¹ Ko ku tendahala lwe Nsabata limwi ye, aha shaya mu njuwo ya zyumwi o muyendesi wa bafalisi ku kulya enkoko, ye ka ba mulisa hawa. ² Mubone, haho habuso bwakwe ka kwina o mukwame ka seswa ku kuzimba e vumo. ³ Jesu na abuza a bazyiisi bo mulao wa Majuda na bafalisi, ''Mani kuya ko mulao, kuhozwa lye nsabata, kapa, inga?'' ⁴ Kono niba litontolela. Mi Jesu a ku mu kwata, ku mu hoza, no ku mu leka na ka ya. ⁵ A Ku bata ye, ''Ndini wa henu ozyu ena o mwana we cikwame kapa epulu ozyw'a wila mu sima zyuba lye Nsabata o zyu kali ka hwel'o ku mu koka mo?'' ⁶ Ka li ka ba wol'o kuh'e nkalabo kwe zi zintu. ⁷ Jesu A ha sha lemuha buti ba li ketela e zipula ze kute a ba ni ba ka kuwiwa. Na ambe nguli, A ku ba ta ye, ⁸ ''Kuti mwa memiwa kwa zyumwi ku mukiti wa masheshwa, wa sha kali ha cibaka aha ha kutekeha, kakuli ku ola kuta ye kumemetwa zyumwi o zywa kutikiwa kuhite we. ⁹ Aha ka hulo muntu ozyu na mimema mwenshe, nala kuta ye, 'O he ozyu zyumwi o muntu e cibaka ca ko,' cwale sho munshoni ko yende ku ku hinda makalo a fokola hawa. ¹⁰ Kono kuti mwa memiwa, yende ka kare mu cibaka ci fokola hawa, ko kuti ozyu na ku mema shaka kezye, a kare a kezya ku kuta ye, 'Mushere, yende hiluke.' Cware no ra kutikiwa ha buso bwa ba okere nabo bonshe hantafure. ¹¹ Kakuli yenshe zywa lihanjika na ra boozwa hanshi, ne ye o zywa ali booza hanshi na ra hanjikwa.'' ¹² Jesu hape akuta ye kumukwame zyu ka ba memete, ''Kuti 0he zilyo za kamwi kapa zo mulalilo, wa sha memi bashele bako, kapa bamukulo, na bancubako be cikwame, kapa bakwako, kapa abo zyakite nabo aba ba fumite, shina ha ba wola oku ku mema nabo oku ku boozela, mi mbo lifiwa. ¹³ Kono kuti ohe zilyo, o meme banjebwe, zihole, zi yanga na bofu. ¹⁴ Mi no la fwiyaulwa, kakuli ka ba oli ku ku lifa. Kakuli ne mu la ka lifiwa mu kubuka kwa balotu.'' ¹⁵ Paho zyumwi waba kaba kele ne Jesu ha ntafule aha sha shuwa ezi zintu, aku muta ye, ''A fwiyawilwa ozyu na ka lye enkoko mu mubuso wa Nyambe!'' ¹⁶ Kono Jesu a ku muta ye, ''Zyumwi o mukwame na a tend'o mulalilo munene no ku mema, a bangi. ¹⁷ O mulalilo aha she u mano ku tendwa, a kutuma mukana wakwe o kata aba ni ba memiwa ye, 'Mukezye, ezintu zonse cwale shi za luki.' ¹⁸ Bonshe bo ku fwana ku bika mabaka o ku li zyimanina. We ntanzi aku muta ye, 'Ninda wula ewa, mi ndi botel'o ku yenda ndika li bone. Yawe ndi kwatile.' ¹⁹ Mi no zyumwi a kuta ye, 'Ni ndakaula e zipani ze anja za mapulu, mi ndi shi ka zi yeleka. Yawe ndi kwatile.' ²⁰ Mi zyumwi o mukwame a kuta ye, 'Ka ndi zo kushesha o mukentu, mi ka bulyaho ka ndi woli o kezya. ²¹ O mukana na kezya mi na a sumwina mfumwe ezi zintu. Cwale o mfumu we yo njuwo a ku benga no kuta o mukana wa kwe ye, 'Hwele kuyenda kunje mu mikwakwa ne nkanza yo munzi mi ka lete kunu a banjebwe, zihole, a bofu ne ziyanga.' ²² O mukana a kuta ye, 'Mfumu, eco no laeli ca tendwa, mi ku shina makalilo.' ²³ O mfumu a kuta ye ku mukana, 'Yende kunje mu mikwakwa no mi mikulo mi mu ba hambilizo kezya kukabila, ye njuwo yangu yi zyule. ²⁴ Kakuli ndi kuta ye, kwaazya kwa bo bakwame ka ba memetwe o zyu na nyomene ku mulalilo wangu.''' ²⁵ Cwale cinalyanga e ci nene ka ci yenda ne ye, mi Aku zoka no ku bata ye, ²⁶ ''A ti omuntu nakezya kwa ngu na azya ku zimba beshi, banyina, mukazi wakwe, bane, bancu bakwe ni ba mukulwe be cikwame ne cikentu--ee, no buhalo bwakwe ye mwini bulyaho--ka woli kuba muzyiyiswa wangu. ²⁷ Yenshe ozyu ka hindi cifapano cakwe no ku ndi cilila kaoli ku ba muzyiyiswa wangu. ²⁸ Kakuli ndini kwenu, o zywa shilila o kuzyaka e tawala, o zyu ka tangi kukala hanshi no kubala e nsinyehelo no ku shanganisa ye a bone nali a kwesi ezi zi shakahala o ku u manikiza? ²⁹ Hamwinya, kuti sha na tangi muzyako, no ukane ku mana, bonshe ba ba ku u bonanga ni bala tango ku musheka, ³⁰ ni bata ye, 'Ozyu mukwame na a tanga o kuzyaka kono a kangwa o ku manikiza. ³¹ Kapa ndu mfumu nji, o zywa ye nda ka zingiza zyumwi omfumu, ke ndwa, o zyu ka kali tango no ku wa ne nkelezo ka zo kuta ye nali a wola o ka mu lwisa na bakwame be zikiti ze kumi ku kulwisa o mfumu shi bakwame be zikiti za makumi obile a kezya ku mu lwisa. ³² A ti kali mbulyaho, hahena empi yi mwi yi shikeno kule, a tume muzyimanini no ka kumbila ze mpole. ³³ Mi ka bulyaho, yense wa kwenu o zyu ka shwahuli zonshe zi a kwesi ka woli ku ba o muzyiiswa wangu. ³⁴ E zwayi ndilotu, kono ati e zwayi lya mani o mulyohelo walyo, mbuti liol'o ku lungiwa li shuwahale buzwai hape. ³⁵ Lya azya ntuso kwi vu, kaba nanga ku cilwi co musutelo. Mbo li shohiwe. Ozywa kwesi matwi o ku shuwisa, a shuwe.''