¹ E chighughi chabo chonshe choku nanuka noku ka reta Jeso habuso bwa Pilato. ² Boku tatika kumu hambika, nebata ye, "Twa wani ozyu mukwame na hambusa e nkanda yetu, nakanisa kuha e mpo kwa Sizare, nata ye ndeye Kiresite mwine, nfumu." ³ Pilato akumu kumbira nata ye, "Ndiwe Nfumu wa ma Juda?" Mi Jesu akumu taba nokuta ye, "O amba bulyaho." ⁴ Pilato aku amba ku ma purisita bakuru noku dxhandiya, "Kandi wani bufoso ko zyu mukwame." ⁵ Kono kaba sininika nebata ye, "Areta e ndungati mukati ka bantu, nazyiiza mwa Judeya yonshe, kutatikira kwa Galileya mani mbita kuchinu chibaka." ⁶ Cware aha ashuwa bulyaho Pilato, aku buza heba kali mukwame wo mu Galileya. ⁷ Aha akezya kuremuha ye mu nkamu ya Heroda kawanika, ozyo kena mwa Jerusalema mwelilyo zyuba. ⁸ Heroda aha akezya ku bona Jeso, aku taba hawa, kakuli kasha kanga kumubona. Kashuwanga zakwe, mi kashaka kumubona natenda e makazo. ⁹ Heroda aku buza Jeso muma zywi mangi, kono Jeso kali na mutaba chintu. ¹⁰ Aba purisita bakuru nebañoli boku zyimana ko ku benga niba muhambika e ntaba. ¹¹ Heroda ni bashi nkondo bakwe boku mu tukaura, niba muneya, mi boku muzwatika muzizyabaro zirotu, mi akumu tumina kame kubora kwa Pilato. ¹² Heroda ne Pilato boku ba muntu no muyenze mwelyo ezyuba (kali kaba shuwananga, kaba litoyete). ¹³ Cware Pilato aku kuwa ma purisita bakuru bonshe, neba bayendesi ne dxhandiya lya bantu, ¹⁴ noku amba kwabo, "Mwandireteli ozyu mukwame mbwe muntu zyo a retesa kuti bantu batende zibbi, mi mubone, ndamubuzi habuso bwenu, ndiwana ye kwazya bubbi kwakwe ozyu mukwame kuamana nezo zintu mukwesi mumu hambika. ¹⁵ Inga, ne Heroda neye, kakuli naka muboozi kame kunu kwetu, kwazya chitu cho natendi chiswanera kuti ayayiwe. ¹⁶ Cware eme kwangu mbondi mu shandise, nokumu mi bozekeza. ¹⁷ Komurao, Pilato kaswanera ku rukulwira ma Juda o mushuminwa yenke kumukiti. ¹⁸ Kono bo ku jangaza bonshe ne bata ye, "Mu mutware kwina o zyu mukwame, mi mutu rukulwile ko Barabasi!" ¹⁹ Barabasi kali mukwame ozyo na shuminwa kebaka lyo kurwisa enkamaiso yo munzi we nkamu nobu yayi. ²⁰ Pilato aku amba kwabo, nashaka ku rukurura Jesu. ²¹ Kono boku ongoza ne bata ye, "Mumu kokotere, mumu kokotere." ²² Aku amba kwabo robutatu "Chinji kanti? Bubbi munji natendi o zyu mukwame? Kanda wani chitu kwakwe chi swanera enkaturo yoku yayiwa. Cware shaka ndimane kumu shandisa, mbondi mu rukurure." ²³ Kono kaba sininika hawa nama zywi ahanzi, neba raerera ye a kokoterwe. Mi kuma manikizo ama zywi abo oku koma Pilato. ²⁴ Cware Pilato aku muha e nkaturo komo kabashakira. ²⁵ Aku rukurura zywina kaba kumbira, ozyo na bikiwa muntorongo kebaka lyo kurwisa enkamaiso yo munzi we nkamu nobu yayi. Kono eye Pilato aku baha Jeso kuti bamutende monshe o mo kabashakira. ²⁶ Aho kaba mutwara kumu zwisa ko, boku kwata Simoni wa Sayirini, nakazwa mu chishi, no kumu kulikisa e chifapano ye achi hinde, kuchilira Jeso. ²⁷ E dxhandiya lya bantu, na bakentu abo kaba chokete myozyo neba mulilira, boku muchilira. ²⁸ Kono aku zokera kwabo, mi Jeso aku amba kwabo ye, "Bana ba Jerusalema bechikentu, mwasha ndi lilili, kono muli lilire enwe mubeni na