalita hote to nafure hongete. 13 Egierehi ne nihote, monyie, tananyuo ijianatate ngete la obwon many berien. Egierehi ne nihote lahilahaji, tananyuo eyalasite laharohojani. Egierehi ne nihote, lemusak hula ho mutari tananyuo ijianatate Lamonye. 14 Egierehi fa ne nihote, monyie, tananyuo ijianatate ngete la obwon many berien. Egierehi fa ne nihote, lahilahaji, tananyuo igolotote cebu natianya ho Najyok iwasihi nihote, iyalasite laharohojani. 15 Hekwama nafok kuya nareji huja obwoni nifok. Nakwama lobo latwani nafok, obe nakwama ho Lamonye nihongete. 16 Nareji fad huja obwoni nifok-orahi awahan ho kwan, awahan ho honyehite, ho nahitadara ho manya-obu lora noho Lamonye nyuo hati noho nafok. 17 Nafok ho nawahita hongete otuhohine hadi. Nyuo hati latwani la igiama nawahan ho Najyok osio hadi jik. 18 Lemusak, ngete anya nolohichingi ho holong. To ho itiyiraritite ojo latwani la idaya Kristo alotiniso, dobu tahanya afwoni lati hula idayari Kristo, na ohijieniterejie ojo alotiniso nolohichungi ho holong. 19 Afwe sing niger to hiji hojie, nyuo hati obwo fa sing orahi alohojie. Hara fa orahi sing alohojie hewasihini dwo sing niho jie. Nyuo hati lo fa nafwe sing niger, itelehi ojo obu sing orahi alohojie. 20 Nyuo hati ibwanatate ho najwaha niho Lahanyilajani, cebu ijianatate natarihe. 21 Abu ne egierehi nihote ojo obu te ijianata natarihe, nyuo hati ijianatate ngete tananyuo obe nagesemi niho natarihe. 22 Ngai lahagesemeni nyuo hati ngete la obwon najiman ojo ora Yesu a Kristo? Ora ale twani amereni ho Kristo, toho amon ngete Lamonye ho Lonyi. 23 Obe lobo latwani la omon Lonyi obwon ho Monye. Latwani la iruk Lonyi obwon ho Monye cebu. 24 Toho nihote, ikie natianya na itiyirusu te berien iwasihi nihote. Newasi natianya na itiyirusu te berien nihote, iwasihi ba cebu te niho Lonyi ho niho Lamonye. 25 Ngete anyani nangatan na isiarahi ngete niho jie: nahisu na osio. 26 Egierehi ne hunya nihote to hula ba ohiyare ite niger. 27 To ho nihote, najwaha na ihorihisi te nihongete ikie iwasihi nihote, obu te iwahata lobo latwani ongida ohitejien ite. Nyuo hati najwaha hongete ohitejien ite nareji fad cebu otir obu ngete ongesem, dobu to ho ahitejien ngete ite, iwasihisi nihongete. 28 Tahanya,lemusak ho ne, iwasihisi nihongete, ongida lomo naleyo ngete, ongida ijie ohibwon ho nagolon obu ohibwon ho nariri nihatemeni hongete nilotiniso hongete. 29 Nejianatate ojo ongida ngete, ijianatate ojo latwani la oyisini niho ngete