¹ Ndi misusuweza abakuru bena mukati kenu, eme, zyumwinya wa bakuru. Eme kame ndili mpaki wa mashando a Kiresite, mi kame neme ndili zyumwinya we tubo eyo shaka nei bonahare. ² Kabulyaho, ndimi susweza, bakuru, mumamere ezighughi zo mberere za Nyambe zikere mukati kenu. Muzi babarere, kali kebaka lyokuta ye muswanezi kutenda bulyaho, kono kebaka lyo kushaka kwenu, kuya kamomu ashakira Nyambe. Mu zibabarere, kali ka mali obuhomi, kono ko kushaka. ³ Mwasha tendi mbwe muli ba nfumu ba bantu bena mumpabalelo yenu. Kono mube mitara ku zi ghughi ze mberere. ⁴ Mi cware shaka nabonahare o Mulisani Mukuru, mura wana o mushukwe ou kaumani tubo. ⁵ Kenjira iswana, enwe bakwame badana, mukibike kunshi ku bakwame bakuru. Mwenshe, muzwate kuliboza hanshi noku tusana. Kakuli Nyambe a kana bali nanuna, kono aha e chisemo kubena bali bozekeza kunshi. ⁶ Cware he, mu libozekeze kunshi, kunshi lye anja lya Nyambe, kuti ye, ami nanune mwi nako irukite. ⁷ Mubike empiraero zenu kwakwe, kakuli abiraera newe. ⁸ Mu mamere e ngana zenu, mu rwere nenja. Chira chenu diyabulosi, akwesi ayenda-yenda mbwe ondabu ozyu alira, nashaka muntu woku lya. Mumurwise. ⁹ Mugorese mu ntumero yenu. Muzyi ye e chinalyanga chenu cha bantu be ntumero bena mu fasi bakere mu mashando aswana. ¹⁰ Hasimwa shandi muka nako kadana, Nyambe wechisemo chonshe, ozyu nami kuwira mu tubo yakwe eyo kaimani mwa Kiresite, nara mitenda nenja, kumizyakisa, noku migoresa. ¹¹ E mpuso ibe kwakwe kuya okoo. Amen. ¹² Ndihinda ye Silivanus mukwangu ozyo asepahara, mi nda miñoreli ko bufuhi kakwe. Ndimi susuweza nokumiha obupaki ye ezi ndañoli chisemo cha Nyambe che niti. Muzyimane mwacho. ¹³ O mukentu ozyo ena mwa Babbiloni, ozyu naketiwa hantu honke nenwe, ami meresa. Ne mwanangu Mareka, ami meresa. ¹⁴ Muli merese koku lichunchuna ke rato. E mpore ibe nenwe mwenshe mwina mwa Kiresite.