1-ፊዃ

1 እን ሰየም መለኩኑ ሰጘና እያምሊ፡ እን በለድል ትግር እንቱኹ። ላግርዋ ኒዂነዲ ለጛ ኒቊርዲት፥ ቤትሊሔም ይሁደትልድ፥ ሞኣብ ይስታዅሊ መንደርትሮ እንትዅ። 2 እን ግርዋ ስጙ ኤሊሜሌክ፥ ኒዂነር ስጝኻ ናእሚ፥ ስጙጝ ለጛ ኒቊሩኻ ኮዶ ማሕሎንዲ ክልዮንዲ ይስተነኵ። ኤፍርውልድ ቤትሊሄም ይሁደትሪትል እርግኑዅ። ሞኣብ ይስታዅ ብሪል እንትኖ መደርቱኑ ሰጘነኵ። 3 ኤሌሜሌክ ናእሚር ግርዋ ክሩዅ እማ፡ ንሪኻ ለጛ ንርቁርዲ ከብቲቲ። 4 ናውኻ ሞኣብያንልድ ክኻንቲኒዅ፥ እን ሰልፍሪ ዖርጳ፡ እን ሊጘሪኻ ሩት ይስተነኵ፥ ሽካ ኣመራ ኣከዅ ኒል መንደርትኑዅ። 5 ማሕሎንዲ ኪልዮንዲኻ ለጘርክ ክርኑዅ። እን እዂነኻ ለጛ ንርቊርልድር ንርግርዊልድር ካያ ከብቲቲ። 6 ንደንብ ንሪ፡ ሞኣብ ይስታዅል ዋንትሩ፡ ጃር ኒከውስ ገእየትሎምኽር ቊስታዅ እወትሎምር ዋስቲ እማ፥ እን ለጛ ንርቊራ እኲንዲ ሞኣብር ብሪል ወንተርቲ። 7 ንርዲ ለጛ ንርቊራ እኲንዲ፥ እን ናው እርግና ኣካንልድ ፍኑዅ። ይሁደር ብሪል ወንተርድኖ ደርብ ብርፍ ይኑዅ። 8 ናእሚ ደኣም ለጘርትክ ንርቊራ እኲንሲ፡ ፈራ እንተገና ልጝንተል ወንተራ። እንክረውዲ ኣኽን ይዲ እስዲነውሲ ጃር እንታ ብሕልቲል እሲንተት። 9 ለጘሪክ እንታ ግርውዋ መሳክብሊ ጃር ፊዃ እውንተት ይቲለን። ንደንብኻ፡ ሰለምቲለን፥ ናውኻ ደሀይሲ ክብስነ ስሪኒዅ። 10 ላላ ኒሰና ኣኽላ፡ ኩዲ ኩከውሊ ወንተርኖ ግን ይንዅላ። 11 ናእሚ ደኣም፡ ይቊርገ ውሪዅ ይዲ ፈርደናዅን፧ ወንተራ ደኣም፡ ይከርስሊ ገድም እንተት ክኻንቲድኖክን ገረሰዎ እቁርማ ክመ፧ 12 ይቊር፡ ኣነ ግርዊል ስኵርጊን ገንዅን እሞ፡ ፈራ ደኣም ወንተራ። ሳዳ ክመን እማ፡ ኒኪር ቒርሊ ነሳዅሪል ስኩረን እማ ቆራቁር እዃረን፥ 13 ናው ለገድናሲክማ ጨበርትኖ ኣኽድኖ፧ ንድ ሰበትድ ነሳዅሪል ስኩርግድንማ መንደርትትኖ ኣኽድኖ። ጃር ናን ይል ፍሮ ህንበቲ እማ እንተስጝ ይድ መረረኩ ይቲለን። 14 ንደንብኻ ሊጘር፡ ደሀይሲ ክብስነ፡ ስሪኒዅ። ዖርጳ ንር ተንሽኒት ሰለምቲላ፡ ሩት ደኣም ጨግዕስትቲላ። 15 ንሪኻ፡ ኩኣረረንድቊ እነሓን ንርከውልኽር ንር ጃርልኽር ወንተርቲ፥ እንቲኽር ኩኣረረንድቁርሰና ንርጉርበትሲ ወንተሪ ይቲላ። 16 ሩት ደኣም፡ ባሮኪ ኩልድ ደንቢራ ወንተራያ ላዝም ይግለ። እንቲ ፈርዳዅልኻ ፈርየ፥ እንቲ ክራዅልኻ ኪያ ግን። ኩከው ይከው ግን፡ ኩጃርኻ ይጃር ግን። 17 እን እንቲ ክርዳዅሊ ክርያ ግን ፡ ኒልኽር ኰደ ደብትያ ግን። ይዲ ኵዲት ክራ ንኻ አሪዅ ፈንተየና፥ ጃር ነሃቢን ይት፡ ነወያዃ ኮድንለ ይት። 18 ንርትልድ ከብተግረት ቆልዶሰና፡ ጋብሲ ባርቲ። 19 ቤት-ልሄምትል ገእይድናሲክ ላት ፈርኑዅ። ቤትልሄምሊ ቱኖሰና፡ ንርውክ ተንታርዋ በጭበጭስቲ። እን እኲንኻ፡ ኒኒ እምንድክ ናእሚማ፧ ይኑዅ። 20 ንሪኻ እን ኒትክ ገረሳዅ፡ መረርድዅለ እማ ናእሚ ኣኽጊ ማራ የለ። 21 ኣን እንተኾ ፈርዅን፡ ጃርኻ ካያ ዋንስዅለ። ጃር ሳምዕ ኣኾደንቢለ፡ እን ኒትክ ገረሳዅ ጂብዶደንብለኻ ውሪዅ ናእሚ ይደናዅንለ ይቲለን። 22 ናእሚኻ ወንተርቲ፥ ሩት ሞኣብር ብሪልድ ወንተርደሪ፡ ሞኣባያንድሪ ንርዅረድ ቊ ንርዲ እርግቲ። ናውኻ ስክም እሽርሳ ወክትሊ ቤት-ልሄምትል ቱኑዅ።