banenu. ²⁹ Kakuli, mutonde, akezya mazyuba awo shaka nibate ye, 'E nfuyauzi zabena kaba paki nama bumo kali niya paka, nama nshwe kali niya nyonsa.' ³⁰ Mi cware mbuba tatike kuamba kuma rundu ye, 'Tuwire nokutu fupika.' ³¹ Kakuli heba nebazi tenda ezo nechi shi rotuhite chishamu, chintu munji shaka chitendahare shaka nechi zyume?" ³² Bakwame bobire, a bacholi be mirao, niba twaliwa neye kuku ka yayiwa. ³³ Aha bakezya kuchibaka chi kuiwa "Kahinga (Mutwi Wochifuha)," kuko niba mu kokotera naba choli be mirao, yenke ku bulyo bwakwe ne zyumwinya ku mubaba. ³⁴ Jeso akuta ye, "Tata, bakwatire, kakuli kabazyi echi batenda." Mi bokuzana enjuka noku tahira zizyabaro zakwe. ³⁵ A bantu kaba zyimene neba tonderere, a ba busisi nabo nebakwesi bamu shwaura, nebata ye, "Natusa bamwinya, mumusiye akituse ye mwine, heba ndeye mu Kireste wa Nyambe, ozyo a ketetwe." ³⁶ Bashi nkondo nabo nibamu shwaura, neba mukezyera, noku mu nywinsa zirura, ³⁷ nebata ye, "Heba oli Nfumu wa ma Juda, kihaze." ³⁸ Kawina chisupo hawiru lyakwe, "Ozyu ndo Nfumu wa ma Juda." ³⁹ Zyumwinya waba choli bo murao aku mushwaura nata aha ye, "Kali ndiwe mu Kireste? Kihaze, neswe ko." ⁴⁰ Kono zyumwinya okumu kalihira, "Kotiyi Nyambe, nobwene ye newe munkaturo iswana okere? ⁴¹ Eswe mane tukere hanu ke nswanero, kakuli tuwana entuwero ituswanere ye zitendatu zetu. Kono kwazya chibbi echi natendi ozyu mukwame." ⁴² Mi aku wekeza, "Jesu, nondi hupure shaka no kabire mu mpuso yako." ⁴³ Jesu aku amba kwakwe, "Fwe ndi amba kwako, shunu mbobe neme mu paradaisi." ⁴⁴ Kaili kenako ye anja ni konke, kwa kezya okusiha muchishi chonshe mbita ke nako ye anja ni to ne ⁴⁵ aho ruzima ru monyi rwe zyuba. Cware esira lyo mu tempele lyoku ñatuka hakati kuzwa kuwiru mbita hanshi. ⁴⁶ Na jangaza ke zywi lihangeme, Jesu akuta ye, "Tata, ndibika ruho rwangu mu ma anja ako." Aha amana kuzi amba ezo, oku fwa. ⁴⁷ Aha abona zintu ezo niza tendahara, mu yendesi wa bashi kondo (ba maRoma), aku ha Nyambe e ntumbu, nata ye, "Fwe, o zyu mukwame Kachena." ⁴⁸ E dxhandiya yonshe eyo neya kezya hantu honke kuku bona zitendantu, niya zibona e zi neza tendahara zonshe, niba boora neba kidama hazi zyuba zabo ke chisupo choku choka myozyo. ⁴⁹ Kono abayenze bonshe, na bakentu bo neba muchilira ku kazwa kwa Galileya, niba zyimanina kure, nebazi rwerete bulyo. ⁵⁰ Haho, kakwina o mukwame ozyo ka kuiwa Josefa, kali zyumwinya wa be nkuta yama Juda, o mukwame murotu achena ⁵¹ (kali kazuminizana ne nkaturo ne chitendantu chabo), kazwa mu munzi wa Judeya, mu chishi cha Arimateya, mi kalindire o mubuso wa Nyambe. ⁵² Ozyu mukwame, akuyenda kwa Pilato, aku kumbira o mubili wa Jesu. ⁵³ Aku u hangura, noku u bunga mu chisira chirotu (sina mu kaba tenderanga), noku urazika mu bita e lyo nilya zyakwa ha ma buwe, omu kaku shini ku zikiwa o muntu. ⁵⁴ Se kakuli Ezyuba lye Ntukiso, mi e Nsatata shika itatika. ⁵⁵ A bankentu abo niba kezya kuzwa neye mwa Galileya, boku mucilila, noku kezya kubona ebita, namomu niwa razikiwa mubili. ⁵⁶ Boku boora noku ka rukisa tununka jenja na mafuta (sina mu kaba tenderanga). Mi rwe Nsabata boku shwena kuya ko murao.