1 Bantu bangi bana yereki oku toroka ezintu ezo niza bumbilizwa mukati ketu, 2 omo niza herwa kwetu, abo kabali ba mabonazintu nezi abeeka bezywi ku matatikizo. 3 Kakuli kwangu nikwabonahara burotu—noku shakisisa nenja ezo niza reta ezi zintu ku matatikizo— noku ñora ezintu zako zonshe omo zikalire, nfumwangu Tiyofilasi. 4 Kokutiye ozyive ovuniti bwe zintu omo niza zyiirwa. 5 Mu mazyuba a Heroda, o nfumu wa Judeya, kakwina o mupurisita we zina lya Zakariya, ozyo kazwa mu chishi cha Abijah. Mukentu wakwe kazwa kubana ba Aroni mi ezina lyakwe kali Elizabeta. 6 Kaba chenete bonshe habuso bwa Nyambe, kaba kutika e mirao nokutenda ezi zishakahara kwa Nfumu. 7 Kono kabaazya o mwana kakuli, Elizabeta kali kapaka, kame shikabali bankaramba. 8 Mwi nako eyo niya kezya Zakariya nena habuso bwa Nyambe, natenda o mutendo wobu Purisita kokuya ka mayemo akwe ezitendo. 9 Kokuya ke chizo coku keta choku tenda mubu purisita, na ketiwa kubantu bangi oku kavila mwi tempere yo Nfumu oka yisa e Insense. 10 Aho kaku hiswa e insense e chinalyanga kachi kere hanje nachina chi lapera. 11 Haho bulyo e Engiloi lya Nyambe lyokezya habuso noku zyimana kumalyo a katala ke Insense. 12 Zakariya aho shamubona aku tiya mi entiya niya muwila. 13 Kono engiloyi lyo kumuta ye," Zakariya washa tiyi, kakuli entapero yako ya shuwahali. Mukentu wako Elizabeta nara kupakira o mwana muroba. Nora muha ezina lya Johani. 14 Nora litemba ne mboterwa, mi a bantu nabara boterwa hawa kuku pakiwa kwakwe. 15 Kakuli nabara munene mu mensho a Nyambe. Kali nanywe o bujwara kapa zikora, nara zyura o ruho ruchenete kuzwa mwibumo lyi banyina. 16 Bantu bangi ba Isiraere nabara zokera ku Nfumu Nyambe wabo. 17 Naraya habuso bo Nfumu no ruho ruchenete ne ngamu za Eliya. Nara tenda zi ye e myozyo yi beshwabo i zokere ku banabo, ye bena bazya ekute naba yende mu butali bwabena ba tenda nenja - okutiye a bantu bo Nfumu bakuli tukiseze. 18 Zakariya akutaba Engiloyi," mbuti ndiwora kuzyiba zizi? kakuli ndili nkaramba ne mukentu wangu neye ndu nkaramba." 19 Engiloyi lyoku mutaba noku musumwina," Ndime Gabbuliere, ndizyimananga habuso bwa Nyambe. ndi tumitwa kwakwe kuku amba kwako, kuku retera e mbuzi endotu. 20 Bone, nora tontora kali no ambe mbita elyo zyuba shake nazi tenda hare. Kakuli kali niwa zumina a mazywi angu, awo nia bumbilizwe mwi nako endotu. 21 A bantu kaba lindile Zakariya. Kaba komoketwe hawa kubona nahinda nako ende mu Tempere. 22 Mi aho shazwa mukati, kashi ambi nabo. Boku zyiba ye naboni e mpono aho akukere mwi tempere. Akuzwila habuso noku amba nabo ka maanja eye na tontwere. 23 Aho ikezya e nako yokumana kwe ntendo, nakaya kunjuwo. 24 Aho kuhita mazyuba, Elizabeta mukentu wakwe aku sumbara. Akuli zika ke myezi ye anja. 25 Akutiye, "ezi nzezo nandi tendeli o Nfumu aho nandi tonda ko musa ye azwisa enshoni zangu habuso bwa bantu." 26 Mu myezi ye anja ni konke, e Engiloyi Gabbuliere na tumiwa kwa Nyambe, mu munzi wa Galireya owo niwa wulikiwa Nazareta, 27 kwa kamware ozyo kashumininwa ku mukwame we zina lya Josefa. Ngo munjuwo ya Dafida, mi kamware we zina lya Maliya. 28 Akezya kwakwe nokutaye, " rumere, kakuli oli obutokwa hawa hawa. O nfumu akere newe." 29 Kono alyangana ka mazywi ao kakuli o murumereso munji owo. 30 E Ngiloyi lyo kumuta ye, washa tiyi, Maliya, kakuli nowani e nfwiyauzi kwa Nyambe. 31 Obwene, nora sumbara mwivumo lyako, mi nora paka o mwana o mukwame. Nora muha ezina lya 'Jeso.' 32 Naraba o muntu o munene mi nara kuiwa o muntu ozyo ena kwi wiru hawa. O nfumu Nyambe nara muha e chuna cha bazimu ba Dafita. 33 Nara yendesa heshika lya Jakobo kutwara oko mi kwaazya kumana koku yendesa kwakwe." 34 Maliya akutiye kwi Ngiloyi," mbuti nazi tendahare ezi zintu, heba eme ndishini kuzyiba mukwame?" 35 Engiloyi lyoku mutaba ye," O ruho ruchenete narura kezya hako, kame engamu enene zozyo ahanzi nazira kubwika. Kame ozyo achena hawa shake na retwa nara kuwiwa mwana wa Nyambe. 