¹ Jesu hape A kuta ku bazyiyiswa. Kakwina zyumwi omukwame afumite ozyu kena omuyendesi. mi nikwa kasumunwa kwakwe ye ozyu muyendesi ka zyonaula ezimunantu zakwe, ² Ozyo mufumi aku mu kuwa no ku muta ye. Ezi ndi kushuwile kazo zinji? O li tabilile ko muyendesezo wa ko,kakuli ko shioli kuba muyendesi. ³ Omuyendesi akulita yemwini, Cinji ndi ola o kutenda,mfumwangu ahasha nditapa omusebezi wangu wo buyendesi? Ndaazya ezifuha zo kusa,mindifwa enshoni okukumbila. ⁴ Ndizyi eci shaka ndi tende,okuta ye sha ke ndi zwisiwa ha musebezi wangu wo buyendesi, abantu ni ba ndi tambule mu mazyuwo a bo. ⁵ Paho muyendesi sha kuwa zyumwi nozyumwi ozyu ka kolotela mfumwe, mi a ku buza we ntanzi,zoti o kolota kwa mfumwangu? ⁶ A ku ta ye, mwanda we ntikanyo ya mafuta e olive. mi a ku muta ye,Hinde cikoloti cako,Hwele kukala hanshi,mi oñole makumi e anja. ⁷ Mi omuyendesi a ku ta kwa zyumwi,Mi zoti o kolota?A kuta ye,Zintikanyo zo buloto zi kwana omwanda. A ku mu ta ye; Hinde cikoloti cako, ñole makumi e anja ni otatwe. ⁸ Mfumwe a kutemba o muyendesi kasepahali kakuli na a tenda ke ngana. Kakuli a bana balinu fasi ba talifile o kutendela bantu ba bo,kuhita zabana be tubo. ⁹ Ndi mi ta ye mu li tendele bashele benu ka mali ka a lukite,o ku ta ye shake ni a mane,ni ba ka mi tambule mu makalo akalilile. ¹⁰ Ozyu a sepahala mu zicenya hawa na la sepahala no ku zinene. Ozyu kalukite mu zi cenya hawa kalukite no mu zinene. ¹¹ Ati kali ni mwa sepahala ku mali kali ka a cenete, ndini na mi sepe mu bufumu hawa? ¹² No kuta ye ati kali ni wa sepahala mu ku sebelisa mali a bamwi bantu, ndini na kuhe mali ako we mwini? ¹³ Kwaazya mukana a belekela bamfumu bobile, kakuli hamwi mbwa zimbe yenke no ku shaka zyumwi, kapa hamwi mbwa hindikile kwa zyumwi no kushwahula zyumwi. Kowoli ku belekela Nyambe ne cifumu. ¹⁴ Mi a bafalisi, a ba basuni mali, niba shuwa ezo zintu zonshe, bo ku musheka. ¹⁵ Mi Aku bata, Mulicenesa mubeni mu mensho a bantu, kona Nyambe A zyi e myozyo yenu. Eci ba kutika a bantu, ci zimbitwa mu mensho A, Nyambe. ¹⁶ O mulao na bapolofita ka ba sebeza mbita ha kezya Johani. Kuzwa eyo nako, ezywi lyo mubuso wa Nyambe likutazwa, mi a bantu bonshe balika kulihambiliza o kuwana enjila yo kukabila mo. ¹⁷ Kono ecitole ndi wilu ne fasi kuta ye zi mane ku hita o kuta ye yonke entaka yo mulao ne yi maniswe. ¹⁸ Yenshe ozyu a lukulula mukazi wa kwe mi a kashesha zyumwi shatenda o bushayi, ne ye ozyu a kashesha ozyu nakaniwa kwa mukwame wakwe sha tenda zo bushayi. ¹⁹ Cwale ka kwina zyumwi mukwame a fumite ka zwesi puripela ne line mi ka likola mu zyuba ne zyuba e ci fumu cakwe cinene. ²⁰ Zyumwi o nkumbizi we zina lya Lazaro ka twaliwanga ha cizyi ce lapa lakwe, na zywile zilabi. ²¹ Mi ka shilile oko leliwa kezi kazi wa ha ntafule yo mufumi, mi kunje ye zo, a bambwa ka ba kezyanga kulasa e zilabi zakwe. ²² Ko kezya zo kuta ye onkumbizi na afwa, hape na hindiwa kumangiloi kutwaliwa kumbali ya Abrahama. Ne ye mukwame a fumite a kufwa no ku zikawa. ²³ No ku ya mu hele, no ku tanga e shando, a kutonda ku wilu no ku bona Abrahama o kule neye ne Lazaro na zezi mu cizuba cakwe. ²⁴ Cwale paho sha shumpula ye, Tata Abrahama ndi fwile nshe, tume Lazaro a conke ka manana o munwe wakwe mu menji no kukezya kundi tontoza ha lulimi, kakuli ndi kubeze caha munu mu mulilo. ²⁵ Kono Abrahama akuta ye, mwanangu, mamele ye munako yako yo ku hala ni watambula ezintu zilotu, ne Lazaro ko mukwa u fwanana na tambula e zintu zibi. Kono hanu shashengaurwa kunu, mi ewe okele mushando. ²⁶ Mi kunje ye zi zonshe, hakati ku bikitwe o mukoti munene kokuta ye aba ba shako ku hita o ku zwa kunu kezyo ko kwenu ba kangwa, hape kwaazya ozyu a wola ku koshwela ha kati kuzwa oko kezya kwetu. ²⁷ O mufumi a kuta ye, Tata Abrahama, ndi ku kumbila, ye nono mu tumi ku njuwo yi batata. ²⁸ Kakuli ndi kwesi bancu bangu bakwame abo bakwana e anja, kwaku botel'o kuta ye nana ka ba lemusi, okutiya okezya kwa cinu cibaka ce shando nabo. ²⁹ Kono Abrahama nata ye, Bakwesi Mushe na bapolofita; ba leke ba shuwe kwa babo. ³⁰ Omufimi a kutaba, 'Inga, Tata Abrahama, kono na li zyumwi na yi kwabo nazwa ku bafu, nibana ka zoka. ³¹ Kono Abrahama na muta ye, 'Ati ka bateezi kwa Mushe na bapolofita, kali ni ba shuwisise tala zyumwi wa bafu na buka.'