¹ Bokukezya kushilya limwinya lye wate, ku chishi cha ma Gerasane. ² Kame haho bulyo Jeso aha azwa mu bwato, o mukwame ozyo kakwesi oruho rubbi akukezya kwakwe nakazwa ku mabita. ³ Ozyo mukwame kakara mumabita. Kwazya ozyo kawora kumukwata, nanga ka mawenge. ⁴ Na shiminwa kungi ke nsipi ni ka mawenge. Na mana kuchora mawenge ne nsipi zakwe ni zahasana. Kwazya ozyo kawora kumu kwata. ⁵ Masiku na kamwi mu mabita nomu marundu, kajanganzanga nokukiremeka kamabuwe. ⁶ Aha abona Jesu nasikere kure, akubutukira kwakwe nokuka mu gunkamina habuso bwakwe. ⁷ Akujanganza kezwyi lihanzi, "Zinji ndibotere kutenda newe Jesu, Mwana Nyambe ozyo Ahangeme? Ndikukumbira ka Nyambe eye mwini, washandi shandisi." ⁸ Kakuli ka kwesi a wamba kwakwe, "Zwe kozyu mukwame ewe ruho rubbi." ⁹ Mi akumubuza, "Ndiweni?" Neye akumutaba, "Ndime Chighughi, kakuli tuli bangi." ¹⁰ Akumukumbira kame ne kame kuti asha bazwisi muchishi. ¹¹ Mi omutapi we zigurube kau tafuna he rundu, ¹² mi bakumu kumbira kuti ye, "Tutumine mu zigurube, turukurure tukabire mwazo." ¹³ Cware aku bazuminiza; emyoya mibbi yokuzwa mo noku kabira mu zigurube, mi zoku butukira mwi surumuko lye wate, mi ezigurube kazihura mwa 2000 zakulobera muwate. ¹⁴ Cware abo kabamamere zigurube bo ku butuka no kutwara embuzi kezo ni zatendahara mu munzi no rubazu rwe chishi chonshe. Echighughi cha bantu bo kuzwira ko kukabona ezo zatendahali. ¹⁵ Cware boku kezya kwa Jeso mi boku kezya kubona mukwame ozyo kashuminitwe madimona, ozyo ka kwesi Chighughi, na kere hanshi, na zwesi, mi naliketete nenja mu ngana yakwe, mi boku tiya. ¹⁶ Abo ni babona echo ni cha tendahara ku mukwame ozyo ka kwesi madimona, boku batorokera omu ni kwabira kwakwe ne zigurube. ¹⁷ Bokutatika kumu kumbira ye azwe muchishi chabo. ¹⁸ Mi aho akezya ku kabira mubwato, omukwamwe ozyo kakwesi madimona akumukumbira kuti ayende neye. ¹⁹ Kono kali namuzuminina, kono shamuta ye, "Yende kunjuo yako ku bakwako, ukabasumwine ezo nakutendeli Onfumu, ne chishemo echo nakuhi." ²⁰ Cware akuyenda naya bu jangaza mbuzi yezintu zinene ezo na mutendara Jeso mu Dekapoli, mi abantu bonshe kaba komoketwe. ²¹ Aho akabira mubwato nokuyenda kulubazu lumwinya Jeso, echigugi cha bantu chokumubika hakati, nakere kwimbali ne wate. ²² Zyumwi kubakuru vomu masinagoge, Jairasi, aku kezya, mi aha akezya kumubona bulyo, akuwira ku matende akwe. ²³ Akumu kumbira kame ne kame, kuta ye, "Mwanangu mudana we chikazana shafwa. Ndi kukumbira, kezye obike e yanja lyako hakwe koti abe nenja ahare." ²⁴ Cware akuyenda neye mi echighughi cha bantu choku muhumpa ni bamu zimburukite no kulikakatiza hambali neye. ²⁵ Haho kakwina omukentu ozyo katika maroha ke myaka yoli 12. ²⁶ Nashanda chaha mu mpabarero iba ñanga bangi, mi namana kusebelisa zonshe ezo kakwesi, kuhita kuti ye afwanikize, akuya chaha hanshi. ²⁷ Nashuwa embuzi kuamana ne Jeso. Cware akukezya kurushara rwa kwe nakaya buyenda mukati ke chighughi cha bantu, akukwata ku chizyabaro chakwe. ²⁸ Akuta ye, "Shaka ndi kwate bulyo ku zizyabaro zakwe, mbo ndihore." ²⁹ Aha kezya kumukwata bulyo, na maroha akuzyimana, mi nashuwa mubili wakwe kuti nahora ku shando lyakwe. ³⁰ Haho bulyo Jeso aku azyara kuti yee amanta anazwi kwakwe. Akuzoka mu chighughi cha bantu nokubaza ye, "Ndini nakwati kuzizyabaro zangu?" ³¹ Aba zyiizwa bakwe bokuta ye, "Obwene chighughi cha bantu chili kakatize hako, kame osibuza ye 'ndini nandi kwati?"' ³² Kono Jeso aku chebuka no kushakisisa ozyu natendi bulyaho. ³³ Omukentu, nazyi echi cha tendahali kwakwe, akutiya no kututuma. Okukezya kuwira habuso bwakwe noku musumwina buniti bonshe obu bwatendahali. ³⁴ Aku muta ye, "Mwanagu, entumero yako yakuhazi. Yende ke nkozo ohore ku butuku bwako." ³⁵ Aha kasikwesi a amba, abantu bamwinya bokukezya nebakazwa kumu eteleli wamasinagoge, bo kuta ye, "Mwano nafwi. Chinji osi shandisira ouzyiizi kame?" ³⁶ Cware Jesu akushuwa ezo kaba amba, aku amba ku mukuru wa masinagoge ye, "Washatiyi. Zumine bulyo." ³⁷ Kali nazuminina bantu kuyenda neye, mbita Pitorosi, Jakobo, ne Johani mwance wa Jakobo. ³⁸ Bokukezya kunjuo yo mukuru wa masinagoge, mi aku kabona ko bantu abo kaba tenda erata chaha; kaba lila no kukumbaana chaha. ³⁹ Aha a kabira munjuo, akubata ye, "Zinji mubengete kame zinji mulila? Mwanche azya kufwite kono arere." ⁴⁰ Bo kumusheka. Kono aku bazwisikiza hanje bonshe noku hinda bulyo beshi mwanche ne banyina na bena kakere nabo, mi akukabira mumo kakere omwanche. ⁴¹ Akuhinda eyanja lyo mwanche nokuta ye, "Talitha kumi," itoloka ye, "Mukazana mudana, ndikuta ye, buke." ⁴² Haho bulyo mwanche aku buka no ku yenda-yenda (kakuli kakwesi zilimo zoli 12). Mi kaba komoketwe chaha. ⁴³ Aku ba raera kuti kwazya zyo aswanere kuzyiba ezo za tendahali. Aku bata kuti bamuhe chokulya.