36 Mi obwene, o mukwako Elizabeta neye na sumbara o mwana o murova mubu nkaramba bwakwe. Hanu ayendera mu myezi ye anja ne wonke, mi bunga kali ka paka. 37 Nyambe kwaazya echo awora kukangwa kutenda. 38 Maliya mpaha kataba ye , "bone, ndili mwika o Nfumu, kutendahare kokuya ke zywi lyako." Engiloyi lyoku mureka. 39 Cware Maliya mu mazyuba aho akubuka nakaya mwikanda, mu munzi wa Judeya. 40 Aku kavira mwinjuwo ya Zakaliya, aku busa Elizabeta. 41 Elizabeta aho shashuwa ku meresa mwa Maliya, oku shotoka o mucheche kakere mwibumo lyakwe, mi ruho ruchenete nirwa zyura kwa Elizabeta. 42 Aku jangaza hawa." Enfuyauzi zina ku mukentu, enfuyauzi ze bumo muzwa zirotu. 43 Cware chinji aho kutendahara ye nyina wo Nfumu akezye kwangu? 44 Kakuli obwene, oku meresa kwako aho kuhura ku matwi angu, mwanangu ena mwibumo aku shotoka nje mboterwa. 45 Enfuyauzi zo mukentu azumina ezintu zibumbiliza ezo niza tewa kwakwe zizwa ku Nfumu." 46 Maliya akutiye, "O muzya wangu urumba o Nfumu. 47 mi o ruho rwangu rutembe Nyambe o muhazi. 48 Kame naboni a mazyimo o mwika wakwe wo mukentu. Obwene, onshe mashika naara ndikuwa nfuyauzi. 49 Kakuli o munene nandi tendera ezintu zingi, ezina lyakwe lichenete. 50 Kakuli o musa wakwe naura zwira habuso mu mashika onshe akezya babo bamu tiya. 51 Na bonahazi engamu ne anja lyakwe; Na bbatauli abo kabalitemba ke ziazyaro ye myozyo yabo. 52 Nazwisi hanshi bana baba nfumu ha chuna chabo. Na nanuna abo bena hanshi. 53 Na kutisa abo bafwile enjala ne zintu zilotu, abo bakwesi zintu naba tandira kungi chinywe maanja. 54 Bena Isiraere abeka bakwe naba tusa, okutiye baazyare okuba fwira enshe 55 (omo na ambila kubeshwetu) kwa Abburahama na behwe kuya kukoo. 56 Maliya nakara ne Elizabeta e myezi yo tatwe mpaho shika boora kunjuwo yakwe. 57 Aho shei hura enako ya Elizabeta yoku paka, akupaka o mwana o muroba. 58 Abo azyakite nabo na bakwakwe aho bashuwa ye nasundi enshe kwakwe, niba litemba hawa neye. 59 Aho kuhita a mazyuba e anja nawo tatwe bokezya ku mukanda wo mucheche. Kabawora kumu kuwa kezina libeshi lya Zakaliya" 60 Kono nyina Elizabeta akukana noku ta ye "inga. mbwa kuyiwa Johani." 61 Boku mutaye kwaazya kuba kwako ozyo akuiwa kelyi ezina. 62 Boku tenda ezisupo kweshi ye mbuti ashaka ye nabikiwe ezina. 63 Eshi aku bakumbira ye bamuhe etapa lyoku ñorera, akuñora, " ezina lyakwe ndi Johani." Neba komokwa hawa kwezo. 64 Haho bulyo kanwa kakwe koku aruka oku shumunaka no rulimi. Aku amba noku temba Nyambe. 65 Entiya yokezya kubantu bonshe kahara nabo. Zintu zonshe zizo niza zyura ha chishi cha marundu cha Judeya. 66 Bonshe abo niba zishuwa neba zibika mwi myozyo yabo, naba ziamba, " cware mbuti shake nabe ozyu mucheche?" Kakuli e anja lyo Nfumu kali kere kwakwe. 67 O ruho ruchenete nirwa kezya kwa Zakariya, aku polofita, na amba ye, 68 "ku tembiwe o Nfumu, Nyambe wa Isiraere ozyo nakezya ku zora abantu ye bahare. 69 Na nanuna o runaka rokuhaza a beka benjuwo ya Dafita. 70 Omo nikwa ambirwa kuba baporofita bachenete bakare. 71 Nara reta okuhaza ku zitozi zetu nabo batu zimbite. 72 Naraba nenshe kube shwetu noku bumbiliza obushere bakwe, 73 Ko muambiro wakwe kwe shwetu Abburahama. 74 Na konka ye tuwane nokuhazwa mwi anja lye zitozi, no kumu tendera nikwaazya entiya. 75 Tukare mukuchena nokuruka mubuharo bwetu bonshe. 76 Ee, ewe mucheche, nora kuwiwa o muporofita wozyo ena hanzi. Kakuli ewe nora ya habuso bo Nfumu oku chenesa enjira yozyo a chenete o nfumu, oku bakanya a bantu kuku kezya kwakwe, 77 Okutiye a bantu bawane e nzunu yoku hazwa kwabo nezibbi zabo zikwatirwe. 78 Ezi nazira tendahara ke nshe za Nyambe wetu, kakuli aha kwina bulyaho o mumuni we zyuba nawura kezya kwetu kuku tutusa, 79 ku munikira abo bena mukansikwe nabo bena mu munzure wo rufu. Nara tenda bulyena kuyendesa matende etu munjira ye mpore." 80 Cware o mwanche aku kura hawa noku gora o ruho ru chenete, mi munkanda kahara mbita ezyuba elyo nakezya habuso bwa Isiraere.