¹ Ngapa makalyero a mayi Jeso Kresite, mwana Mulyumo. ² Shiyata ñoruwa ku muporofita Haizaya, '' Lyaya, ndatitumina mutumisi, ika ku rukisa injira. ³ liyi i lya tudzwa mwikanda, ''U rukise injira u Mulyumo; Iwarushike.'' ⁴ Johani akuya, kukorobezwa mulikanda indi kuruta i korobezo iyu kubashira zibye. ⁵ Lyuvu kolyo mo Judea indi Jerusarema ba kwenda kuke. Batatupikwa ku Johani mwinda iya Jordan kubashira zibe zawo. ⁶ Johani matarara shiraro ishi kamere indi rukanda ru shikabi mushudqu shake, kakulya baxhosi indi ziñishi. ⁷ Mataruta atikya i matiya mumapwake mugyi nabbi. Kamuninditsingame ndixhopure zishangu kumulyinda. ⁸ Ndatikorobeza shami yeme yeye matini korobeza shimupupo womuchena. ⁹ Shilyiba lyopa jeso a kudzwa mumuzi a nazareta mu munzi wa galilea, i matamutupika mwami i johani mwinda iya jordani. ¹⁰ Jeso mwinako yifupingaho kakudzuwuka. aku mwana liro kalilyayazuka mi mupupo uwa tufwana nokoti ukyiri watu mutyeshira kokuke. ¹¹ Kwakuyuvwahara liyi ilyatudzwa kuliro. ilyatitikya yopa i mwananga indatishaka yindatitwa nabbi. ¹² Popangaho mupupo wakumukataza wa wakumutwara mulinkanda ¹³ Mikakwishara mwinkanda mayiba inga mashumi ane akulyukuwa ni satani karana nizibatana bavuyabake ibakumubberishira ¹⁴ Johani kakubikwa mwintorongo jeso akwenda ko galilea kakwenda kuhweta liyi lya mulimo ¹⁵ Akutikya mayiba kalingamana indi muwuso wake kawa sheri shufupi ni bake nitishire liyi ¹⁶ Kakwenda kurukomu lyilyi wate iya galilea,a kumwana simoni indi andreasi muzata simoni akwikyi ka nyandi shikutikya bayambi. ¹⁷ Jeso akutikya kuwo, nindichere, mi mondinipange i batiyamba a bato ¹⁸ Papa ngaho bakusiya tunyandi twawo ba kumuchera. ¹⁹ Jeso pukarukukita kuwuso, a kumwana jakowo mwana zebediya indi johani muzatake,barana mushisepe kushimina kanyandi. ²⁰ Akubabera bakusiya shawo zebediya muwoto ni bavuya bake, bakumucera. ²¹ Barukuya mo kapenauma,rwi sabata,jeso akwenda muma sinagoge aka ruta. ²² Bakulyangana kuzaliku ruta, kakuruta nokoti una i qhumu katandi bañoli. ²³ Popa munyana mo sinagoge ikarana mupupo wo mubbi aku shupura. ²⁴ Akutikya shikya shimatishaka atikya tirasi, Jeso iya Nazareta? Maya kuti mana? Ndiyizire atikya iwe. U mupupo o mucena u wa mulimo! ²⁵ Jeso akuhweta kumu pupo akutikya tupo,Tupo wakudzwa kuke ! ²⁶ Mupupo wo mubbi wa ku muwusa peshi wakudzwa kuke kakulira shiliyi. ²⁷ Kowo a bato bata kakamara, Shikya copa? Kuruta kwake kuna i qhumu? I matikwana kurayera mupupo wo mucena kumuwuvwa! ²⁸ Zihweta zake kozo za kwenda muma naha kongo mo galileya, ²⁹ Pukakudzwa mo sinagoge , kakudzwa mwi njiwo simoni indi andreasi, kuru pati rwa jakowo indi johani. ³⁰ Makwenyani a simoni bararanjire baku mashira likyebe baku zira Jeso izakye, ³¹ Kakuya, kaku muyisa shilyanja kumu yimisa, lyikyebe lyakumana,kakukalisa kuba kubapa, ³² Maxshumu yapa ,liba kalicire kuwulya, bakulyeta kuke abato ibatutwanga ibana madimona, ³³ Abato kowo iba muwukuwa bakuya pumumbero ake., ³⁴ Kakupwelisa abato iba kumashira matuku ingahatufwana indi kudzisa madimona,yemwa atishire madimona kuhweta shikutikya bamuyizire, ³⁵ Kakutambuka maxsehumu nanyina, kalyi marungwe kaxsenine, kakudzwa kwenda kushibaka shicimwe yekye kopa aka rapera. ³⁶ Simoni indiba bamwe kuruku mushaka. Bakumushangana bakutikya kuke, ³⁷ Kwetu takukushaka yewe. ³⁸ Akutikya, Takwenda kukumwe, kudzwa mwilinji muwukuwa, kutikya ndika rutye ko, nanga ndakadzwako, ³⁹ Kakwenda koko mo Galileya, kuruta mo sinagoge kudzisa madimona. ⁴⁰ U mutu ikaku mashira imbingwa kakuya kuke. Kakumuringira,akuwa shimadzi akutikya kuke, atimatishaka, undicenise. ⁴¹ Kakumufwera zuxhuma, Jeso kakuwara lyanja lyake, akutikya ndatishaka.Kakupwara ⁴² .Shikupweraka imbingwa yaku mana kakupwara. ⁴³ Jeso aku muzira atikya a kwenda ⁴⁴ .Akutikya, use kuzira a bato cicimwe, u kwenda uka lyumwenisa ku ba prisita, ukabazire izizimpo zimatatyeyiwa ku mushe kulyicenisa kumwanahaza wupaki kuwo. ⁴⁵ Akudzera kuwuso kuhweta ku mutu kweke mayi atikya jeso kashinjena mumizi mushikati karukusikama koshire ni mizi abato ba kudzwa muzibaka koozo.